Yoshwa 10 - IBAYIBOLO 2024

Aba Izilayeli bakubapota aba Amoli

¹ Pakabalilo kanaka u Adonizedeki, u mwene wamu Yelusalemu akivwa ukuti u Yoshwa akakafyula akaya aka Ayi nukukanangannya ukuyana namumo akakananganikizya akaya aka Yeliko, poka nu mwene wache. Akivwa sona ukuti aba Gibeyoni bakafingana ulufingo ulwa mutende naba Izilayeli, sona nukuti bakikalagha pakasi papabo.

² U Adonizedeki poka na bantu bache bakaba nubogha nkani, pachifukwa ichakuti akaya aka Gibeyoni kakaba akaya kabo akakulu nkani, ukuyana namumo tubeleye utwaya utwa bumwene. Akaya kanaka kakaba kaya akakulu nkani ukukachila akaya aka Ayi, sona bope na basilikali bache bakaba bajivu nkani pakulwa ubwite.

³ Po u Adonizedeki u mwene uwamu Yelusalemu akamutumila intumi u Hohamu u mwene uwamu Hebuloni nu Pilamu u mwene uwamu Yalimuti nu Yafiya u mwene uwamu Lakishi, sona nu Debili u mwene uwamu Egiloni. Akati,

⁴ “Zagha munyavwe pakulwa ubwite nakaya aka Gibeyoni pachifukwa ichakuti abantu bache bafinganite ulufingo ulwa mutende nu Yoshwa poka naba Izilayeli.”

⁵ Po abamwene fayivi aba ba Amoli bala, kokuti u mwene wamu Yelusalemu nuwa mu Hebuloni nuwa mu Yalimuti nu mwene uwamu Lakishi sona nu mwene uwamu Egiloni bakapanga akabukatila koka aka basilikali. Abamwene bala bakababungannya poka abasilikali babo, po bakakazyungulila akaya aka Gibeyoni nukulwa nako ubwite.

⁶ Aba Gibeyoni bakamutumila amazyu u Yoshwa bo ali pa Giligali ukuti, “Utakatuleke twebene twe babombi bako. Losi ulu zagha utupoke! Pakuti abamwene aba ba Amoli babo bakwikala muchisu icha mumaghamba bapanga akabukatila koka aka basilikali pakulwa naswe ubwite.”

⁷ U Yoshwa poka na basilikali bache abajivu nkani bakaba bachili bali mu Giligali, po bakabuka pakulwa ubwite.

⁸ U Mwene akamubuzya u Yoshwa akati, “Utakabanyilaye abantu banaba, pakuti nababika munyobe zyako. Atalipo nayumoyumo umuntu uwakuti angakupota.”

⁹ U Yoshwa poka na basilikali bache bakafuma mu Giligali, nukwenda busiku bosi. Po akalwa nabo ubwite umwakubachenusya bulo.

¹⁰ U Mwene akabavulungannya nkani abalwani, bo babennya bulo abasilikali aba Izilayeli, babo bakabapotela zila pa Gibeyoni. Aba Izilayeli bakabachimbizya ukwika pighamba ilya Beti Holoni nukubaghogha zila yosi mupaka ku Azeka naku Makeda.

¹¹ Bo bakubachimbila aba Izilayeli ukwika pighamba ilya Beti Holoni mupaka ku Azeka, u Mwene akabawisizya ivula iya mabwe amakulu nkani, umwakuti abantu abinji nkani bakafwa ni vula iya mabwe yila, ukubachila babo bakaghoghiwa naba Izilayeli.

¹² Pisiku lilyo u Mwene akababika aba Amoli munyobe izya ba Izilayeli, u Yoshwa akanena nu Mwene pamaso paba Izilayeli akati, “Wee lizuba, wime bulo pa Gibeyoni. Wee mwezi, wime bulo po pikombe ilya Ayaloni.”

