Yohani 14 - IBAYIBOLO 2024

U Yesu zila iyakubukila kwa Tata

¹ U Yesu akababuzya abamanyili bache akati, “Mutakapasyanje mumoyo ghinyu. Mumusubilaye u Chala sona munsubilaye nane.

² Munyumba iya Tata wane muli ivipinda ivyinji ivyakwikalamo, nanti vitakabangamo ngali imbabuzizye. Pakuti nkubuka pakubayanizya ubuzilo.

³ Sona bo nabuka pakubayanizya ubuzilo, nkwiza sona pakubasenda, umwakuti kuko indiko, ko kuko namwe bulo mubanje.

⁴ Kuko nkubuka muyimenye kale izila yache.”

⁵ U Tomasi akati, “Mwene, tutamenyeko kuko ukubuka, po tungayimanya bulibuli izila yache?”

⁶ U Yesu akamula akati, “Ane ne Zila, ne Bwanaloli, sona ne Bumi. Nayumo umuntu yuyo akubuka kwa Tata ukusita ukwendela mumwane.”

⁷ U Yesu akababuzya akati, “Pakuti ilelo mwamanya ane, mukwiza pakumumanya wepe nu Tata wane, ukwandila pakabalilo aka mumumenye, sona mwamwennya.”

⁸ U Filipu akati, “Mwene, utulanjizye Utata, cho chicho chene tukulonda.”

⁹ U Yesu akamula akati, “Nikala namwe akabalilo akatali, Filipu, nkimba nilelo uchili utamenye? Umuntu wesi yuyo anyennya, amwennya nu Tata wepe. Po choni chicho ukuti, ‘Utulanjizye Utata?’

¹⁰ Filipu, nkimba utakusubila ukuti ane indi mwa Tata, wepe nu Tata ali mumwane? Amazyu ghagho nababuzya ghate ghane na ghane, loli gha Tata yuyo akwikala mumwane, sona akubombela mumwane imbombo zyache.

¹¹ Munsubilaye bo nkunena ukuti ane indi mwa Tata, wepe nu Tata ali mumwane. Nanti mutakusubila zinizi, musubilaye bulo pachifukwa icha mbombo zizyo nkubomba.

¹² Naloli nkubabuzya ukuti umuntu wesi yuyo akunsubila, akwiza pakubomba imbombo zizyo nkubomba. Eee, akwiza pakubomba ivintu ivikulu ukuchilapo ivi pachifukwa ichakuti nkubuka kwa Tata.

¹³ Chosi chicho mukulabila mwitabwa lyane cho chicho nkwiza pakuchibomba, umwakuti Utata achindikiwanje ukwendela mu Mwana.

¹⁴ Chosi chicho mukulabila mwitabwa lyane cho chicho nkwiza pakuchibomba.”

Ilayizyo ilya Muzimu Umuzelu

¹⁵ “Nanti munganite, mukwiza pakukonka amalamulo ghane.

¹⁶ Nkwiza pakumulaba Utata, po akwiza pakubapa Umwavwilizi uyunji, yuyo akwiza pakwikala namwe bwila na bwila.

¹⁷ Uyu we Muzimu Umuzelu yuyo akubavumbulila ubwanaloli ubwa Chala. Ichisu ichapasi chitangamupokela pakuti chitangamwennya pamo ukumumanya. Loli amwe mumumenye pakuti akwikala namwe, sona ali mumwinyu.

¹⁸ “Ntakwiza pakubaleka mwebene ngati mwe bapina, nkwiza sona kukwinyu.

¹⁹ Kwasyala akabalilo akanandi bulo ichisu ichapasi chitakwiza pakunyennya nalumo, loli amwe mukwiza pakunyennya pakuti ane ne mumi, namwe mukwiza pakuba mwe bumi.

²⁰ Bo isiku lila lyafika, mukwiza pakumanya ukuti ane indi mwa Tata, sona ukuti amwe muli mumwane, ukuyana namumo ane indi mumwinyu.

²¹ “Umuntu wesi yuyo akughitika amalamulo ghane nukughakonka, weyuyo anganite. Utata wane akwiza pakumughana wesi yuyo anganite. Nane bulo nkwiza pakumughana nukwilanjizya nemwene kukwache.”

²² U Yudasi uwamwabo (u Yudasi Sikaliyoti awe) akamulalusya akati, “Mwene, zingaba bulibuli ukuti wize wilanjizye wemwene kukwitu, loli kuchisu ichapasi awe?”

²³ U Yesu akamwamula akati, “Umuntu wesi yuyo anganite akwiza pakwivwila ubumanyisi bwane. Utata wane akwiza pakumughana, sona Utata wane poka nane tukwiza kukwache nukwikala nawe.

²⁴ Umuntu wesi yuyo atanganite atakwivwila ubumanyisi bwane. Sona ubumanyisi bubo mwivwa bute bwane nu bwane, loli bukufuma kwa Tata, yuyo akantuma.

²⁵ “Nababuzizya zila zinizi bo inchili indinamwe.

²⁶ Loli Umwavwilizi, u Muzimu Umuzelu, yuyo Utata akwiza pakubatumila mwitabwa lyane, akwiza pakubamanyisya nukubakumbusya vyosi vivyo nababuzya.

²⁷ “Nkubalekela umutende. Nkubapa umutende wane. Intakubapa ukuyana namumo ichisu ichapasi chikupelela umutende. Mutakapasyanje mumoyo ghinyu, sona mutakanyilaye.

²⁸ Mukanyivwa nkunena namwe nkuti, ‘Nkubuka, loli nkwiza sona kukwinyu.’ Nanti mukanganagha, ngali mukuhoboka ukuti nkubuka kwa Tata pakuti wapamwanya nkani ukunchila.

²⁹ Ilelo nababuzizya zila zinizi bo zichili pakuboneka, umwakuti bo zyaboneka mukwiza pakusubila.

³⁰ Ntakwiza pakunena namwe akabalilo akatali awe pakuti u Satana, umulaghili uwa chisu ichapasi akwiza. Ate na maka papane awe,

³¹ loli abantu aba muchisu ichapasi bamanyaghe ukuti ane imughanite u Tata. Ichi cho chifukwa nkubomba chosi chicho u Tata akundamula. “Twende, twepepo pano.”