Yobu 35 - IBAYIBOLO 2024

¹ Po u Elihu akati:

² “Nkimba ukwinong'ona ukuti ukubomba akiza? Awe ukutinji, ‘Ane ne mugholosu pamaso pa Chala.’

³ Loli ukumulalusya ukutinji, ‘Nkimba ningakabapo ichoni nanti intakunanga?’

⁴ “Nkulonda pakukwamula awe na bamanyani babo bali poka nawe.

⁵ Inusizya umutu wako kumwanya, po wennye amabingu ghagho ghali kubutali nkani nawe.

⁶ Nanti ukananga, nkimba chikumupalamasya bulibuli? Nanti imbibi zyako nyinji, nkimba ali nazyo na mbombo yoni?

⁷ Nanti we mugholosu, nkimba ukumupanga ichoni, pamo inyobe zyako zikumupokezya ichoni?

⁸ Imbibi zyinyu zikumupalamasya muntu ngati wewe, sona ubugholosu bwako bukubapalamasya bulo abana aba bantu.

⁹ “Abantu bakulila pachifukwa icha mayimba; bakumulaba umuntu uwamaka ukuti abapepulayeko.

¹⁰ Loli atalipo nayumo yuyo akutinji, ‘Nkimba ali ko kwiyi u Chala Umupeli wane, yuyo akutupa inyimbo pabusiku?

¹¹ Yuyo akutumanyisya ivyinji nkani ukuvichila ivinyamana ivya muchisu ichapasi sona akutupela pakuba twe bamahala nkani ukuvichila iviyuni?’

¹² Atakwamula nanti abantu bakumulilila pachifukwa icha kwituvya ukwa bantu ababibi.

¹³ Naloli u Chala atakuteghelezya ukulambilizya kwabo kwa bulo; Uwamaka Ghosi atakubikilaghako umoyo.

¹⁴ Awe ukunena ukuti, u Chala atakunyennya, nukuti inongwa yane yili pantazi yache po umulindililaye.

¹⁵ Ukwinong'ona ukuti u Chala atakubafunda abantu, nukuti atakwinong'onelako kumbibi.

¹⁶ Po u Yobu akwighula umulomo wache na mazyu amasita mbeya; nukubalizya amazyu aghamwalwemwalwe.”