Yohani 13 - IBAYIBOLO 2024

U Yesu akusukuzya inyayo izya bamanyili bache

¹ Kukasyalako bulo isiku lyoka ukuti Ulusekelo ulwa Pasa lubombiwe. U Yesu akazimanyila zila ukuti akabalilo kache kakwana akakuti achileke ichisu ichapasi nukubuka kwa Wise. Abaghanite nkani abantu bache aba muchisu ichapasi, sona akabaghana mupaka pisiku ilyabumalilo ilya bumi bwache pachisu ichapasi.

² U Yesu na bamanyili bache bakalyanga ichakulya icha pachamabwila. Po u Satana akabikamo kale mumoyo uwa Yudasi umwana uwa Simoni Sikaliyoti inyinong'ono izya kumubikila u Yesu munyobe izya balwani.

³ U Yesu akazimanya ukuti Uwise abikite vyosi munyobe zyache. Akazimanya sona ukuti afumite kwa Chala, po akunyokela kwa Chala.

⁴ U Yesu akimilila po bakalyelagha, akavula inkazo yache nukuyibika palubazu, akapinya umwenda mumusana wache.

⁵ Po akapungulila amizi musonta nukwanda pakusukuzya inyayo izya bamanyili bache nukuzipuputa nu mwenda ghugho akapinyilila mumusana wache.

⁶ Akafika pa Simoni Pitala, yuyo akamulalusya ukuti, “Wee Mwene, nkimba ukulonda pakusukuzya inyayo zyane?”

⁷ U Yesu akamula akati, “Pakabalilo aka utangachivwisya chicho nkubomba, loli ukwiza pakuchivwisya muntazi.”

⁸ U Pitala akati, “Awe, ute ukansukuzyepo nalumolumo inyayo zyane.” U Yesu akamula akati, “Nanti intakusukuzya inyayo zyako, utakwiza pakubapo nalumolumo sona mumanyili wane.”

⁹ U Simoni Pitala akamula akati, “Wee Mwene, utakansukuzye inyayo zyene, loli unsukuzye inyobe sona na kumutu bulo.”

¹⁰ U Yesu akanena akati, “Umuntu wesi yuyo oghite kale mumubili ghosi, atakulonda pakogha sona, loli pakusukuzya bulo inyayo zyache zyene. Mwe bosi muswepite, loli ukwefyako weka.”

¹¹ U Yesu akamumanya kale umuntu yuyo akayanga pakumubika munyobe izya balwani, cho chifukwa akati, “Mwe bosi muswepite, loli ukwefyako weka.”

¹² Bo u Yesu amala pakusukuzya inyayo zyabo, akavwala sona inkazo yache nukwikala pasi sona pakuti bakalyanga. Akabalalusya akati, “Nkimba mwachivwisya chicho nababombela?

¹³ Amwe mukunyitizya ane ukuti, ‘Mumanyisi,’ sona ‘Mwene,’ chizapo pakubomba bunubu pakuti momumo imbeleye.

¹⁴ Po nanti ane, u Mwene nu Mumanyisi winyu nabasukuzya inyayo zyinyu, namwe bulo mubaghiye pakusukuzannya inyayo zyinyu.

¹⁵ Nabapa ichifwanikizyo ukuti namwe bulo mubombaye ukuyana namumo nababombela.

¹⁶ Naloli nkubabuzya ukuti umuzya atakubapo nalumolumo wapamwanya ukumuchila u mwene wache, awe, sona umutumiwa atakubapo nalumolumo uwapamwanya ukumuchila yuyo akamutuma.

¹⁷ Pakuti ilelo muzimenye zinizi, mwe basayiwa nanti mukuzibomba.

¹⁸ “Intakubanena mwebosi; ane imbamenye babo nabasala. Loli Amasimbo ghakwanilisiwe ghagho ghakuti, ‘Umuntu yuyo nkulya poka nawe ichibama, ansambukiye.’

¹⁹ Ilelo nkubabuzizya zila bo zichili pakuboneka, umwakuti bo zikuboneka musubilaye ukuti, ‘Ane Nene.’

