Yona 4 - IBAYIBOLO 2024

Ubukalale ubwa Yona ni chisa icha Chala

¹ Pachifukwa chinichi u Yona atakahoboka sona akakalala nkani.

² Po akiputa kwa Mwene akati, “Wee Mwene izi zyo zizyo nkanenagha bo inchili indikukwitu. Ichi cho chifukwa nkachimbilila lubilolubilo kuchisu icha Talishishi. Nkazimanya ukuti we Chala uwa lughano sona uwachisa, nukuti akabalilo kosi we mufisalyoyo nu wachililizi sona wiyanizye pakuhobokela imbibi akabalilo kosi.

³ Wee Mwene, nalamba ungoghe bulo, pakuti chizapo ukuti infwe nukuchila ukuti imbanje ne mumi.”

⁴ Loli u Mwene akamwamula akati, “Nkimba wabomba akiza pakukalala bunubu?”

⁵ Po u Yona akepamo mukaya kala kubufumilo bwizuba ubwa kaya akakulu kala nukwikala pasi. Akizengela ichisakasa nukwikala mukazundila, akalindililagha ukuti ennye chicho chikwiza pakukawila akaya aka Ninive.

⁶ Po u Mwene akayannya ikwi ilyakumupa u Yona akazundila nukwefya intamyo zyache, po u Yona akahoboka nkani nikwi lilalila.

⁷ Loli indabi yache, kubuche u Mwene, akatuma ichibunguzi, chikalya ikwi umwakuti likumila.

⁸ Bo izuba lyakwela u Chala akamutumila u Yona impepo iyakocha nkani iyakubufumilo bwizuba. Po izuba lila likamocha u Yona pamutu mupaka akazilika. Po akiputa akati, “Pakuti chizapo ukuti infwe bulo ukuchila ukuti imbanje ne bumi,”

⁹ Loli u Chala akamulalusya akati, “Nkimba wabomba akiza pakukalala pachifukwa ichakuti ikwi lila likumila?” U Yona akamula akati, “Eee, nabomba akiza pakukalala. Ukukalala kwane kwakufwa nako.”

¹⁰ U Mwene akamubuzya akati, “Awe waba ni chitima nikwi lila, loli utakatamiwapo pakulibyala. Likamela ubusiku boka nukufwa ubusiku ubunji.

¹¹ Po zingaba bulibuli nane, nkimba intangaba ni chitima nakaya akakulu nkani aka Ninive, mumo muli abantu abakuchila 120,000, babo batamenye pakulesannya ichintu ichiza ni chibibi, sona mumo vilimo ivitekwa ivyinji nkani?”