Yona 2 - IBAYIBOLO 2024

Ulwiputo ulwa Yona

¹ Bo u Yona ali mukasi muswi akiputa kwa Mwene u Chala wache akati,

² “Wee Mwene bo indi muntamyo inkulu nkani nkakwitizya, po ukanyamula. Bo indi mukasi muchisu icha bantu abafwe, nkakulilila ukuti unyivwe, po ukanyivwa.

³ Ukansumbila munyanja inyibizu nkani, mumo amizi aminji nkani ghakanzyungulila sona amayigha aghamaka ghakanyibizya pasi nkani.

⁴ Po nkati, ‘Wee Mwene nataghiwa nukwepapo papako, sona ntakwiza pakuyennya Inyumba yako izelu?’

⁵ Amizi ghakankupikila nukunfina kusingo; inyanja yikaghukupikila umutu wane. Usankwa akannyembetelela kumutu

⁶ Nkikila mupaka muntende umwa maghamba, kuchisu chicho inyighi zyighaliliwe bwila na bwila. Loli awe, wee Mwene u Chala wane, ukanyefyamo muchisu icha bantu abafwe, po ane ne mumi.

⁷ Bo nennya ukuti nkufwa nkakukumbuka awe, wee Mwene, po mu Nyumba yako izelu ukivwa ulwiputo lwane.

⁸ Abantu babo bakwiputa ivifwani, balekite pakubika ulusubilo lwabo papako.

⁹ Loli ane nkwiza pakukwimbila inyimbo izya mapalo, nkwiza pakubika ichakwiyipa kukwako, sona nkwiza pakuvibomba ivintu vivyo nkafingana nawe. Pakuti ubupoki bwane bukufuma kwa Mwene.”

¹⁰ Po u Mwene akayilamula iswi yila ukuti yimutapikile u Yona pisila ilya nyanja.