²⁰ Naloli nkubabuzya ukuti umuntu wesi yuyo akumupokela yuyo nkumutuma, akumpokela nane bulo, sona umuntu wesi yuyo akumpokela ane, akumupokela wepe bulo yuyo akantuma.”

U Yesu akunenela zila ukuti akwiza pakubikiwa munyobe izya balwani

²¹ Bo u Yesu anena zinizi, akayimba nkani mumoyo wache nukufumusya pabuzelu ukuti, “Naloli nkubabuzya ukuti umuntu weka pakasi papinyu akwiza pakumbika munyobe izya balwani.”

²² Abamanyili bache bakanda pakwenannya nukuswigha nizya yuyo akamunenagha.

²³ Umumanyili weka, yuyo u Yesu akamughana nkani akikala papipi nu Yesu.

²⁴ U Simoni Pitala akamukopezya akati, “Umulalusye, akumunena wewenu.”

²⁵ Po umumanyili yula akamweghamila u Yesu nukumulalusya ukuti, “Mwene, nkimba ukumunena wewenu?”

²⁶ U Yesu akamula akati, “Nanti nasazila akamenyu aka chibama mumbale nukumupa umuntu, umuntu yunuyu weyuyo.” Po akasenda akamenyu aka chibama, akasazila nukumupa u Yudasi, umwana uwa Simoni Sikaliyoti.

²⁷ Umwalubilolubilo bo u Yudasi apokela ichibama, u Satana akinjila mumwache. U Yesu akamubuzya akati, “Lubilolubilo, bomba zizyo ukulonda pakubomba.”

²⁸ Atakabapo nayumo umuntu pabantu babo bakalyanga ichakulya yuyo akivwisya chicho u Yesu akang'anamula kukwache.

²⁹ Pakuti u Yudasi weyuyo akasungagha inyambi iya ndalama, abamanyili bamo bakinong'onagha ukuti u Yesu akumutuma pakughula ivyakulondiwa palusekelo, pamo pakubapa ivintu abapina.

³⁰ U Yudasi akapokela akamenyu aka chibama kala nukubuka umwalubilolubilo. Kakaba kabalilo aka busiku.

Ilamulo Ilipya

³¹ Bo u Yudasi abuka bulo, u Yesu akati, “Losi ulu u Mwana uwa Muntu apokela ubuchindamu, sona ubuchindamu ubwa Chala bwabonekela ukwendela mumwache.

³² Po nanti ubuchindamu ubwa Chala bwabonekela ukwendela mumwache, po ilelo u Chala akwiza pakulanjizya ubuchindamu ubwa Mwana uwa Muntu, po akwiza pakuzibomba umwalubilolubilo.

³³ Bana bane, ntakwiza pakuba namwe akabalilo akatali. Amwe mukwiza pakundonda, loli losi ulu nkubabuzya zizyo nkababuzya abalaghili aba Chiyuda ukuti, ‘Mutangabukako kuko nkubuka.’

³⁴ Po losi ulu nkubapa ilamulo ilipya ilyakuti mughananaye mwebene. Mughananaye, ukuyana namumo nkabaghanila.

³⁵ Nanti mukughanana, po abantu bosi bakwiza pakumanya ukuti mwe bamanyili bane.”

U Yesu akunenela zila ukuti u Pitala akwiza pakumukana

³⁶ U Simoni Pitala akamulalusya akati, “Mwene, ukubuka kwiyi?” U Yesu akamula akati, “Utangankonka losi ulu kuko nkubuka, loli ukwiza pakunkonka pisinda.”

³⁷ U Pitala akamulalusya akati, “Wee Mwene, nkimba choni chicho intangakukonka losi ulu? Ane niyanizye ukufwa pachifukwa icha wewe.”

³⁸ U Yesu akamula akati, “Nkimba naloli ukuti wiyanizye ukufwa pachifukwa icha nene? Naloli nkukubuzya ukuti bo ukolwe atakokolikite ukwiza pakunkana katatu ukuti utamenye.”