Yoshwa 12 - IBAYIBOLO 2024

Abamwene babo u Mozesi akabapota

¹ Aba bo bamwene babo aba Izilayeli bakabaghogha nukuvifyula ivyisu vyabo ivya kubufumilo bwizuba ubwa lusoko ulwa Yolodani ukwandila ko kwikombe ilya Alinoni mupaka kwighamba ilya Helimoni, mupaka kulubazu losi lwakubufumilo bwizuba ubwa Alaba:

² U Sihoni u mwene uwa ba Amoli, yuyo akalaghilagha mu Heshiboni. U Sihoni akalaghilagha ukwandila ku Aloyeli, akaya aka papipi nu lusoko ulwa Alinoni, mupaka kulusoko ulwa Yaboki kumpaka iya chisu icha Amoni, sona ni chigaba chimo icha Giliyadi.

³ Akalaghila sona ichigaba chosi icha kubufumilo bwizuba ubwa Alaba ukwandila ko ku Nyanja iya Galileya, mupaka ku Nyanja Imfwe, ni chisu icha Beti Yeshimoti, na muntende mwighamba ilya Pisiga.

⁴ U Mozesi na basilikali bache bakalwa sona ubwite nukumupota u Ogi u mwene wamu Bashani, yuyo akaba weka uwa bantu babo bakasyala muba Lefayimu. U Ogi akikalagha mu Ashitaloti na mu Edileyi.

⁵ Akalaghilagha mupaka kwighamba ilya Helimoni na mu Saleka sona na mu Bashani mosi mupaka kumpaka iya ba Geshuli naba Maaka sona ni chigaba chimo icha chisu icha Giliyadi mupaka kumpaka iya Sihoni u mwene uwamu Heshiboni.

⁶ U Mozesi poka naba Izilayeli bakabapota bosi banaba, po u Mozesi umubombi uwa Mwene akabapa ichisu chinichi uluko ulwa Lubeni nulwa Gadi, sona ni chigaba chimo icha luko ulwa Manase ukuti chibanje mpyana yabo.

⁷ Aba bo bamwene babo u Yoshwa poka naba Izilayeli bakabapota kubwinjililo bwizuba ubwa Yolodani, ukwandila ko ku Baala Gadi kwikombe ilya Lebanoni mupaka kwighamba ilya Halaki lilyo lili kulubazu ulwa Seyili. U Yoshwa akazigabila inko izya ba Izilayeli ichisu chinichi ukuti chibanje chigaba chabo ni chabo.

⁸ Ichisu chabo chikaba chisu icha mumaghamba, ni kombe ilya kubwinjililo bwizuba, ni chisu icha Alaba ni kombe ilya Yolodani na munkolongo ni chisu icha Negebu kokuti ichisu icha ba Hiti nicha ba Amoli nicha ba Kenani, nicha ba Pelezi nicha ba Hivi sona nicha ba Yebusi.

⁹ Abamwene babo aba Izilayeli bakabapota bo aba: U mwene uwamu Yeliko nuwa mu Ayi papipi nu Beteli

¹⁰ nu mwene uwamu Yelusalemu uwa bamo abamwene aba mu Hebuloni

¹¹ u mwene uwamu Yalimuti uwa bamo aba mu Lakishi

¹² u mwene uwamu Egiloni uwa bamo aba mu Gezeli

¹³ u mwene uwamu Debili uwa bamo aba mu Gedeli

¹⁴ u mwene uwamu Holima uwa bamo aba mu Aladi

¹⁵ u mwene uwamu Libina uwa bamo aba mu Adulamu

¹⁶ u mwene uwamu Makeda uwa bamo aba mu Beteli

¹⁷ u mwene uwamu Tapuwa uwa bamo aba mu Hefeli

¹⁸ u mwene uwamu Afek uwa bamo aba mu Lashaloni

¹⁹ u mwene uwamu Madoni uwa bamo aba mu Hazoli

²⁰ u mwene uwamu Shimuloni Meloni uwa bamo aba mu Akishafu

²¹ u mwene uwamu Tanaki uwa bamo aba mu Megido

²² u mwene uwamu Kedeshi uwa bamo aba mu Yokoneyamu (mu Kalimeli)

²³ u mwene uwamu Doli (mulubazu lwanyanja) uwa bamo aba mu Goyimu nuwa mu Galileya

²⁴ sona nuwa mu Tiliza. Abamwene bosi poka bakabapo 31.