Yobu 42 - IBAYIBOLO 2024

¹ Po u Yobu akamwamula u Mwene akati:

² Inzimenye pakuti ungabomba ivintu vyosi; sona atalipo nayumo yuyo angasusannya ninyinong'ono zyako.

³ “Nkimba nene nkuvulungannya ivintu kusita kuzyaghannya?” Naloli nkanena ivintu kusita kuvivwisya, ivintu ivyiza pakuti invimanye.

⁴ Ukanena ukati, “Teghelezya lelo, po inkwiza pakukulalusya po ukwiza pakunyamula.”

⁵ Amakutu ghane ghakwivuye loli amaso ghane ghakwenizye.

⁶ Polelo nkwisusya nemwene nukupinduka pakwinyafila ulufumbi ni toyi.

Amazyu aghakwighalilila

⁷ Bo u Mwene anena ivintu vinivi kwa Yobu, akanena kwa Elifazi uwamu Tema akati, “Nkalaye nawe poka nabamanyani bako babili, chifukwa mutanenite ingolosu kukwane, ukuyana namumo akabombela u Yobu umubombi wane.

⁸ Polelo senda inkambaku seveni na bana abang'ozi, mubuke ku mubombi wane u Yobu nukubika ichakwiyipa ichakocha pachifukwa ichamwemwe. U Yobu umubombi wane akwiza pakubiputila, po ane nkwiza pakwivwa ulwiputo lwache sona ntakwiza pakubomba ukuyana nubupunganu bwinyu. Pachifukwa ichakuti mutanenite ubwanaloli pamaso papane ngati mumo akabombela umubombi wane u Yobu.”

⁹ Po u Elifazi uwamu Tema, nu Bilidadi uwamu Shuhi nu Zofali uwamu Naama bakabomba mumo u Mwene akababuzizya. Po u Mwene akamula ulwiputo ulwa Yobu.

¹⁰ Bo u Yobu abiputila abamanyani bache, u Mwene akamonjelezyapo kabili ichuma ukuchila vivyo akaba navyo pabwandilo.

¹¹ Abawamwabo bosi na bayemba na wesi yuyo akamumanya pabwandilo bakiza nukulya nawe munyumba yache. Bakamupelela u Yobu ichisa nukumusangalusya ukuyana nintamyo zizyo u Mwene akamupelela, wesi akamupanga indalama izya siliva ni mpete iya golide.

¹² U Mwene Akabusaya ubumi ubwa Yobu ubwa pisinda ukuchila ubwa pabwandilo. Akaba ning'ozi 14,000, ni ngamila 6,000 ni nkambaku izyakulima 1,000, ni mpunda 1,000.

¹³ Akaba sona nabana seveni abalumendo nabalindu batatu.

¹⁴ Umwana wache umulindu uwabwandilo akamwita ukuti we Yemima, uwabubili akaba we Keziya sona uwabutatu akaba we Keleni Hapuki.

¹⁵ Muchisu chosi ichapasi mutakabamo abana abiza ngati ba Yobu; Uwise akabagabilako ivya pachilingo poka na bayemba babo.

¹⁶ Pisinda pache u Yobu akikala amaka 140; akabennya abana bache nabizikulu munkulilo iyafolo.

¹⁷ Po u Yobu akafwa bo aghosipite nkani namaka aminji.