Yohani 11 - IBAYIBOLO 2024

Ubufwe ubwa Lazalo

¹ Pakabapo umuntu yumo yuyo akaba we Lazalo, uwa mukaya aka Betaniya, yuyo akaba mubine. Betaniya kakaba kaya kako u Maliya nu muzuna wache u Malita bakikalaghamo.

² U Maliya yunuyu akaba weyuyo akakupulila amafuta aghakununkila munyayo izya Mwene nukuzipuputa ni sisi zyache. Umuyemba wache u Lazalo weyuyo akaba mubine.

³ Abayemba bakamutumila u Yesu amazyu aghakuti, “Mwene, umumanyani wako umughaniwa abinite.”

⁴ Bo u Yesu ivwa zinizi akati, “Ububine ubu bute bwakuti angafwa nabo, loli bwakuti u Chala achindikiliwemo, sona ukuti u Mwana uwa Chala apokele ubuchindamu pachifukwa icha bubine bunubu.”

⁵ U Yesu akamughana u Maliya nu muzuna wache u Malita, sona nu Lazalo.

⁶ Loli bo u Yesu ivwa ukuti u Lazalo abinite, akikala kuko akabanga amasiku aghanji mabili.

⁷ Po akababuzya abamanyili bache akati, “Zagha tunyokele mu Yudeya.”

⁸ Abamanyili bache bakamwamula bakati, “Wee Mumanyisi, patachilitepo na kabalilo akapimpa bulo, aba Yuda bakulakula bakalondagha pakukusumba na mabwe, po nkimba ukulonda pakunyokelako sona?”

⁹ U Yesu akamula akati, “Umusanya ghuli na ma awala 12, mute momumo? Po nanti umuntu akwenda nu musanya atakwipunula pakuti akulwennya ulukozyo ulwa chisu ichapasi.

¹⁰ Loli nanti akwenda nu busiku, akwipunula pakuti ate nulukozyo.”

¹¹ U Yesu akanena amazyu ghanagha nukonjelezyapo ukuti, “Umumanyani witu u Lazalo aghonite bulo utulo, loli nkubuka pakumulamusya.”

¹² Abamanyili bache bakamwamula bakati, “Mwene, nanti achili bulo mutulo, akwiza pakuba akiza.”

¹³ Abene bakinong'onagha ukuti akunena utulo utwenecho, loli u Yesu akang'anamulagha ukuti u Lazalo afuye.

¹⁴ Po u Yesu akababuzya pabuzelu akati, “U Lazalo afuye,

¹⁵ loli pachifukwa icha mwemwe ihobokite nkani ukuti intakabako, umwakuti musubile. Twende kukwache.”

¹⁶ Po u Tomasi, (yuyo akitiziwanga ukuti we Didimo), akababuzya abamanyili abamwabo akati, “Twende twebosi poka nu mumanyisi, umwakuti tufwile poka nawe.”

U Yesu weyuyo akubazyusya abantu

¹⁷ Bo u Yesu afika akagha ukuti u Lazalo aghonamo kale mwipumpa amasiku folo.

¹⁸ Akaya aka Betaniya kakaba papipi nu Yelusalemu, amamita 3,000,

¹⁹ po aba Yuda abinji bakiza pakumulema inyobe u Malita nu Maliya pachifukwa icha bufwe ubwa muyemba wabo.

²⁰ Bo u Malita ivwa ukuti u Yesu akwiza, akafuma kuzi pakumupokela, loli u Maliya akasyala munyumba.

²¹ U Malita akamubuzya u Yesu akati, “Mwene, nanti ukabangapo panapa, ngali umuyemba wane atafuye!

²² Loli inzimenye ukuti ilelo u Chala akwiza pakukupa chosi chicho ukumulaba.”

²³ U Yesu akamubuzya u Malita akati, “Umuyemba wako akwiza pakuzyuka kubufwe.”

²⁴ U Malita akamwamula akati, “Inzimenye ukuti akwiza pakuzyuka kubufwe pisiku ilyabumalilo.”

²⁵ U Yesu akamubuzya akati, “Ane ne yuyo akuzyusya abantu nukubapa ubumi. Umuntu wesi yuyo akusubila mumwane akwiza pakuba nubumi napapo angafwa.

²⁶ Sona umuntu wesi yuyo mumi nukusubila mumwane atakwiza pakufwa nalumo. Nkimba ukuzisubila zinizi?”

²⁷ U Malita akamwamula akati, “Eee, Mwene, nkusubila ukuti awe we Kilisitu, u Mwana uwa Chala, yuyo bakatinji akwiza muchisu ichapasi.”

U Yesu akulila

²⁸ Bo u Malita amala pakunena zinizi, akanyokela pakumwitizya umuzuna wache u Maliya palubazu nukumubuzya ukuti, “Umumanyisi ali kuno akukwitizya.”

²⁹ Bo u Maliya ivwa zinizi, akanyamuka umwalubilolubilo pakukomana nu Yesu.

³⁰ U Yesu akaba achili pakufika mukaya kala, loli akaba achili pabuzilo bubo u Malita akakomana nawe.

