Yobu 7 - IBAYIBOLO 2024

¹ “Nkimba umuntu ate ni mbombo inkafu pachisu ichapasi?” Nkimba amasiku ghache ghatayanite na masiku agha muntu uwaganyu?

² Ngati muzya yuyo akunyonywa akazundila, pamo ngati waganyu yuyo ali pakulindilila amalipilo ghache,

³ momumo nane bulo nkuyimbila akabalilo kosi, sona pabusiku pope nkutamiwa.

⁴ Bo indi pakughona nkwinong'ona ukuti, “Nkimba intikuchanje liyi?” Ubusiku butali sona nkughalabukaghalabuka mupaka kuche.

⁵ Umubili wane wizuye ni somi ni viko; sona ghuli ni vilonda, po amafila ghakufuma.

⁶ “Amasiku ghane ghakuchimbila ukuchila aka chela akakulukila amenda, po ghakumala umwakusita ulusubilo.”

⁷ “Wee Chala, kumbuka ukuti ubumi bwane buli ngati muyi bulo; amaso ghane ghatakwiza pakwennya sona ivyiza.”

⁸ Amaso ghagho ghakunennya pakabalilo aka, ghatakwiza pakunyennya sona. Mukwiza pakundondelezya, loli mutakwiza pakunyennya nalumo.

⁹ Amabingu ghakuzyebeluka, umwakuyana bulo, umuntu yuyo akwinjila mwipumpa atakunyokela.

¹⁰ Atakunyokela sona kunyumba yache, akaya kache kakumuluvya.

¹¹ Polelo ntakwiza pakusona umulomo wane po nkwiza pakunenapo zimo napapo indi mumayimba. Nkwiza pakwilumbusya napapo indi mububavu.

¹² Nkimba choni chicho mukumbikila abalindilili? Fwandi ne nyanja, pamo ne nyivwila?

¹³ Bo nkuti, “Ichitala chane chikwiza pakunsangalusya, ichitengo chane chikwiza pakunyavwa ukuluvya amayimba ghane,”

¹⁴ pope bulo ukunchenusya ni vilota sona ukunyoghofya ni visetuka,

¹⁵ ngali nsalitepo ukwipinyilila nukufwa ukuchila ukuti imbanje nu bubavu.

¹⁶ Ubumi bwane nkubusulannya, intakunyonywa sona pakuba mumi bwila na bwila. Mundeke bulo, pakuti ubumi bwane buli ngati muyi bulo.

¹⁷ “Nkimba umuntu wewenu uwakuti umupasikizyanje bunubu, uwakuti umwinong'onelaye?

¹⁸ Nkimba umuntu wewenu, uwakuti umwenelezyanje namumo akwendela pandabindabi posi, nukumuyela akabalilo kosi?

¹⁹ Nkimba ukwiza pakuleka liyi pakumbenga, pamo ukundeka bulo ukuti imilepo amati panandi?

²⁰ Wee Mwenelezi uwa bantu, nanti nananga, nkimba nakunangila ichoni? Nkimba choni chicho naba ne chakumanyililapo ukulasa? Fwandi naba ne mutamye kukwako?

²¹ Nkimba choni chicho utakuzimya ukunanga kwane nukuzihobokela imbibi zyane? Pakuti losi ulu nkwinjila mwipumpa, ukwiza pakundondelezya, loli utakwiza pakunyennya nalumo.”