Yohani 21 - IBAYIBOLO 2024

U Yesu akubabonekela abamanyili seveni

¹ Pisinda pache u Yesu akababonekela sona abamanyili bache kunyanja iya Tibeliya. Umu momumo akilanjizikizya mwene:

² U Simoni Pitala nu Tomasi (yuyo akitiziwanga ukuti we Didimo) nu Nataniyele uwamu Kana muchigaba icha Galileya, na bana aba Zebediya, na bamanyili bache abanji babili bakaba poka.

³ U Simoni Pitala akababuzya abamwabo akati, “Nkubuka pakuloba iswi.” Abamwabo bakamubuzya bakati, “Naswe tukubuka nawe.” Po bakakwela mubwato nukunyamuka, loli ubusiku bosi batakalemapo iswi na yimoyimo.

⁴ Bo kwacha, u Yesu akimilila pisila, loli abamanyili batakamumanya ukuti akaba we Yesu.

⁵ U Yesu akabalalusya akati, “Mwee bamanyani, nkimba mutalemitepo niswi nayimoyimo?” Bakamwamula bakati, “Nayimoyimo.”

⁶ Akababuzya akati, “Sumbila ichilepa chinyu kulubazu ulwa ndilo ulwa bwato, po mukwiza pakuzyaghamo zimo.” Po bakasumba ichilepa, loli pachifukwa icha bwinji ubwa swi, bakapotwa pakuwesela ichilepa mubwato.

⁷ Umumanyili yuyo u Yesu akamughana nkani akamubuzya u Pitala akati, “We Mwene!” Bo u Simoni Pitala ivwa ukuti akaba we Mwene, akavwala inkazo yache pakuti akayivula nukwisumbila munyanja mula.

⁸ Loli abamanyili abanji bakiza mubwato pisila bo bakuwesa ichilepa chicho chikizula ni iswi. Batakaba pabutali na pisila, ubutali bwache pakaba ngati gho mamita 100.

⁹ Bo bafika pisila, bakazyennya iswi pamoto uwa mazimwa, sona ni vibama.

¹⁰ Po u Yesu akababuzya akati, “Mwize nazyo iswi zimo zizyo mwalema.”

¹¹ U Simoni Pitala akakwela mubwato, akawesela ichilepa pisila chizuye ni iswi inkulu 153. Napapo iswi zikaba nyinji, ichilepa chitakazepuka.

¹² U Yesu akababuzya akati, “Zagha mulye ichakulya ichapandabindabi.” Atakabapo nayumo umumanyili yuyo akaba mujivu pakumulalusya ukuti, “Wewenu?” Pakuti bakazimanya ukuti akaba we Mwene.

¹³ Po u Yesu akiza, akasenda ichibama nukubapa. Akabomba bunubu niswi bulo.

¹⁴ Aka kakaba kabalilo akabutatu akakuti u Yesu ababonekele abamanyili bache, bo azyuka kubufwe.

U Yesu nu Pitala

¹⁵ Bo bamala pakulya, u Yesu akamulalusya u Pitala akati, “Wee Simoni umwana uwa Yohani, nkimba unganite ukubachila banaba?” U Pitala akamula akati, “Momumo Mwene, uzimenye ukuti nkughanite.” U Yesu akamubuzya akati, “Lyesya ing'ozi zyane.”

¹⁶ U Yesu akanena ulwabubili kukwache akati, “Wee Simoni umwana uwa Yohani, nkimba unganite?” U Pitala akamula akati, “Momumo Mwene, uzimenye ukuti nkughanite.” U Yesu akamubuzya akati, “Sungilila ing'ozi zyane.”

¹⁷ U Yesu akanena akabutatu akati, “Simoni umwana uwa Yohani, nkimba unganite?” U Pitala akaba ni chitima pachifukwa ichakuti u Yesu akamulalusya akabutatu akati, “Nkimba unganite?” Po u Pitala akati, “Mwene, awe uzimenye zyosi. Uzimenye ukuti ane nkughanite.” U Yesu akamubuzya akati, “Lyesya ing'ozi zyane.

¹⁸ Naloli nkukubuzya ukuti bo we mulumendo ukiyannyanga nukubuka kosi kuko walonda. Loli bo waghosipa, ukwiza pakugholosya bulo inyobe zyako, po umuntu uyunji akwiza pakukupinya nukubuka nawe kuko utakulonda pakubuka.”

¹⁹ U Yesu akanena zinizi, ukumulanjizya u Pitala mumo akwiza pakufwila nukumuchindikilamo u Chala. Po u Yesu akamubuzya akati, “Nkonka!”

²⁰ U Pitala akaghalabuka nukumwennya umumanyili yuyo u Yesu akamughana nkani akabakonkagha mwisinda, umumanyili yuyo pakabalilo aka Ulusekelo ulwa Pasa, akamweghamila u Yesu pachifuba nukumulalusya ukuti, “Mwene, nkimba wewenu akwiza pakukubika munyobe izya balwani?”

²¹ Bo u Pitala amwennya umumanyili yula, akamulalusya u Yesu akati, “Mwene, buli izya muntu uyu?”

²² U Yesu akamwamula akati, “Nanti nkulonda ukuti uyu abanje nubumi mupaka nize sona, nkimba uli nazyo ni mbombo yoni? Nkonka!”

²³ Po ipangwi linili likasata kubakamu ukuti umumanyili uyu atakwiza pakufwa. Loli u Yesu atakanenapo ukuti atakwiza pakufwa. Akati, “Nanti nkulonda ukuti uyu abanje nubumi mupaka nize sona, nkimba uli nazyo ni mbombo yoni?”

²⁴ Yunuyu we mumanyili yuyo akuzisimikizya zinizi, sona weyuyo akasimba. Tuzimenye ukuti ulusimikizyo lwache lwanaloli.

Amazyu aghabumalilo

²⁵ Loli vilipo ivintu ivyinji, vivyo u Yesu akabombagha, vivyo nanti vyosi vikasimbiwanga, nkwinong'ona ukuti pachisu chosi ichapasi ngali pate ubuzilo ubwakukwana ubwakusungilamo amabuku ghanagha.