³¹ Abantu babo bakaba munyumba poka nu Maliya pakumulema inyobe, bakamukonka bo bennya anyamuka umwalubilolubilo nukufuma kuzi. Bakinong'onagha ukuti akubuka mumapumpa pakulila.

³² U Maliya akafika pabuzilo bubo u Yesu akaba, po bo amwennya bulo, akamuwila muvinama. Akamubuzya akati, “Mwene nanti ukabangapo panapa, ngali umuyemba wane atafuye.”

³³ Bo u Yesu amwennya u Maliya akulila, sona na bantu babo bakaba nawe, umoyo wache ghukizula ni chitima, sona akayimba nkani mumoyo wache.

³⁴ Akabalalusya akati, “Nkimba mumusyilite kwiyi?” Abene bakamwamula bakati, “Mwene, twende wennyeko.”

³⁵ U Yesu akalila.

³⁶ Po aba Yuda bakati, “Ennya namumo akamughanila.”

³⁷ Loli bamo bakati, “Umuntu uyu akamwighula amaso umufwamaso, mute momumo? Nkimba atangabombapo chimo ukuti u Lazalo atakafwe?”

U Yesu akumuzyusya u Lazalo

³⁸ U Yesu akayimba nkani sona mumoyo wache, po akabuka kwipumpa lilyo likaba mpako. Bakighalilapo nibwe pamulyango.

³⁹ U Yesu akalamula akati, “Efyapo ibwe.” U Malita umuyemba uwa muyazi yula akamubuzya u Yesu akati, “Mwene, pano pakwiza pakununka akabibi pakuti aghonamo kale amasiku folo.”

⁴⁰ U Yesu akamubuzya akati, “Nkimba intakakubuzya ukuti nanti ukusubila ukwiza pakwennya ubuchindamu ubwa Chala?”

⁴¹ Bakefyapo ibwe lila. Po u Yesu akennya kumwanya nukuti, “Tata, nkukupalizya pakuti wivwa inyiputo zyane.

⁴² Inzimenye ukuti ukunyivwa akabalilo kosi, loli nkunena ichi mubuzilo ubwa bantu babo bali pano, umwakuti basubile ukuti wewe ukantuma.”

⁴³ Bo amala pakunena zinizi, akitizya nizyu ilya pamwanya nkani akati, “Lazalo epamo!”

⁴⁴ Umuyazi yula akepamo, inyobe ni vinama vikaba vichili vinnyembeteleliwe na menda ghagho bakamusyilila nagho, sona nu mwenda ghugho bakamunnyembetelela nagho kumaso. U Yesu akababuzya akati, “Mumusatule, muleke abukaye.”

Aba Yuda bakubatika pakumughogha u Yesu

⁴⁵ Aba Yuda abinji babo bakiza pakumulema inyobe u Maliya bakennya zizyo u Yesu akabomba, po bakamusubila.

⁴⁶ Loli bamo bakabuka kuba Falisayi nukubabuzya zizyo u Yesu akabomba.

⁴⁷ Po aba Falisayi na baputi abasongo bakaba nulukomano nukulalusannya ukuti, “Nkimba tubombe choni panapa? Ennya, umuntu yunuyu akubomba ivimanyilo ivyinji!

⁴⁸ Nanti tukumuleka bulo ukuti endelelaye bunubu, abantu bosi bakwiza pakumusubila, sona aba Loma bakwiza pakunangannya Inyumba iya Chala nuluko lwitu bulo!”

⁴⁹ Weka mukasi mumwabo yuyo akaba we Kayafa, umuputi usongo umwaka ghulaghula akati, “Amwe mwe bapunganu!

⁵⁰ Nkimba mutakuzyaghannya ukuti chizapo umuntu weka abafwile abantu bosi nukuchila ukuti uluko losi luzimile?”

⁵¹ Nkaninkani, atakanenapo amazyu agha na mahala aghache na ghache. Loli pakuti akaba muputi usongo mumwaka ghulaghula, akalaghula ukuti u Yesu akwiza pakulufwila uluko ulwa ba Yuda,

⁵² kute kokuti akwiza pakulufwila uluko lwabo lwene, loli pakubabungannya sona abana aba Chala babo banyampanite.

⁵³ Ukwandila pisiku lilalila, abalaghili aba Chiyuda bakivwana nizya kumughogha u Yesu.

⁵⁴ Po u Yesu akaleka ukwendakwenda pabuzelu mukaya aka Yudeya, loli akepukako nukubuka kubuzilo bubo buli papipi ni nkolongo, akaya akakulu aka Efulayimu, kuko akikalagha na bamanyili bache.

⁵⁵ Ulusekelo ulwa Pasa uwa Chiyuda lukaba papipi, po aba Yuda abinji bakafuma mutwaya nukubuka mu Yelusalemu pakubomba ulwiho ulwakwiswefya, bo nu lusekelo luchili pakubombiwa.

⁵⁶ Bakamulondagha u Yesu, po bo bakomana mu Nyumba iya Chala bakanda pakulalusannya bakati, “Amwe mukwinong'ona ichoni? Nkimba akwiza ku lusekelo ulu pamo awe?”

⁵⁷ Abaputi abasongo naba Falisayi bakalamula bakati nanti alipo yumo yuyo amenye kuko u Yesu akaba, abuke ababuzye, umwakuti babuke bamuleme.