Yobu 4 - IBAYIBOLO 2024

Ukunenezannya ukwakwanda 4.1—14.22 Amazyu agha Elifazi

¹ Po u Elifazi wamu Tema akati,

² “Nanti umuntu yumo angajimba pakunenapo zimo,” nkimba chingakuvulazya mumoyo? Loli wewenu yuyo angaba bulo myee?

³ Inong'ona namumo ubamanyisizye abinji, namumo ubakazizye abadedebazu.

⁴ Amazyu ghako ghakabakazya bosi babo bakipunula, nukuvikazya ivimpevu vivyo vikatetemagha.

⁵ Loli intamyo zyakuwila, po wawa amaka. Intamyo zyakwagha, ilelo wavulala mumoyo.

⁶ Nkimba ukumunyila kwako u Chala kutangakukazya, nkimba ubugholosu bwako butangakupa ulusubilo?

⁷ Losi ulu inong'ona akiza: Nkimba alipo umuntu yuyo ate na kalema nakamokamo yuyo afuyepo? Nkimba ukabennya ko kwiyi abantu abagholosu bakukomana nintamyo?

⁸ Ngati mumo nkwenezya, abantu babo bakubyala ububibi, nukupesa intamyo, bakwinula intamyo zilazila.

⁹ Ngati mumo impepo iya maka yikunanganizizya ivintu, umwakuyana bulo u Chala akubanyampannya nu bukali bwache.

¹⁰ Napapo abantu ababibi bangabuluma ngati zyo nkalamu, loli u Chala akuzikula amino.

¹¹ Inkalamu yingafwa nanti ichakulya nachimo, po utwana twache tukanyampana.

¹² “Isiku limo nkivwa ukuteketa, amakutu ghane ghakivwa ukuteketa kulakula.”

¹³ Pabusiku ichilota chikantamya nkani, bo abantu bali mutulo utwa kufwa nato.

¹⁴ Nkatetema pachifukwa icha bogha, amafupa ghane ghosi ghakaneng'ena.

¹⁵ Panapo impepo yikadumusannya pamaso ghane, isisi zyane zikanywililika.

¹⁶ Impepo yila yikima, loli ntakayaghannya akiza. Impepo yilayila yikimilila kuntazi kwane, po nkivwa izyu ilyamaka likuti:

¹⁷ Nkimba umuntu yuyo akufwa, mugholosu ukumuchila u Chala? Nkimba umuntu angaba muzelu ukumuchila Umupeli wache?

¹⁸ Nanti u Chala atakubasubila ababombi bache, nukubagha na kalema abantumi bache,

¹⁹ po zingaba bulibuli na bantu babo bakwikala munyumba izya kumata, zizyo ulwalo lwache lufumbi, sona zizyo zikumongoka lubilolubilo ngati lumpezu.

²⁰ Pandabindabi umuntu angaba mumi loli angafwa ni chamabwila chitafikite.

²¹ Vyosi vivyo ali navyo vikumala, po akufwa umusita mahala.