Yoshwa 1 - IBAYIBOLO 2024

U Mwene akumulamula u Yoshwa Pakumupota u Kenani

¹ Bo u Mozesi, umubombi uwa Mwene, afwa, u Mwene akanena nu Yoshwa umwana uwa Nuni, yuyo akaba mwavwilizi uwa Mozesi akati,

² “U Mozesi umubombi wane afuye. Losi ulu awe poka naba Izilayeli bosi, mwiyannye ukuti muloboke ulusoko ulwa Yolodani nukwinjila muchisu chicho nkubapa.

³ Nkwiza pakubapa ubuzilo bosi bubo mwakanyapo ukuyana namumo nkamulayizizya u Mozesi.

⁴ Impaka zyinyu zikwiza pakwandila munkolongo kuntende mupaka ku Lebanoni kumitu, ukwandila ko kulusoko ulukulu ulwa Yufuleti kubufumilo bwizuba, kokuti ichisu chosi icha ba Hiti, mupaka ku Nyanja iya Medeteleniya kubwinjililo bwizuba.

⁵ Atalipo nayumoyumo yuyo akwiza pakukupota mubumi bwako bosi. Ane nkwiza pakuba nawe akabalilo kosi ukuyana namumo nkabela nu Mozesi. Ntakwiza pakukukana nalumo pamo pakukuleka wemwene.

⁶ “Ubanje nu lweke, sona ujimbaye, pakuti wewe ukwiza pakubalongolela abantu banaba pakuchifyula ichisu chicho nkabalayizya abanyenya babo.

⁷ Ubanje bulo nu lweke, sona ujimbaye. Wenelezye nkani ukuti ukughakonka amalamulo ghosi ghagho umubombi wane u Mozesi akakupa. Utakachele pakupaghukila kundilo pamo kumongo, umwakuti vyosi vikwendelaye akiza kosi kuko ukubuka.

⁸ Wenelezye nkani ukuti Ibuku ilya Malamulo ili lyo lilindaye pamulomo wako. Ulibelengaye pamusanya na pabusiku ukuti ughakonke amalamulo ghosi mwibuku linili umwakuti vyosi vikwendelaye akiza.

⁹ Ukumbuke ukuti nkakulamula ukuti ubanje nulweke, sona ujimbaye nkani. Utakanyilaye pamo ukuwa amaka, pakuti ane ne Mwene u Chala wako, nkwiza pakuba nawe kosi kuko ukubuka.”

U Yoshwa akubalamula abantu

¹⁰ Po u Yoshwa akabalamula abalongozi aba bantu akati,

¹¹ “Bukagha muvisakasa nukubalamula abantu ukuti, ‘Yannya ukatundu ni mpayo! Bo ghachila amasiku matatu mukwiza pakuloboka ulusoko ulwa Yolodani pakwikala muchisu, chicho u Mwene u Chala winyu akubapa ukuti chibanje chinyu ni chinyu.’ ”

¹² Po u Yoshwa akabalamula abaluko ulwa Lubeni nu Gadi sona ni chigaba chimo icha luko ulwa Manase ukuti,

¹³ “Mughakumbuke amalamulo ghagho u Mozesi, umubombi uwa Mwene akababuzya aghakuti, ‘U Mwene u Chala winyu akwiza pakubapa ichisu chinichi ukuti chibanje chinyu ni chinyu.’

¹⁴ Po abachi binyu na bana binyu sona ni vitekwa vyinyu visyalikile muchisu chicho u Mozesi akabapa kubufumilo bwizuba ubwa Yolodani, loli abasilikali banyamule ivilwilo nukuloboka pantazi paba Izilayeli abamwinyu pakubavwa

¹⁵ mupaka bachifyule ichisu chicho u Mwene u Chala winyu akubapa. Po pisinda pache munganyokela pakwikala muchisu chinyu, chicho u Mozesi umubombi uwa Mwene akabapa kubufumilo bwizuba ubwa lusoko ulwa Yolodani.”

¹⁶ Po bakamwamula u Yoshwa bakati, “Tukwiza pakubomba zyosi zizyo watulamula, sona tukwiza pakubuka kosi kuko ukututuma.

¹⁷ Tukwiza pakukwivwila ukuyana namumo tukamwivwililagha u Mozesi, sona u Mwene u Chala wako abanje nawe, ukuyana namumo akabela nu Mozesi.

¹⁸ Umuntu wesi yuyo akukusambukila, sona nanti atakwivwila zizyo ukumulamula, aghoghiwanje. Awe ubanje bulo nu lweke, sona ujimbaye nkani.”