Yoshwa 13 - IBAYIBOLO 2024

Ichigaba chicho chikaba chichili pakufyuliwa

¹ Bo u Yoshwa aghosipa nkani, u Mwene akamubuzya akati, “Awe waghosipa nkani, loli ichigaba chicho chichili chitafyuliwe chichili chilipo chikulu.

² “Ichisu chicho chasyalako cho ichi: Ichisu chosi icha ba Filisiti nicha ba Geshuli,

³ ukwandila ko kulusoko ulwa Sihoni kubufumilo bwizuba ubwa Ijiputi mupaka muchigaba icha Ekiloni kumitu kokuti ichisu chosi icha ba Kenani, chicho abamwene fayivi aba Filisiti bakalaghilagha mu Gaza, na mu Ashidodi namu Ashikeloni namu Gati namu Ekiloni sona na mu Avimu.

⁴ Impaka iyakuntende kokuti ichisu chosi icha ba Kenani, yikandila ku Ala mu Sidoni mupaka ku Afeki, chicho chikaba chigaba icha ba Amoli,

⁵ ni chigaba chosi icha ba Gebala, na mu Lebanoni mosi mupaka kubufumilo bwizuba, ukwandila ku Baala Gadi muntende mwighamba ilya Helimoni mupaka ku Lebo Hamati,

⁶ ni chisu icha mumaghamba icha ba Sidoni, ukwandila ku Lebanoni mupaka ku Misilefoti Mayimu, kokuti ichigaba chosi icha ba Sidoni. Ane ne mwenecho nkwiza pakubachimbizyamo, bo aba Izilayeli bakufika. Ubagabile aba Izilayeli ivyisu vinivi ukuti chibanje mpyana yabo ukuyana namumo nakulamulila.

⁷ Po ubagabile abantu aba inko 9, sona nu hafu uwa chigaba icha luko ulwa Manase ukuti chibanje mpyana yabo.”

Ukugabiwa ukwa chigaba icha kubufumilo bwizuba ubwa Yolodani

⁸ U Mozesi umubombi uwa Mwene akalugabila uluko ulwa Lubeni nu Gadi, sona ni chigaba chimo icha luko ulwa Manase ichisu icha kubufumilo bwizuba ubwa lusoko ulwa Yolodani.

⁹ Ichigaba chabo chikandila ku Aloyeli, sona nakaya akakulu nkani pakasi pikombe ilya Alinoni, nukonjelezyapo ichisu chosi icha mumaghamba icha Medeba mupaka ku Diboni,

¹⁰ sona nutwaya tosi utukulu utwa mwene u Sihoni uwa ba Amoli, yuyo akalaghilagha mu Heshiboni, mupaka kumpaka iya chisu icha ba Amoni

¹¹ ni chisu icha Giliyadi ni chigaba icha ba Geshuli ni icha ba Maaka ni ghamba lyosi ilya Helimoni sona ni chisu chosi icha Bashani mupaka ku Saleka,

¹² kokuti ubumwene bosi ubwa Ogi mu Bashani, yuyo akalaghilagha mu Ashitaloti na mu Edileyi sona akaba weka uwa bantu abakupona uwa ba Lefayimu. U Mozesi akabapota nukuchifyula ichisu chabo.

¹³ Loli aba Izilayeli batakabachimbizyamo aba Geshuli naba Maaka. Po abantu banaba bachili bakwikala pakasi paba Izilayeli mupaka nilelo bulo.

¹⁴ U Mozesi atakabapa abaluko ulwa Levi ichilingo pakuba chabo, pachifukwa ichakuti ichilingo chabo chikaba chakwiyipa ichakocha chicho chikabikiwa kwa Mwene, u Chala uwa ba Izilayeli, ukuyana namumo akababuzizya.

