Yoshwa 14 - IBAYIBOLO 2024

Akagabile aka chisu icha kubwinjililo bwizuba ubwa Yolodani

¹ Vinivi vikaba vyisu vivyo aba Izilayeli bakapokela muchisu icha Kenani pakuba mpyana yabo, vivyo umuputi u Eleyazala nu Yoshwa umwana uwa Nuni, na balongozi abamunyumba aba inko izya ba Izilayeli bakagabila.

² Ukuyana na zizyo u Mwene akamulamula u Mozesi, ichisu chabo chikagabika pakubombezya amayele nukuzigabila inko nayini nu hafu, poka ni chigaba chimo icha luko.

³ U Mozesi akazigabila inko zibili nu hafu izya kubufumilo bwizuba ubwa Yolodani, loli aba Levi batakabagabila nachimochimo ichisu pakuba mpyana yabo,

⁴ pachifukwa ichakuti uluko ulwa Yosefu lukaba pabili, kokuti uluko ulwa Manase nulwa Efulayimu. Uluko ulwa Levi lutakapokelapo nachimochimo ichisu pakuba mpyana yabo, loli bakapokela twene utwaya utukulu utwakwikalamo, poka nu buzilo ubwakudimilako ivitekwa vyabo.

⁵ Po aba Izilayeli bakachigaba ichisu chila ukuyana namumo u Mwene akamulamulila u Mozesi.

U Kalebu akupokela ichisu icha Hebuloni

⁶ Po isiku limo abaluko ulwa Yuda bakiza kwa Yoshwa bo ali pa Giligali, po u Kalebu umwana uwa Yefune, umu Keni akamubuzya u Yoshwa akati, “Uzimenye zizyo u Mwene akamubuzya u Mozesi umubombi uwa Chala izya awe poka nane, bo ali pa Kadeshi Balineya.

⁷ Pakabalilo kalakala ane nkaba na maka 40, bo u Mozesi umubombi uwa Mwene akuntuma pakutendela ichisu ukufuma ku Kadeshi Balineya. Po ane nkamupangila ubwanaloli bosi ukuyana na zizyo nkazyennya.

⁸ Loli abantu babo nkabuka nabo bakabawisya amaka abantu nukubapelela ubogha. Loli pope bulo ane nkamwivwila u Mwene u Chala wane nu moyo wane ghosi.

⁹ Pisiku lilalila u Mozesi akandayizya akati, ‘Ichisu chosi chicho ukabukako pakuchitendela chikwiza pakuba mpyana yako, awe poka na baluko lwako bosi bwila na bwila pachifukwa ichakuti wamwivwila u Mwene u Chala wane nu moyo wako ghosi.’ ”

¹⁰ U Kalebu akanena sona akati, “Loli ghachilapo amaka 45 ukwandila pakabalilo kako u Mwene akumubuzya u Mozesi zinizi, bo aba Izilayeli bakwendakwenda munkolongo. Ennya ilelo indi na maka 85.

¹¹ Loli pope bulo inchili indi na maka ukuyana namumo nkabela lula, bo u Mozesi akuntuma. Inchili indi na maka umwakuti ningalwa ubwite ilelo ngati kale.

¹² Po losi ulu mpanga ichisu icha mumaghamba chicho u Mwene akandayizya pisiku lilalila. Pakuti awe wemwenecho ukivwa ukuti aba Anaki bakaba kulakula, sona nukuti utwaya twabo utukulu tukaba na malinga. Loli lumo u Mwene akwiza pakuba nane, po nkwiza pakubachimbizyamo ukuyana namumo akanenela.”

¹³ Po u Yoshwa akamusaya u Kalebu umwana uwa Yefune nukumupa akaya aka Hebuloni pakuba mpyana yache.

¹⁴ Akaya aka Hebuloni ko kaya ka Kalebu umwana uwa Yefune umu Keni mupaka nilelo bulo pachifukwa ichakuti akamwivwila u Mwene u Chala uwa ba Izilayeli nu moyo wache ghosi.

¹⁵ Kale akaya aka Hebuloni kakitiziwanga ni tabwa ilyakuti Kiliyati Aliba, lilyo likaba litabwa ilya Aliba, yuyo akaba muntu mumanyikwe nkani pakasi paba Anaki. Pisinda pache ichisu chosi chikatuzya pakulwa ubwite.