Yobu 8 - IBAYIBOLO 2024

Amazyu agha Bilidadi

¹ Po u Bilidadi uwamu Shuhi akamula akati:

² “Nkimba ukwiza ukuleka liyi pakunena bunubu? Amazyu ghako ghali ngati mpepo?”

³ Nkimba u Chala abunyonganizyepo lumo ubwanaloli? Nkimba Uwamaka Ghosi apotizwepo lumo pakubomba ubwanaloli?

⁴ Bo abana bako bamunangila u Chala, akabafunda ukuyana ni mbibi zyabo.

⁵ Loli nanti ukubomba zizyo u Chala akulonda, nukumulambilizya Uwamaka Ghosi,

⁶ nanti we muntu muzelu, sona we mugholosu, po losi ulu ngali izite pakukwavwa, nukukunyosezya pabuzilo bwako ubuchindamu.

⁷ Napapo pakwanda ukaba ni vintu ivinandi nkani, loli pabumalilo ukwiza pakuba navyo ivyinji nkani.

⁸ “Lalusya inkulilo izyakale, ukwiza pakumanya zizyo abanyenya babo bakamanyilagha.”

⁹ Aswe twe babonda aba mumabwila, tutakumanyapo nachimochimo, pakuti amasiku ghitu muchisu ichapasi ghali ngati muzyezye bulo.

¹⁰ Nkimba abantu abavula intazi batangakumanyisya? Nkimba batangakwavwa pakubombezya akivwisizye kabo?

¹¹ Nkimba amakala ghangakula papo pate iching'wezi? Nkimba intete zingakula papo pate amizi?

¹² Bo zikukula, sona nanti zitadumuliwe, zikufoka lubilolubilo ukuchila isote.

¹³ Ubu bo bumalilo ubwa bosi babo bakumuluvya u Chala, sona ulusubilo ulwa bantu babo batakumunyila u Chala lukwiza pakumala.

¹⁴ Chicho akusubila chikwiza pakudumunkana chicho akusubila chili ngati buzi ubwa bubi.

¹⁵ Akubweghamila ubuzi bwache, loli bukudumunkana, akubukakatila, loli butakumwavwa.

¹⁶ Ali ngati chibyalwa chicho bakuchisembelela akiza pamusanya, chicho chikumela posi na posi mumughunda.

¹⁷ Amagululuzi ghache ghakutaba pamabwe; sona ghakukakatila pakasi pamabwe.

¹⁸ Nanti chanyunkuliwa mubuzilo bwache, ubuzilo bula bukuchisulannya nukuti, “Intakwenizyepo nalumo.”

¹⁹ Naloli ubumi bwache bukufoka, po imbeyu izinji zikumela palapala.

²⁰ “Naloli u Chala atakumukana umuntu umusita akalema, loli abantu ababibi atakubavwa nalumo.”

²¹ Akwiza pakukusesya, po ukwiza pakukolomoka pachifukwa icha kuhoboka.

²² Abalwani bako bosi bakwiza pakuba ni soni, sona inyumba izya bantu ababibi zikwiza pakuzimila.