¹³ Po izuba likima bulabula, sona ghope nu mwezi ghutakenda mupaka aba Izilayeli bakabapota abalwani babo bosi. Zinizi zisimbiwe Mwibuku ilya Jashala. Izuba likima bulo, sona likakaba pakwinjila pisiku lilalila.

¹⁴ Ukwandila ko kubwandilo litaliko nalimolimo isiku ilyakuyana ni siku linili ilyakuti u Mwene amwivwile umuntu. Naloli u Mwene akabalwilagha ubwite aba Izilayeli.

¹⁵ Bo ubwite bwamala u Yoshwa na basilikali bache, bakanyokela kuvisakasa vyabo mu Giligali.

U Yoshwa akubaghogha abamwene fayivi aba ba Amoli

¹⁶ Loli abamwene fayivi aba ba Amoli bala bakachimbila nukuvwama kumpako pa Makeda.

¹⁷ U Yoshwa akabuziwa ukuti abamwene fayivi bala baghiwa mumpako pa Makeda.

¹⁸ Po akati, “Mubunguluzizyepo amabwe amakulu nkani pamulyango uwa mpako, sona musalepo abantu bamo ukuti balindililaye.

¹⁹ Loli mwe banji mwendelele pakubachimbizya abalwani binyu, sona mubaghoghe bo muli kwisinda. Mutakabitikizye ukuti banyokele mutwaya twabo utukulu nkani, pachifukwa ichakuti u Mwene u Chala winyu ababikite munyobe zyinyu.”

²⁰ Po u Yoshwa poka naba Izilayeli bakabaghogha abantu bosi bala. Loli bantu banandi bulo babo bakachimbilila mumalinga agha twaya pakuvwama, batakaghoghiwa.

²¹ Abasilikali bosi aba Yoshwa bakanyokela akiza kuvisakasa pa Makeda. Po patakabapo nayumoyumo yuyo akachela pakubanena akabibi aba Izilayeli.

²² U Yoshwa akati, “Ighula umulyango uwa mpako, sona abamwene fayivi bala mwize nabo kukwane.”

²³ Po abasilikali bala bakabefyamo mumpako mula abamwene fayivi bala kokuti u mwene wamu Yelusalemu nuwa mu Hebuloni nuwa mu Yalimuti nuwa mu Lakishi sona nuwa mu Egiloni.

²⁴ Bo biza na bamwene bala kwa Yoshwa u Yoshwa akabitizya poka aba Izilayeli bosi. Akabalamula abasongo aba basilikali babo bakaba nawe akati, “Palamila, kanya pasingo izya bamwene banaba.” Po bakapalamila nukubakanya pasingo abamwene bala.

²⁵ Po u Yoshwa akababuzya akati, “Mutakanyilaye pamo ukuwa amaka. Mubanje nu lweke, sona mujimbaye nkani. Pakuti izi zyo zizyo u Mwene akwiza pakubabombela abalwani binyu bosi babo mukubuka pakulwa nabo ubwite.”

²⁶ Palapala u Yoshwa akabaghogha abamwene fayivi bala. Akayipayika imivimba yabo pamakwi, nukuyileka palapala mupaka pachamabwila.

²⁷ Bo izuba likwinjila u Yoshwa akalamula ukuti imivimba yila yisiwepo pamakwi pala nukuyisumbila mumpako mumo bakavwamaghamo. Pamulyango uwa mpako bakabunguluzizyapo amabwe amakulu nkani, ghagho ghachili ghalipo nilelo.

²⁸ Pisiku lilalila, u Yoshwa akakafyula akaya akakulu nkani aka Makeda nukubaghogha abantu bosi babo bakaba mulamula, umwakuti patakabapo nayumo umuntu uwakupona. Akamubombela u mwene wamu Makeda ukuyana namumo akamubombela u mwene wamu Yeliko.

²⁹ Pisinda pache u Yoshwa poka na basilikali bache bakepamo mu Makeda nukubuka ku Libina pakulwa ubwite.

