Yohani 7 - IBAYIBOLO 2024

U Yesu na bawamwabo

¹ Pisinda pache u Yesu akendendekagha muchigaba icha Galileya. Atakalondagha ukwendakwenda muchigaba icha Yudeya pakuti abalaghili aba Chiyuda bakalondagha pakumughogha.

² Akabalilo aka Ulusekelo ulwa Visakasa ulwa Chiyuda lukaba papipi.

³ Po abawamwabo aba Yesu bakanena nawe bakati, “Fumako kuno ubukaye muchigaba icha Yudeya, umwakuti abantu babo bakukukonka bope bennyanje zizyo ukubomba.

⁴ Nayumo umuntu yuyo akufisa vivyo akubomba, nanti akulonda ukuti amanyikwe pabuzelu. Pakuti ukubomba ivintu vinivi, ubaghiye wilanjizye wemwene kuchisu chosi ichapasi.”

⁵ (Bope bulo na bawamwabo batakamusubila)

⁶ U Yesu akanena nabo akati, “Akabalilo kane akiza kachili katakwanite, loli kukwinyu akabalilo kosi kiza bulo.

⁷ Abantu aba muchisu ichapasi batangababenga, loli bambengite pakuti nkubasimikizya ukuti imbombo zyabo mbibi.

⁸ Amwe bukagha ku lusekelo. Ane intakubukako pakuti akabalilo kane akiza kachili katakwanite.”

⁹ Bo ababuzya zinizi, po akasyala mwene muchigaba icha Galileya.

U Yesu palusekelo ulwa Visakasa

¹⁰ Bo abawamwabo babuka ku lusekelo kula, po wepe u Yesu akabuka. Atakabuka umwakubonekela, loli mubufisamu.

¹¹ Abalaghili aba Chiyuda bakamulondagha palusekelo lula. Bakalalusya bakati, “Nkimba umwene ali ko kwiyi?”

¹² Kukabako ukuteketelana ukukulu nizya Yesu muchilundilo mulamula. Abantu bamo bakatinji, “Muntu mwiza.” Abanji bakatinji, “Awe, akubasovya bulo abantu.”

¹³ Loli atakabapo nayumo umuntu yuyo akamunenagha u Yesu pabuzelu pakuti bakabanyilagha abalaghili aba Chiyuda.

¹⁴ Bo ulusekelo luli pakasikasi, u Yesu akinjila mu Nyumba iya Chala nukwanda pakumanyisya.

¹⁵ Abalaghili aba Chiyuda bakaswigha nkani nukuti, “Nkimba umuntu yunuyu akuvimanya bulibuli ivintu vyosi vinivi pakuti umwene ate mumanyi?”

¹⁶ U Yesu akamula akati, “Ivimanyisyo vivyo nkumanyisya vite vyane ni vyane, loli vikufuma kwa yuyo akantuma.

¹⁷ Umuntu wesi yuyo akulonda pakubomba vivyo u Chala akulonda, akwiza pakumanya nanti vivyo nkumanyisya vifumite kwa Chala pamo nkunena nu bulaghili ubwane nu bwane.

¹⁸ Umuntu yuyo akunena nu bulaghili ubwache nu bwache, akwilondela mwene ubuchindamu bwache. Loli umuntu yuyo akumulondela ubuchindamu yuyo akantuma, wanaloli, po ubuzimbuli butalimo mumwache.

¹⁹ U Mozesi akabapa Indaghilo. Nkimba mute momumo? Loli nayumo umuntu mumwinyu yuyo akukonka Indaghilo. Nkimba choni chicho mukulonda pakungogha?”

²⁰ Po ichilundilo chikamula chikati, “Uli nu muzimu umubibi! Nkimba wewenu akulonda pakukughogha?”

²¹ U Yesu akabamula akati, “Nkabomba ichika choka, po mwebosi mukaswigha.

²² U Mozesi akabalamula pakusilimula abana binyu abanavuli, (napapo atakaba we Mozesi yuyo akandizya, loli abanyenya binyu bo babo bakandizya), po amwe mukusilimula abana binyu abanavuli Pisiku Ilyakutuzya.

²³ Nanti umwanavuli akusilimuliwa Pisiku Ilyakutuzya, kokuti Indaghilo izya Mozesi zileke pakunanganika, po nkimba mukunkalalila pachifukwa ichakuti nkamupozya umuntu Pisiku Ilyakutuzya?

²⁴ Mutakalongaye pakwennya icheni icha muntu, loli mulongelaye mubwanaloli.”

Nkimba u Yesu we Kilisitu?

²⁵ Abantu bamo aba mu Yelusalemu bakanena bakati, “Nkimba uyu ate weyuyo abalaghili aba Chiyuda bakulonda pakumughogha?

²⁶ Ennya ilelo akunena pabuzelu bulo, loli abene batakunenapo nachimo. Nkimba zingaba izyakuti abalaghili bazimenye ukuti we Kilisitu?

²⁷ Twebosi tumenyeko kuko umuntu uyu akufuma. Loli bo u Kilisitu akwiza, nayumo umuntu yuyo akwiza pakumanya kuko akufuma.”

