Yona 3 - IBAYIBOLO 2024

U Yona akubomba zizyo u Mwene akumubuzya

¹ U Mwene akamubuzya sona u Yona akati,

² “Bukagha ku Ninive, kukaya akakulu nkani kala, pakulumbilila amazyu ghagho nkukubuzya.”

³ Po u Yona akamwivwila u Mwene, sona akanyamuka nukubuka ku Ninive, kuko ubutali bwache bukaba bwakuyana nu bulendo ubwa masiku matatu.

⁴ U Yona akenda ubulendo ubwa isiku lyoka nukufika mukaya kala. Akanda pakulumbilila ukuti, “Bo ghachilapo amasiku 40, u Ninive akwiza pakumongoliwa!”

⁵ Abantu aba mukaya aka Ninive bakaghasubila amazyu agha Chala. Po bakadumula ukuti umuntu wesi ukwandila usongo mupaka umwana umunandi atuzye pakulya nukuvwala amasaka pakulanjizya ukuti bapinduka.

⁶ Bo u mwene uwa Ninive ivwa zinizi akanyamuka pachitengo chache icha bumwene, akavula inkazo yache. Akavwala amasaka nukwikala pitoyi.

⁷ Po u mwene poka na makambala ghache bakabapa abantu aba mu Ninive ululaghilo ulwakuti, “Patakabepo nayumo umuntu uwakulya, pamo ichinyamana pamo imidimo pamo uwakung'wela ichakung'wela.

⁸ Umuntu wesi avwale amasaka, vyope ivinyamana vivwale amasaka nukumwiputa nkani u Chala. Umuntu wesi ayileke inkalo yache imbibi sona ni mbombo zyabo imbibi.

⁹ Nkimba wewenu angazimanya ukuti pamo u Chala angatozolako ubukali bwache ubwakoghofya, umwakuti tutakazimile?”

¹⁰ Bo u Chala ennya ukuti abantu bala bayileka inkalo yabo imbibi, akabapelela ichisa. Po atakabafunda nu lufundo ukuyana namumo akalondelagha.