Yoshwa 11 - IBAYIBOLO 2024

U Yoshwa akumupota u Yakini

¹ Bo u Yabini u mwene uwamu Hazoli, ivwa zinizi, akamutumila amazyu u Yobabu, u mwene uwamu Madoni nu mwene uwamu Shimuloni nu mwene uwamu Akishafu,

² sona na bamwene aba muchisu icha mumaghamba kuchigaba ichakumitu ku Alaba kuntende ukwa Nyanja iya Galileya, na mwikombe kubwinjililo bwizuba, sona na kumaghamba agha Nafoti Doli,

³ mupaka kuba Kenani abakubufumilo na kubwinjililo bwizuba na kuba Amoli naba Hiti naba Pelezi sona naba Yebusi muchisu icha mumaghamba na kuba Hivi muntende mwighamba ilya Helimoni muchigaba icha Mizipa.

⁴ Abamwene banaba bakiza poka na basilikali babo, babo bakaba ni falasi, sona ni ngolo inyinji nkani ngati mumo ghubeleye umusesenga uwa mulubazu lwanyanja.

⁵ Abamwene bosi banaba bakapanga akabukatila koka aka basilikali nukuzenga ivisakasa vyabo pamizi agha Melomu ukuti balwe ubwite naba Izilayeli.

⁶ U Mwene akamubuzya u Yoshwa akati, “Utakabanyilaye, pachifukwa ichakuti pakabalilo kanaka indabi nkwiza pakubabika bosi munyobe izya ba Izilayeli ukuti babaghoghe. Muzidumule inkole izya vinama ifalasi zyabo, sona zyope ingolo zyabo muzyoche.”

⁷ Po u Yoshwa poka na basilikali bache bakalwa nabo ubwite pamizi agha Melomu umwakubachenusya bulo,

⁸ pachifukwa ichakuti u Mwene akababika munyobe izya ba Izilayeli. Bakabapota nubachimbizizya ku Sidoni Umukulu naku Misilefoti Mayimu sona kwikombe ilya Mizipa kubufumilo bwizuba, umwakuti patakabapo nayumoyumo umuntu uwakupona.

⁹ U Yoshwa akababombela zizyo u Mwene akamulamula. Akazidumula inkole izya vinama izya falasi zyabo, nukuzyocha ingolo zyabo.

¹⁰ Pisinda pache u Yoshwa akanyokela nukukafyula akaya akakulu nkani aka Hazoli nukumughogha u mwene uwa mukaya kala. Akaya aka Hazoli kakaba ko kaya akamaka nkani ukubuchila ubumwene bosi bula.

¹¹ Umuntu wesi yuyo akikalagha mutwaya tunutu akaghoghiwa, ukusita ukuchilekapo nachimochimo ichintu icha bumi. Po pabumalilo akakocha akaya aka Hazoli.

¹² U Yoshwa akatufyula utwaya tosi tunutu, sona akabaghogha abamwene bosi ukuyana namumo u Mozesi umubombi uwa Mwene akamulamulila.

¹³ Aba Izilayeli batakocha utwaya tosi tuto tukazengiwa pa visami, loli kene akaya aka Hazoli, kako u Yoshwa akakocha.

¹⁴ Aba Izilayeli bakafyula ukatundu wesi poka ni vitekwa ivya mutwaya tulatula. Loli bakabaghogha abantu bosi, ukusita ukumulekapo nayumoyumo umuntu umumi.

¹⁵ U Mwene akamulamula u Mozesi umubombi wache, po wepe u Mozesi akamulamula u Yoshwa ukuti abombe bunubu. U Yoshwa akabomba zyosi zizyo u Mwene akamulamula u Mozesi.

Ichisu chicho u Yoshwa akachifyula

¹⁶ Po u Yoshwa akachifyula ichisu chosi icha mumaghamba ni chisu chosi icha Negebu ni chigaba chosi icha Gosheni ni kombe ilya kubwinjililo bwizuba ni chisu icha Alaba ni chisu icha mumaghamba icha Izilayeli poka ni kombe lyache,

¹⁷ ukwandila kwighamba ilya Halaki, kulubazu ulwa ighamba ilya Seyili mupaka ku Baala Gadi mwikombe ilya Lebanoni, muntende mwighamba ilya Helimoni. Akabapota abamwene bosi banaba nukubaghogha bosi.

¹⁸ U Yoshwa akalwa nabo ubwite abamwene banaba akabalilo akatali nkani.

¹⁹ Katakabapo nakamokamo akaya kako kakafinga ulufingo ulwa mutende naba Izilayeli, loli bene aba Hivi babo bakikalagha mu Gibeyoni, babo bakalemiwa kubwite.

²⁰ Pakuti akaba we Mwene yuyo akaghapela amoyo ghabo pakuba makafu nkani, umwakuti balwe ubwite naba Izilayeli. U Mwene akabomba bunubu ukuti abazimizye bosi umwakusita kubapelela ichisa, ukuyana namumo u Mwene akamulamulila u Mozesi.

²¹ Pakabalilo kalakala u Yoshwa akabuka pakubanangannya aba Anaki ukwandila ko kuchisu icha mumaghamba icha Hebuloni naku Debili naku Anabu, ukwandila ko kuchisu chosi icha mumaghamba icha Yuda, ni chisu chosi icha mumaghamba icha Izilayeli. U Yoshwa akabanangannya bosi, poka nutwaya twabo tosi.

²² Patakabapo nayumoyumo umu Anaki yuyo akasyala mumi mu Izilayeli. Loli abanandi bulo mu Gaza na mu Gati sona na mu Ashidodi.

²³ Po bunubu u Yoshwa akachifyula ichisu chosi chila, ukuyana namumo u Mwene akamulamulila u Mozesi nukubapa aba Izilayeli ukuti yibanje mpyana iyabo ni yabo, ukuyana nuluko lwabo. Po pabumalilo abantu bakatuzya pakulwa ubwite.