²⁸ Bo u Yesu akumanyisya mu Nyumba iya Chala, akanena na mazyu agha pamwanya akati, “Naloli mumenye, sona mumenyeko na kuko infumite. Ane intizite nu bulaghili ubwane nu bwane. Loli yuyo akantuma wanaloli. Amwe mutamumenye

²⁹ loli imumenye pakuti nkafuma kukwache, sona weyuyo akantuma.”

³⁰ Po bakalondagha pakumulema, loli atakabapo nayumo umuntu uwakumupalamasya pakuti akabalilo kache kakaba kachili katakwanite.

³¹ Loli abantu abinji muchilundilo chila bakamusubila nukuti, “Bo u Kilisitu iza, nkimba akwiza pakubomba ivyika ukuchila vivyo uyu akubomba?”

Abasilikali bakubuka pakumulema u Yesu

³² Aba Falisayi bakivwa zizyo ichilundilo icha bantu chikuteketelana nizya Yesu, po abene na baputi abasongo bakatuma abasilikali bamo pakumulema.

³³ U Yesu akati, “Nkwiza pakuba namwe pakabalilo akapimpa bulo, po nkwiza pakubuka kwa yuyo akantuma.

³⁴ Mukwiza pakundonda, loli mutakwiza pakunyagha pakuti kuko nkubuka, mutangafikako.”

³⁵ Abalaghili aba Chiyuda bakalalusannya benebene bakati, “Nkimba umuntu yunuyu akulonda pakubuka kwiyi kuko tutangamwagha? Nkimba akulonda pakubuka muvyisu ivya ba Giliki kuko abantu bitu bakwikala nukubamanyisya aba Giliki?

³⁶ Akunena ukuti, ‘Mukwiza pakundonda, loli mutakwiza pakunyagha,’ sona ‘Kuko nkubuka, mutangafikako.’ Nkimba akung'anamula ichoni?”

Isoko izya mizi amapela ubumi

³⁷ Pisiku ilyabumalilo ilya lusekelo, lilyo likaba ilya pamwanya nkani, u Yesu akimilila nukunena na mazyu agha pamwanya ukuti, “Umuntu wesi yuyo ali ni nyota ize kukwane nukung'wela.

³⁸ Pakuti Amasimbo ghakuti, ‘Umuntu wesi yuyo akunsubila, isoko izya mizi amapela ubumi zikwiza pakwendagha mumwache.’ ”

³⁹ U Yesu akanenagha nizya Muzimu Umuzelu, yuyo abantu babo bakamusubila bakizagha pakupokela. Pakabalilo kalakala u Muzimu Umuzelu akaba achili atapeghiwe pakuti u Yesu akaba achili pakupokela ubuchindamu.

Abantu bagabinkana benebene

⁴⁰ Bo ichilundilo icha bantu chivwa amazyu ghanagha, bakanena bakati, “Naloli umuntu yunuyu mulaghuzi.”

⁴¹ Abanji bakati, “Uyu we Kilisitu.” Loli abamwabo bakati, “Umupoki yula atangafuma muchigaba icha Galileya!

⁴² Amasimbo ghakuti u Kilisitu akwiza pakuba luko ulwa Mwene u Devedi nukuti akwiza pakupapiwa mu Betelehemu mukaya kako u Devedi akikalaghamo.”

⁴³ Po ichilundilo icha bantu chikagabinkana pachifukwa icha Yesu.

⁴⁴ Bamo bakalondagha pakumulema, loli atakabapo nayumo umuntu uwakumupalamasya.

Abalaghili aba Chiyuda bakukana pakumusubila u Yesu

⁴⁵ Bo abasilikali bala banyokela, abaputi abasongo naba Falisayi bakabalalusya bakati, “Nkimba choni chicho mutizagha nawe?”

⁴⁶ Abasilikali bakamula bakati, “Nayumo umuntu yuyo anenitepo lumo ngati muntu uyu!”

⁴⁷ Aba Falisayi bakalalusya bakati, “Nkimba namwe abazimbuye?”

⁴⁸ “Nkimba alipo weka pakasi pa balaghili pamo pakasi paba Falisayi yuyo amusubiye? Awe!

⁴⁹ Loli ichilundilo icha bantu ichi chicho chitazimenye Indaghilo izya Mozesi, cho chicho chighuniwe.”

⁵⁰ Weka mu ba Falisayi bala akaba we Nikodemu, yuyo kale akabuka kwa Yesu. Akanena na bamwabo akati,

⁵¹ “Nkimba Indaghilo zyitu zikutwitikizya pakumulonga umuntu, bo tutamwivuye akunena mwene chicho anangite?”

⁵² Bakamwamula bakati, “Nkimba nawe bulo ukufumila muchigaba icha Galileya? Londa mu Masimbo wennye, po ukwiza pakwagha ukuti nayumo umulaghuzi yuyo angafuma muchigaba icha Galileya.” [

Umukolo yuyo alemiwa pabulowe

⁵³ Po abantu bosi bakanyokela kukwabo.