Yobu 6 - IBAYIBOLO 2024

U Yobu akwamula

¹ Po u Yobu akamula akati:

² Nalondagha nkani nanti intamyo zyane zyapimiwanga, nanti amayimba ghane ghosi ghapimiwanga pachipimilo!

³ Naloli ngali ghachilite ubung'wama ubwa musesenga uwa mulubazu lwanyanja. Cho chifukwa amazyu ghane ghamwalwemwalwe.

⁴ Utulasilo utwa Wamaka Ghosi tuli pakundasa, umuzimu wane ghukung'wela isalile izya tulasilo tulatula. Ivyakoghofya ivya Chala vinzyungiliye.

⁵ Nkimba impunda yikukuta nanti yili pakulya isote, yope ing'ombe yikumota nanti yili pakulya isote?

⁶ Nkimba wewenu yuyo angalya ichakulya chicho chitakunona, chicho chite ni mbeya? Pamo kuliko ukunona ukwa kaswepu aka mwifumbi?

⁷ Intakulonda napo panandi pakuvighonja ivyakulya vinivi, vivyo vikumpelela bulo umuselu.

⁸ “Nalondagha nkani nanti napokelagha chicho nkuchilaba, nanti u Chala ampiye chicho nkuchinyonywa.”

⁹ Nanti chingamuhobosya u Chala ukuti ansye bulo, nanti ankoma bulo ni nyobe yache nukunvulazya.

¹⁰ Po ngali chanhobosya nkani, napapo ngali champelela ububavu ubukulu nkani. Pakuti inzimenye ukuti intangaghasulannya amazyu agha Muzelu yula.

¹¹ Nkimba indi na maka ghoni aghakuti indindililaye? Nkimba ubumalilo bwane bukwiza pakuba bulibuli, umwakuti ijimbaye.

¹² Nkimba amaka ghane ghayanite na maka agha mabwe, pamo umubili wane ghuyanite nu mukuba?

¹³ Amaka aghakuti ningiyavwa nemwene, nkimba indi nagho? Ilelo nakumokumo kuko ningabwagha ubwavwilizi.

¹⁴ “Pakabalilo aka mayimba ngati kanaka, chikulonda abamanyani abasubiliwa babanje papipi lumo umuntu angamukana Uwamaka Ghosi.”

¹⁵ Loli abamanyani bane te basubiliwa ngati tusoko, tuto tukukamuka lubilolubilo nanti ivula yaleka.

¹⁶ Bali ngati utusoko tuto tuli fii pachifukwa icha kabefu na mizi amakafu.

¹⁷ Loli muchisanya tukuleka pakwenda sona tukukamuka tosi pachifukwa icha butukizu.

¹⁸ Abantu aba pabulendo bakupaghuka pakulonda amizi; bakwendakwenda bulo munkolongo nukufwila mulamula.

¹⁹ Abantu aba pabulendo aba mu Tema, bakulonda amizi. Abantu abakughula na bakughulizya aba mu Sheba, bope bakutusubila utusoko tula.

²⁰ Po bakasubila pakughagha amizi, loli bo bafika kulakula bakawa amaka.

²¹ Umu momumo ubeleye kukwane, ukuchennya ichintu ichakoghofya, po ukunyila.

²² Nkimba inenitepo lumo ukuti, “Mpanga ichabupi, pamo umubekeko umuntu yumo pachifukwa icha nene?”

²³ “Nkimba inenitepo lumo ukuti umpoke munyobe izya mulwani, pamo umpoke munyobe izya muntu umukali?”

²⁴ Manyisya, nkwiza pakuba myee; ndanjizya ukunanga kwane.

²⁵ Amazyu aghabwanaloli ghakulasa nkani, loli awe ukudalika bulo.

²⁶ Nkimba choni chicho ukulonda pakudalinkana nane? Nkimba utakwennya ukuti amazyu agha muntu umusulumanye ghali ngati mpepo bulo?

²⁷ Naloli awe we muntu yuyo ungamubombela ichintu ichibibi umwana umulanda, sona ungamughulizya umumanyani wako.

²⁸ “Loli ilelo ennya kuno.” Nkimba ningatamanta pamaso papako?

²⁹ Tonta umoyo, Utakambombelaye ichintu ichibibi. Utakampanje inongwa, pakuti ne mugholosu.

³⁰ Nkimba inenitepo lumo ubumyasi? Nkimba ukwinong'ona ukuti intamenye pakulesannya ubwiza nu bubibi?