Yobu 40 - IBAYIBOLO 2024

¹ U Mwene akamubuzya u Yobu akati:

² “Wee Yobu, nkimba ukulonda pakudalinkana nane ne Wamaka Ghosi? Umuntu yuyo akulonda pakususannya nu Chala weyuyo amulaye!”

³ Po u Yobu akamwamula u Mwene akati:

⁴ “Ane ntabaghiye, po nkimba ningakwamula bulibuli? Awe, nachimochimo, loli indemite bulo pamulomo wane.

⁵ Nkanena bulo lyoka, loli inte ni lyamulo nalimolimo. Nkanena sona akabubili, loli ntakwiza pakunena sona.”

⁶ Po u Mwene akanena nu Yobu mukankungu akati:

⁷ “Banga we mwanavuli, nkwiza pakukulalusya amalalusyo, po unyamulaye.”

⁸ “Nkimba ukulonda pakumpima ukuti inangite? Nkimba ukulonda pakundonga ukuti inangite?” Loli awe ubanje we mugholosu.

⁹ Nkimba inyobe yako yiyanite niya Chala sona izyu lyako likajilimisya ngati lyache?

¹⁰ Nanti zili bunubu wiyipe wemwene ubumwene nu muchizi, po wivwalike ubuchindamu nu bwiza.

¹¹ Umuwisizye ubukali bwako umuntu wesi uwa mituvyo nukumwisya pasi

¹² umwenelezye umuntu wesi uwa mituvyo nukumukozya isoni, nukubasya ababibi bosi papo bimiliye.

¹³ Ubasyile bosi poka mulufumbi; nukubanyembetelela ivyeni vyabo muchisu icha bantu abafwe.

¹⁴ Po ane nkwiza pakwitika pakuti inyobe yako indilo yingakupoka.

¹⁵ “Winong'one nizya ivughu yiyo nkayipela umwakuyana nawe, yiyo yikulyanga isote ngati ng'ombe.”

¹⁶ Ennya Ivughu yili na maka, sona zyope inkole zyache zyamaka.

¹⁷ Umusinda wache ghukwimilila ngati likwi ilya mwale; inkole izya impatapata zyache zimamatilanite poka.

¹⁸ Amafupa ghache mafupa makafu nkani ngati mukuba, ivinama vyache vili ngati mitaliko iya chela.

¹⁹ Ivughu cho chinyamana chikulu nkani pavipeliwa ivya Chala, loli ane ne Mupeli wache yuyo akamupela amupalamike kwa panga wache.

²⁰ Yikulyagha isote mumaghamba kuko ivinyamana vyosi vikwangalako.

²¹ Yikulambalala muntende mwikwi ilya mwivwa, nukuvwama mukasi muntete mumizi.

²² Amabale na mafyomi ghakumufisa mukazunda kabo; po mulubazu mukasoko kamuzyungulile.

²³ Nanti ulusoko lwavundumuka, atakunyila napo panandi; napapo amizi agha mulusoko ulwa Yolodani ghafike pamulomo wache, loli atakutetema.

²⁴ Nkimba wewenu yuyo angamutuzula amaso, pamo pakumulema ni chipingo nukumudobola impuno?