Yona 1 - IBAYIBOLO 2024

U Yona akutumiwa ku Ninive

¹ Isiku limo u Mwene akamubuzya u Yona umwana uwa Amitayi akati,

² “Bukagha kukaya akakulu nkani aka Ninive nukulumbilila amazyu sona nukubasusya pachifukwa ichakuti nennya ububibi bwabo.”

³ Loli u Yona akamuchimbila u Mwene nukubuka kuchisu icha Talishishi. Akabuka ku Yopa kuko akabwagha ubwato ubukulu nkani bukubuka ku Talishishi. Akalipila indalama izya kwendela ukuti abuke nabo ku Talishishi, umwakuti amuchimbile u Mwene.

⁴ Loli u Mwene akatuma impepo iya maka panyanja, sona amayigha aghakoghofya ghakavunduka umwakuti ubwato bula bukaba papipi pakunanganika.

⁵ Abendezya ubwato bakanyila nkani, po umuntu wesi akanda pakumulilila uchala wache. Bakasumbila ukatundu wabo munyanja mula umwakuti ubwato bwabo bupepuke. Pakabalilo kosi kanaka u Yona akikila pasi pa bwato mukasi, kuko akalambalala nukughona utulo utwakufwa nato.

⁶ Usongo uwa bwato yula akikila kuko kukaba u Yona, nukumulalusya ukuti, “Nkimba choni chicho ukughona utulo utwakufwa nato? Nyamuka, iputa kwa chala wako! Lumo angatupelela ichisa nukutuleka twe bumi.”

⁷ Po abendezi bakanenezannya benebene bakati, “Zagha tubombe amayele umwakuti tumwaghe umuntu yuyo atupelela umukosi ghunughu.” Bakapanga amayele ghala, po bakamwagha u Yona.

⁸ Bakamulalusya u Yona bakati, “Nkimba choni chicho intamyo zinizi zyatuwila? Nkimba ukubomba mbombo yoni? Nkimba wafuma kwiyi? Fwandi wafuma chisu choni?”

⁹ U Yona akamula akati, “Ane ne mu Hebeli sona nkumwiputa u Mwene u Chala uwakumwanya, yuyo akapela inyanja ni chisu ichapasi.”

¹⁰ Po abendezya ubwato bala bakanyila nkani, bakamulalusya bakati, “Wabomba choni?” Bakanena bunubu pachifukwa ichakuti bakazimanya ukuti akamuchimbilagha u Mwene, pakuti akababuzya kale.

¹¹ Impepo panyanja pala yikakulilaghakulilagha, po bakamulalusya bakati, “Nkimba tukubombele ichoni ukuti inyanja yibe myee?”

¹² U Yona akamula akati, “Munsumbile munyanja, po inyanja yikaba myee. Imenye ukuti chifukwa chane pakuti amayigha agha ghabawile.”

¹³ Abendezya ubwato bala bakayezya nkani pakuvighila ubwato bula kwisila, loli bakapotwa, pakuti impepo yikakukilaghakukilagha.

¹⁴ Po bakamwiputa u Mwene, bakati, “Wee Mwene, twalamba utakatwitikizye ukuti tufwe pachifukwa icha bumi ubwa muntu uyu. Utakatupe inongwa pachifukwa icha bufwe ubwa umuntu umusita nongwa.”

¹⁵ Po abendezya ubwato bala bakamusumbila u Yona munyanja mula, umwalubilolubilo inyanja yikaba bulo myee.

¹⁶ Abendezya ubwato bala bakamunyila nkani u Mwene, po bakabika ivyakwiyipa kwa Mwene nukulapa ichilapo ukuti bakwiza pakumubombelagha u Mwene.

¹⁷ U Mwene akayannya iswi inkulu yila ukuti yimumile u Yona. Po u Yona akaba muswi yila amasiku matatu umusanya nu busiku.