Yobu 34 - IBAYIBOLO 2024

¹ Po Elihu akati:

² Mwee bantu abamahala, ivwa amazyu ghane; tegha amakutu, amwe mwe bamanyi.

³ Pakuti amakutu ghakughivwisya amazyu ngati mumo ululimi lukuyezezya ichakulya.

⁴ Leka twisalile twebene chicho chigholosu; leka tumanyilaye poka chicho chiza.

⁵ U Yobu akuti, “Ane inte ninongwa nayimoyimo, loli u Chala atakundongelagha mubwanaloli.

⁶ Napapo ne mugholosu, pope bulo nkupimiwa pakuba ne mumyasi. Napapo inte na kalema nakamokamo, pope bulo utulasilo twache twampelela inkonko.”

⁷ Nkimba alipo yumo yuyo ayanite nu Yobu, yuyo akupokela umusamu ngati po akung'wela amizi?

⁸ Akwenda poka na babomba mbibi; akumanyana na bantu ababibi.

⁹ Pakuti akuti, “Chitakumukabilapo nachimochimo umuntu, nanti akuyezya pakumuhobosya u Chala.”

¹⁰ Po ivwa kuno mwe bantu abakwivwisya ivintu. Naloli u Chala atangabomba ichintu ichibibi, sona Uwamaka Ghosi atangananga napo panandi.

¹¹ Akumupa umuntu umuvwalo ukuyana ni mbombo zyache; akumubombela umuntu ukuyana ni nkalo yache.

¹² Naloli u Chala atangabomba ichintu ichibibi, sona Uwamaka Ghosi atangabunyongannya ubwanaloli.

¹³ Nkimba wewenu yuyo akamusala ukuti alaghilaye pachisu ichapasi? Nkimba wewenu yuyo akamubika pakuba we kapitawa, ukuti enelezyanje pachisu chosi ichapasi?

¹⁴ Nanti u Chala angefyamo umuzimu nu muyi wache,

¹⁵ po ivyabumi vyosi ngali vifuye poka nu muntu, po umuntu ngali anyokeye kwitope.

¹⁶ Nanti mwe bakwivwisya ivintu, ivwa kuno; teghelezya vivyo nkunena.

¹⁷ Nkimba yuyo abubengite ubwanaloli angalaghila? Nkimba ungamupa inongwa u Chala umugholosu nu Wamaka?

¹⁸ Nkimba te weyuyo akubabuzya abamwene ukuti, “Amwe mute nite mbombo nayimoyimo?” Akubabuzya abalaghili ukuti, “Amwe mwe babibi.”

¹⁹ Atakwennya icheni nanti akubalonga abana aba bamwene sona atakulanjizya ulusalo pakasi pa bakabi na bapina, pakuti bosi akabapela ni nyobe zyache?

²⁰ Mukabalilo akapimpa bulo bakufwa, pakasi pabusiku; abantu bakuvulungana nukufwa. Abantu abamaka bakubafyula ubumi bwabo umwakusita ukubombezya amaka.

²¹ Amaso ghache ghakwenelezya izila izya bantu; akukennya akendele kabo kosi.

²² Kutaliko ichisi ichakoghofya, kuko ababomba mbibi bangavwamako.

²³ U Chala atamubikiye umuntu akabalilo, ukuti izaye pamaso papache pakulongiwa.

²⁴ Atakubuzikizya nanti akulonda pakubefya abalongozi nukubimikilapo abanji.

²⁵ Pakuti azimenye imbombo zyabo, akubanangannya pabusiku nukubasya.

²⁶ Akubafunda pachifukwa icha kunanga kwabo bo abantu bosi bakubennya,

²⁷ pachifukwa ichakuti balekite pakumwivwila, sona batakaghakonkagha amalamulo ghache.

²⁸ Bakakupela ukulila ukwa bapina ukufika pamaso pa Chala, umwakuti akivwa ukulila ukwa bantu abapotwe.

²⁹ Loli nanti naloli u Chala abanga bulo myee, nkimba wewenu yuyo angamupa inongwa? Nanti angafisa icheni chache, nkimba wewenu yuyo angamwennya? Pope bulo weyuyo akumusungilila umuntu, sona ni inko zyosi umwakuyana bulo,

³⁰ umwakuti umuntu yuyo atamumenye u Chala atakalaghilaye, sona nukuti atakabateghaye abantu ivipingo.

³¹ Nanti umuntu akunena kwa Chala ukuti, naleka, ntakwiza pakunanga sona.

³² Umanyisye zizyo intangazyennya, nanti imbombitepo chimo ichibibi, ntakwiza pakwandizya sona.

³³ Nkimba u Chala abalongaye ukuyana na kinong'onele kinyu, bo mukukana pakuzileka imbibi zyinyu? Mwisalile mwebene, te nene awe; po umbuzye zizyo uzimenye.

³⁴ Abantu abakwivwisya ivintu bakwiza pakwitinkana, abantu abamahala babo bakunyivwa bakwiza pakumbuzya ukuti,

³⁵ “U Yobu akunena umwakusita ukumanya, amazyu ghache ghamwalwemwalwe.”

³⁶ Chame chiza ngali u Yobu ayeliwanga mupaka pabumalilo pachifukwa ichakwamula ngati muntu umubibi!

³⁷ Pa mbibi zyache onjelezizyepo ukusambuka; akakoma inkufi zyache mumusamu pakasi papitu nukudalinkana nu Chala amazyu aminji nkani.