Ichisu chicho akalugabila uluko ulwa Lubeni

¹⁵ Ichisu chicho u Mozesi akalugabila uluko ulwa Lubeni ukuyana ni nyumba zyabo pakuba mpyana yabo chikaba cho ichi:

¹⁶ Ichisu chabo chikandila ku Aloyeli mupaka kwikombe ilya Alinoni sona nakaya akakulu kako kakaba pakasikasi pikombe sona ni chikwezya chosi ukwandila ku Medeba,

¹⁷ mupaka ku Heshiboni poka nutwaya twache tosi utwa mwikombe kokuti akaya aka Diboni naka Bamoti Baala naka Beti Baala Meyoni

¹⁸ naka Yahazi naka Kedemoti naka Mefati

¹⁹ naka Kiliyatayimu naka Sibima naka Zeleti Shahala pighamba ilya mwikombe

²⁰ naka Beti Pewoli nu busulumuka bosi ubwa Pisiga sona naka Beti Yeshimoti

²¹ kokuti utwaya tosi utwa tukwezya, sona nutwaya tosi utwa mwene u Sihoni uwamu Amoli, yuyo akalaghilagha mu Heshiboni. U Mozesi akamupota u Sihoni, poka na balongozi aba mu Midiyani. Abamwene banaba bo aba: U Evi nu Lekemu nu Zuli nu Huli, sona nu Leba kokuti abamwene bosi babo bakalaghilagha muchisu chilachila.

²² Aba Izilayeli bakamughogha wepe nu Balamu umwana uwa Bewoli, yuyo akaba wamayele.

²³ Po impaka iya luko ulwa Lubeni yikaba lusoko ulwa Yolodani. Uluko ulwa Lubeni lukapokela utwaya utukulu tunutu nutwaya twache ukuti tubanje mpyana yabo ukuyana ni nyumba zyabo.

Ichisu chicho akalugabila uluko ulwa Gadi

²⁴ Ichisu chicho u Mozesi akalugabila uluko ulwa Gadi ukuyana ni nyumba zyabo pakuba mpyana yabo chikaba cho ichi:

²⁵ Ichisu chabo chikaba chisu icha Yazeli nutwaya tosi utukulu utwa mu Giliyadi ni chigaba chimo icha chisu icha ba Amoni mupaka ku Aloyeli, kupipi nakaya aka Laba.

²⁶ Ichisu chabo chikandila ku Heshiboni mupaka ku Lamati Mizipa nu Betonimu sona chikandila ku Mahanayimu mupaka kuchigaba icha Debili.

²⁷ U Gadi akagabiliwa sona ikombe ilya Yolodani, nakaya aka Beti Halamu naka Beti Nimula naka Sukoti naka Zafoni sona ni chigaba chimo icha chisu icha Sihoni, u mwene uwamu Heshiboni kubufumilo ubwizuba ubwa Yolodani mupaka kubumalilo ubwa Nyanja iya Galileya.

²⁸ Utwaya utukulu tosi tunutu poka nutwaya twache tukagabiliwa uluko ulwa Gadi pakuba mpyana yabo ukuyana ni nyumba zyabo.

Ichisu chicho akalugabila uluko ulwa Manase ulwa kubufumilo bwizuba

²⁹ Ichisu chicho u Mozesi akalugabila uluko ulwa Manase pakuba mpyana yabo, kokuti ichigaba chimo icha abaluko ulwa Manase ukuyana ni nyumba zyabo cho ichi:

³⁰ Ichisu chabo chikandila ku Mahanayimu kokuti ubumwene bosi ubwa Ogi u mwene uwamu Bashani nutwaya tosi utwa Yayili nutwaya utukulu 60

³¹ sona ni chigaba chimo icha Giliyadi nicha Ashitaloti nicha Edileyi nu twaya utukulu utwa bumwene ubwa Ogi mu Bashani. Ubuzilo bosi bunubu akabagabila ichigaba chimo icha bamunyumba iya Makili umwana uwa Manase pakuba mpyana yabo ukuyana ni nyumba zyabo.

³² Iyi yikaba mpyana yiyo u Mozesi akabagabila abantu, bo ali mwikombe ilya Mowabu kwisila ilinji ilya lusoko ulwa Yolodani, kubufumilo bwizuba ubwa Yeliko.

³³ Loli u Mozesi atakalugabila uluko ulwa Levi ichisu nachimochimo pakuba mpyana yabo. Pakuti u Mwene u Chala uwa Izilayeli we mpyana yabo ukuyana namumo akabalayizizya.