Yobu 41 - IBAYIBOLO 2024

¹ Nkimba ungayisikula inyivwila ni ndobani pamo ukulupinya ululimi lwache nu lukusa?

² Nkimba ungabika ulukusa mumpuno yache pamo ukuyidobola muchikende chache ni ndobani?

³ Nkimba ungayilaba ukuti yikupelele ichisa? Nkimba anganena amazyu amiza?

⁴ Nkimba yingafingana nawe ukuti yibanje muzya wako bwila na bwila?

⁵ Nkimba ungangala nayo ngati kayuni pamo ukuyipinya ni minyololo ukuti abambombo bako abalindu bangalaye nayo?

⁶ Nkimba abakughula bangayighula? Nkimba bangayigabannya inyama yache pakasi pabaghulizi?

⁷ Nkimba ikwela lyache pamo umutu wache ungalasa nimpalala?

⁸ Nanti wabika inyobe yako panyivwila, po winong'one mumo ungalwila nayo nukukumbuka ukuti utakwiza pakwandizya sona!

⁹ Wesi yuyo ayennya inyivwila amaka ghache ghosi ghakumala po akuwa pasi.

¹⁰ Atalipo umuntu nayumo uwakoghofya yuyo angayanda. Nkimba wewenu yuyo angima pantazi pane?

¹¹ Wenu yuyo angalwana nayo nukuyipota? Ivintu vyosi pachisu ichapasi vyane.

¹² Ntakwiza pakupotwa pakunena ivigaba vya mubili wache, amaka ghache nu bukulu bwache.

¹³ Nkimba wewenu angakasa ikwela lyache? Nkimba muntu wenu yuyo anginjizya impalala mwikwela lyache?

¹⁴ Nkimba wewenu yuyo angighula ivikende vya mulomo wache, mumo muli amino ghache aghakoghofya?

¹⁵ Inyuma yache yili ni mizele iya ngulu iyakulematilana poka;

¹⁶ yosi ilematilanite niyamwabo umwakuti patalipo impepo iya kwenda pakasi.

¹⁷ Zipizanizye poka; zilematilanite poka zitangalesannyiwa.

¹⁸ Ukutyesemula kwache kukufumya ubuzelu; amaso ghache ghali ngati buzelu ubwa pandabindabi nkani.

¹⁹ Mumulomo wache mukufuma indimi izya moto ngati tusoko; indimi izya moto tukupanta ukufuma mumwache.

²⁰ Ilyosi likufuma mumpuno zyache ngati mizi musonta aghakusebukila pamoto uwa ntete.

²¹ Umuyi wache wukupemba amazimwa bulo, Ukupanta ukwa moto kukufuma mumulomo wache.

²² Musingo yache mo muli amaka; po ukoghofya kukulongolela pantazi pache.

²³ Inyama yache yilematilanite; yamaka sona yitakuyingana.

²⁴ Ichifuba chache chikalite ngati libwe, chikalite ngati lwala lwakusyelapo.

²⁵ Nanti Yikunyamuka mumwanya, abamaka bakutetema; nanti yakwezya umusinda wache abantu bakuvulungana.

²⁶ Napo wepanga pamo impalala pamo akalasilo vitangayivulazya.

²⁷ Ichela yikuchipela ngati lisote numukuba wepe ngati likwi lyakubola.

²⁸ Utulasilo tutangayichimbizya pachifukwa ichakuti kukwache amabwe agha fyata ghakuba bulo ngati lyelelo.

²⁹ Intughu kukwache yili ngati mapeta; iyene yikuseka bulo nanti abantu bakuyilasa ni mpalala.

³⁰ Ulwanda lwache luvwinkiwe nutupapa, akung'anamula amatope ngati chela chakukomelapo ingano.

³¹ Akubupela ubwibizu ubwa nyanja pakusebukila ngati mizi agha musonta pamoto, po akuyipela inyanja pakuba ngati sonta iya mafuta aghakupakala.

³² Mumo yenda mukuba umuzeli uwa mizi agha kumekuka; yumo anginong'ona ukuti inyanja yaba nivwi.

³³ Muchisu mute ichakukolannya nayo, chipeliwa chicho chite nubogha.

³⁴ Ivipeliwa vyosi ivya maka yikuvyenezya pasi; iyene inyivwila yo ya mwene pa vipeliwa vyosi vivyo vikwituvya.