Yobu 36 - IBAYIBOLO 2024

¹ Po u Elihu akendelela pakunena ukuti:

² Nyitikizya panandi bulo, po nkwiza pakukumanyisya ukuti vilipo ivyinji nkani ivyakunena mubuzilo ubwa Chala.

³ Amahala ghagho indi nagho minji nkani; nkwiza pakumulanjizya ubwanaloli Umupeli wane.

⁴ Naloli intakutamanta, pakuti ne muntu uwamahala aghanaloli.

⁵ U Chala wa maka, loli atakumusamula umuntu nayumoyumo; wamaka, sona avimenye vyosi.

⁶ Atakubitikizya ababibi ukuti babanje nubumi loli abapina akubabombela mubwanaloli.

⁷ Abagholosu akubenelezya akabalilo kosi. Akubikazya pavitengo ivya bumwene, nukubakwezya bwila na bwila.

⁸ Loli nanti abantu bapinyiwe ni minyololo, nanti bapinyiwe ninkusa izya mayimba,

⁹ akubabuzya zizyo babombite, ukuti bananganike pachifukwa icha mituvyo.

¹⁰ Akubighula amakutu ukuti bivwe bo akubachemela, nukubalamula ukuti bazileke imbibi zyabo.

¹¹ Nanti bakumwivwila nukumubombela, ivintu vikwiza pakubendelagha akiza amasiku ghabo ghosi nukumalizya amaka ghabo mubuhobosu.

¹² Loli nanti batakwivwila bakwiza pakughoghiwa nupanga, sona bakwiza pakufwa ukusita kumanya nachimochimo.

¹³ Abantu babo batamumenye u Chala bakusunga ubukali mumoyo ghabo; loli batakulila pakulaba ubwavwilizi, napapo akubafunda.

¹⁴ Bakufwa bo bachili bateta bulo, sona ubumi bwabo ubumalilo bwache bukuba bwakukozya isoni.

¹⁵ Loli babo bali pakutamiwa akubefyamo muntamyo zyabo; akunenagha nabo bo bali mumayimba ghabo.

¹⁶ Akwefyamo muntamyo, nukukubika mubwiza, kuko akukwikutisya ni vyakulya ivyiza.

¹⁷ Loli ilelo wapalaghula inongwa ngati bantu ababibi, polelo u Chala akuwisizya ulufundo ulwanaloli.

¹⁸ Uchebaye ukuti umuntu atakakudebaye nu bukabi; utakaghitikizyanje amabeko ukuti ghakuzimbulaye.

¹⁹ Nkimba ubukabi bwako pamo amaka ghako, vingakupoka muntamyo?

²⁰ Utakabunyonywanje ubusiku, pakuti ko kabalilo kako abantu bakunanganika.

²¹ Uchebaye ukuti utakanyokelaye kububibi, pakuti imbibi zyo zizyo zikwiza pakukuwisizya intamyo.

²² Naloli u Chala mukulu sona wamaka. Nkimba mumanyisi wenu yuyo ayanite nawe?

²³ Nkimba wewenu yuyo angamubuzya u Chala ichakubomba, pamo ukumubuzya ukuti, “Unangite?”

²⁴ Ukumbukaye pakuzipala imbombo zyache, zizyo abantu bakuzipala pakumwimbila inyimbo.

²⁵ Abantu bosi bazyenizye; loli bazyenezizye bulo pabutali.

²⁶ Naloli u Chala mukulu, umwakuti tutangamwivwisya! Sona amaka ghache ghatangabelengiwa.

²⁷ Akughakwezezya mumwanya amizi agha munyanja akughasungulusya amabingu pakuba vula.

²⁸ Amabingu ghakuwisya ivula, ivula inyinji yikuwa pamuntu.

²⁹ Nkimba wewenu yuyo angazyaghannya namumo akughakuzulila amabingu, namumo ukupayila muchisakasa chache?

³⁰ Ennya namumo akunyampanizizya akamesya kumwanya, nukukibizya mupaka pasi panyanja inyibizu.

³¹ Umu momumo akuzilaghila inko nukuzipa ivyakulya ivyinji nkani.

³² Akalemite akamesya munyobe zyache, nukukalamula papo kangawila.

³³ Ukujilimisya kwache kukufumusya ivula iya mabwe; napapo ing'ombe zikumanya ukuti yikwiza.