Yobu 37 - IBAYIBOLO 2024

¹ “Pa ichi umoyo wane wukukoma nukunyelamo mubuzilo bwache.

² Teghelezya! Ivwa ukubuluma ukwa izyu lyache, nukujilimisya kuko kukufumagha mumulomo wache.

³ Akukatuma akamesya pachisu chosi ichapasi, nukukafisya kubumalilo ubwa chisu.

⁴ Pisinda pache pakwiza ukujilimisya kwache; akujilimisya nizyu ilya maka nkani. Po atakukanizya ukujilimisya kula nanti izyu lyache livwika.

⁵ Izyu ilya Chala likujilimisya umwakuswighisya; akubomba ivikulu nkani vivyo tutangivwisya.

⁶ Akukabuzya akabefu akuti, ‘Wanga pachisu ichapasi,’ nukuyibuzya ivula iyakusalasata ukuti, ‘Timagha nkani.’

⁷ Umwakuti abantu bosi babo akabapela bazimanye imbombo zyache, akubakanizya abantu pakubomba imbombo zyabo.

⁸ Ivinyamana vikuvwamagha kumpanga nukwikala mulamula.

⁹ Ukankungu akwiza ukufuma kuntende nukukatala kukufumila mumpepo iyakumitu.

¹⁰ Umuyi uwa Chala wukukatazya amizi, nukughapela pakuba libwe.

¹¹ Akughizuzya amabingu na mizi agha vula, akukanyampannya akamesya ukwendela mumabingu.

¹² Amabingu ghakuzyungulilazyungulila pachisu chosi nukubomba chosi chicho aghalamula.

¹³ Akutimizya ivula ukuti abafunde abantu, pamo ukusembelela ichisu ichapasi pakulanjizya ulughano lwache.

¹⁴ Wee Yobu ivwa kuno, sona winong'onelaye bulo iviswigho ivya Chala.

¹⁵ Nkimba umenye namumo u Chala akughalamulila amabingu, sona weyuyo akupela utumesya?

¹⁶ Nkimba umenye namumo amabingu ghakwembamila mumwanya, iviswigho ivya yuyo wamahala aghanaloli?

¹⁷ Wewe ukwivwa ukutukila mumenda ghako bo impepo iyakuntende yili pakuputa pachisu ichapasi?

¹⁸ Nkimba awe ungayana nu Chala yuyo akaghakuzula amabingu, ghagho ghakalite ngati mukuba?

¹⁹ “Tubuzye zizyo tungamubuzya; aswe tutanganena nachimochimo nizya nongwa yitu pakuti tuli bulo muchisi.

²⁰ Nkimba angabuziwa ukuti nkulonda pakunena nawe? Nkimba umuntu wesi angalaba ukuti ananganike?

²¹ Polelo atalipo nayumo yuyo angennya kwizuba mumo likumekukila swee kumwanya po impepo yikwiza nukupyelapo amabingu ghala pakuba maswepu.

²² Kumitu kukufuma ugolide umwiza nkani, u Chala ivwalikite ubuchindamu ubwakoghofya

²³ Uwamaka Ghosi tutangamupalamila, pakuti mukulu, sona wamaka. Mubugholosu bwache atakubayivya abantu.

²⁴ Po abantu bakumunyila u Chala atakumupasikizyapo nayumoyumo umuntu uwa mahala.”