³⁰ U Mwene akakabika akaya akakulu nkani kanaka, poka nu mwene wache munyobe izya ba Izilayeli. U Yoshwa akabaghogha abantu bosi babo bakaba mulamula nukukanangannya akaya kosi, umwakuti patakabapo nayumoyumo umuntu uwakupona, ukuyana namumo akamubombela u mwene wamu Yeliko.

³¹ Po u Yoshwa poka na basilikali bache bakepamo mu Libina nukubuka ku Lakishi. Bakakazyungulila akaya kala nukulwa nako ubwite.

³² U Mwene akabapa aba Izilayeli amaka aghakukapotela akaya akakulu nkani aka Lakishi pisiku ilyabubili ilya kulwila ubwite. Bakakanangannya akaya kosi akakulu nkani kala nukubaghogha abantu bosi babo bakaba mulamula, umwakuti patakabapo nayumoyumo umuntu uwakupona, ukuyana namumo bakabombela nakaya akakulu nkani aka Libina.

³³ Pakabalilo kalakala u Holamu u mwene wamu Gezeli akiza ukuti akavwe akaya aka Lakishi, loli u Yoshwa akamupota poka na basilikali bache, umwakuti patakabapo nayumoyumo umuntu uwakupona.

³⁴ Pisinda pache u Yoshwa poka na basilikali bache bakapululila mupaka ku Egiloni. Bakakazyungulila akaya aka Egiloni nukulwa nako ubwite

³⁵ Bakakafyula akaya kala pisiku lilalila nukubaghogha abantu bosi babo bakaba mulamula, ukuyana namumo bakabombela nakaya aka Lakishi.

³⁶ Po u Yoshwa poka na basilikali bache bakepako ku Egiloni nukubuka ku Hebuloni pakulwa ubwite nakaya kala.

³⁷ Bakafyula akaya akakulu nkani kala nukumughogha u mwene, poka na bantu bache bosi. Bakatunangannya sona nutwaya tosi utupalamani poka na bantu bosi babo bakaba mulamula, umwakuti patakabapo nayumoyumo umuntu uwakupona. Bakakanangannya akaya aka Hebuloni nukubaghogha abantu bosi babo bakaba mulamula, ukuyana namumo bakabombela nakaya aka Egiloni.

³⁸ Po u Yoshwa poka na basilikali bache bakabuka nukulwa ubwite nakaya aka Debili.

³⁹ Bakakafyula akaya kala poka nutwaya tosi utupalamani nukumughogha u mwene wache. Bakakanangannya akaya kosi aka Debili, umwakuti patakabapo nayumoyumo umuntu uwakupona. Bakakanangannya akaya kala poka na bantu bosi babo bakaba mulamula, ukuyana namumo bakabombela nakaya aka Hebuloni, sona naka Libina.

⁴⁰ Po u Yoshwa akafyula ichigaba chosi chila, ukongannyapo ichisu icha mumaghamba, na muntende mumaghamba kubwinjililo bwizuba, na mwikombe nukubapota abamwene bosi babo bakaba mulamula, umwakuti patakabapo nayumoyumo umuntu uwakupona. Akachinangannya chosi icha bumi ukuyana namumo u Mwene u Chala uwa ba Izilayeli akalamulila.

⁴¹ U Yoshwa akabapota abalwani bosi ukwandila ku Kadeshi Balineya mupaka ku Gaza, sona ukwandila ko kuchigaba chosi icha Gosheni mupaka ku Gibeyoni.

⁴² U Yoshwa akabapota abamwene banaba poka ni vyisu vyabo pakabalilo koka, pachifukwa ichakuti u Mwene u Chala uwa ba Izilayeli akabalwilagha ubwite aba Izilayeli.

⁴³ Bo bamala pakulwa ubwite, u Yoshwa poka na basilikali bache bakanyokela kuvisakasa vyabo mu Giligali.