Yohani 2 - IBAYIBOLO 2024

Isendwa mukaya aka Kana

¹ Bo ghachilapo amasiku mabili kukabako isendwa mukaya aka Kana muchigaba icha Galileya. Wepe nu nyina uwa Yesu akabako,

² po u Yesu wepe poka na bamanyili bache bakitiziwa kusendwa yila.

³ Bo uvinyo amala, unyina uwa Yesu akamubuzya akati, “Uvinyo amala.”

⁴ U Yesu akamwamula akati, “Mayi, utakambuzyanje izyakubomba. Akabalilo kane kachili katakwanite.”

⁵ Unyina uwa Yesu akababuzya abambombo bala akati, “Bombagha bulo chosi chicho akubabuzya.”

⁶ Pakabapo isonta inkulu sikisi izya mizi, zizyo aba Yuda bakabombelagha pakusukusulilamo ukuyana ni nyiho zyabo izyakwiswefya. Isonta yosi yikayana bulo ni ndobo fayivi pamo sikisi.

⁷ U Yesu akababuzya abambombo bala akati, “Izuzya isonta izi na mizi.” Bakizuzya mupaka nukwanda pakukupuka,

⁸ po akababuzya akati, “Losi ulu semba amizi nukumupa usongo uwa lusekelo.” Po bakasemba amizi nukumupa usongo yula.

⁹ Usongo uwa lusekelo akaghonja amizi, ghagho ghakanduka we vinyo. Atakamanya kuko akafuma, loli ababombi babo bakasembelelagha amizi bakamanya. Usongo uwa lusekelo yula akamwitizya umwenesendwa,

¹⁰ nukumubuzya ukuti, “Umuntu wesi pakwanda akubapa abantu uvinyo umwiza, po nanti abantu bikuta, akubapa uvinyo umubibi. Loli awe wafisite uvinyo umwiza mupaka ulu.”

¹¹ U Yesu akabomba ichimanyilo chache ichakwanda ichi mukaya aka Kana muchigaba icha Galileya, mulamula momumo akalanjizya ubuchindamu bwache, sona abamanyili bache bakamusubila.

¹² Pisinda pache u Yesu akabuka mu Kapelinahumu, poka nu nyina, na bawamwabo, sona na bamanyili bache nukwikala kulakula amasiku amanandi bulo.

U Yesu akuyiswefya Inyumba iya Chala

¹³ Bo Ulusekelo ulwa Pasa uwa ba Yuda lwapalamila, u Yesu akabuka ku Yelusalemu.

¹⁴ Kulakula akinjila mu Nyumba iya Chala nukubagha abantu bakughulizannya ing'ombe, ni ng'ozi ni nkunda. Mulamula mukaba sona abaghulizannya indalama bikaye pa matebulo.

¹⁵ Po u Yesu akapota ulukusa pakuba chikoti, akabachimbizyamo bosi mu Nyumba iya Chala, poka ni ng'ozi ni ng'ombe zyabo. Akaghalabulannya ututalati utwa baghulizannya indalama bala.

¹⁶ Po akabalamula babo bakaghulizyanga inkunda ukuti, “Muzifumye kuzi. Mutakayipelaye Inyumba iya Tata pakuba munalo.”

¹⁷ Abamanyili bache bakakumbuka Amasimbo aghakuti, “Ulweke lwane pa Nyumba yako lukwaka mumwane ngati moto.”

¹⁸ Abalaghili aba Chiyuda bakamwamula ni lalusyo bakati, “Chimanyilo choni chicho ungabomba ukutulanjizya ukuti uli nu bulaghili ubwakubombela zinizi?”

¹⁹ U Yesu akabamula akati, “Mongolannya Inyumba iya Chala iyi, po nkwiza pakuyizenga sona mumasiku matatu.”

²⁰ Bakamulalusya bakati, “Inyumba iya Chala yasendite amaka 46 pakuyizenga, loli awe ungayizenga sona bulibuli mumasiku matatu bulo?”

²¹ Loli Inyumba yiyo u Yesu akayinenagha, ghukaba mubili wache.

²² Po bo azyuka kubufwe, abamanyili bache bakakumbuka ukuti akanena zinizi, sona bakasubila Amasimbo na vivyo u Yesu akanena.

U Yesu azimenye inyinong'ono izya bantu

²³ Bo u Yesu achili ali mu Yelusalemu pakabalilo aka Ulusekelo ulwa Pasa, abinji bakamusubila bo bennya ivyika vivyo akabomba.

²⁴ Loli u Yesu atakabasubila pakuti akazimanya inyinong'ono zyabo.

²⁵ Patakalondiwa ukuti yumo amubuzye nizya bantu pakuti umwenecho akazimanya inyinong'ono zyabo.