Yobu 39 - IBAYIBOLO 2024

¹ “Nkimba ukamenye akabalilo, kako imbuzi izya mumaghamba zikupapila utwana, sona uzyenizyepo lumo bo imbabala zikupapa utwana?

² Nkimba ukubelengelagha amezi ghagho zikupapilagha? Nkimba ukamenye akabalilo kako zikupapilagha?

³ Zikufughamagha pasi nukupapa utwana; po ububazu bukumalila palapala.

⁴ Utwana twabo tukuba na maka, sona tukukulila munkolongo mulamula. Tukwepapo pabuzilo bulabula, po tutakunyokela sona kwa nyina.

⁵ “Nkimba wewenu yuyo akuyisatula impunda ukuti yibukaye bulo? Nkimba wewenu yuyo akayisatula inkusa?

⁶ Yuyo nkamupa inkolongo pakuba kaya kache, mumakombe agha mbeya pakuba apakwikalapo pache.

⁷ Achibengite ichongo icha mukaya akakulu, atakwivwanga ukukolomoka ukwa bendezya ingolo.

⁸ Akwendakwendagha mumaghamba mosi pakulonda isote, sona ni chintu chosi ichiteta.

⁹ “Nkimba imbogho yingitika pakukubombela? Nkimba yingalambalala muchibagha chako pabusiku.

¹⁰ Nkimba ugayipinya nu lukusa, nukuyipela pakuba yakulima mumakombe kwisinda kwako?

¹¹ Nkimba ungeghamila kukwache chifukwa ichakuti amaka ghache makulu? Nkimba ungamulekela imbombo zyako impalapala?

¹² Nkimba ungamusubila pakukwizila ni mbeyu nukuyibungannya pabuzilo ubwakukomelapo inyinulo?

¹³ “Ivipapande ivya ntibantiba vikupupuka nu lusekelo, loli yitangayana ni nyangenyange pakubuluka.

¹⁴ Yikutela amafumbi ghache pasi nukughaleka ukuti ghatukilaghe mumusesenga,

¹⁵ yikuluvya pakuti ichinama chingaghatikitannya ukuti inyama izinji zingaghakanyannya.

¹⁶ Yikubalema ububibi abana bache ngati tebana bache; yitakupasikizyako ukuti imbombo yache yikukomanika,

¹⁷ pakuti u Chala akiyipela ukuti manyi yibanje na mahala pamo ukuyipa ichigaba ichakuvimanya ivintu.

¹⁸ Loli nanti yikukuzula ameya ghache ukuti yichimbile, yikuyipota ifalasi poka na yuyo akukwelapo.

¹⁹ “Nkimba wewe ukuyipa ifalasi amaka ghache pamo ukuyivwika isingo amaka ghache?

²⁰ Nkimba wewe ukuyikalalizya ngati we kanta, nukuboghofya abantu nukukonona kwache?

²¹ Ifalasi yikufukula ni chikanyilo chache, po yikwitutumula na maka ghache nukukomana na balwani.

²² Yikubusekela ubogha atalipo upanga yiyo abaghiye ukuzinyosezya kuko zikubuka.

²³ Ivilwilo vivyo banyamuye abakukwelapo pafalasi, impalala ni ngulu vikumekuka.

²⁴ Ifalasi zikutetema nu bukali zikuchimbilila kuntazi, nanti zyivwa ukulila ukwa ipati zitangimilila.

²⁵ Nanti ipati likulila, akuti, ‘Aha!’ Izyene zimenye pakwivwa umunusi uwabwite kubutali sona zikwivwa nanti usongo uwabwite akwitizya ivilundilo ivya bwite.

²⁶ “Nkimba ubaghiye pakumumanyisya u kapula pakubuluka nukukuzulila ivipapande vyache umwakwennya kuntende?

²⁷ Nkimba wewe ukulibuzya izwanga ukuti likwele kumwanya nukuzenga ichivulumbo chache pamwanya?

²⁸ Likwikala mumabwe nukuzenga ichivulumbo chache mumamabwe amatali ghagho lupaso lwache.

²⁹ Ukufuma mulamula likulondagha ichakulya chache; amaso ghache ghakuchenezya pabutalipo.

³⁰ Abana bache bakung'welagha ibanda; po kosi kuko kuli imivimba lyope likuba kulakula.”