Yobu 33 - IBAYIBOLO 2024

¹ Wee Yobu, loli teghelezya amazyu ghane; ivwisya nkani vyosi vivyo nkunena.

² Nkulonda ukwighula umulomo wane, pakunena ichakusingo yane.

³ Amazyu ghane ghakufuma mumoyo umugholosu; imilomo yane yikunena ubwanaloli bubo imbumenye.

⁴ Umuzimu uwa Chala gho ghugho ghukampela, sona umuyi uwa Wamaka Ghosi ghukumpa ubumi.

⁵ Nanti unganyamula, unyamule wiyannye wemwene pakwiminkana nane.

⁶ Ane nawe tuyanite bulo pamaso pa Chala nane bulo nkapeliwa kwitope

⁷ Po utakanyilaye, pamo ukutetema nane.

⁸ Naloli amakutu ghane ghivwa zizyo wanena,

⁹ “Ane inte ninongwa, sona inte ni mbibi, inte na kalema nakamokamo, sona intanangitepo.

¹⁰ Loli u Chala anyagha ni vifukwa ivyakuti ansusye navyo; akumpima pakuba ne mulwani wache.

¹¹ Akuvipinya ivinama vyane ni minyololo, akwenelezya akendele kane kosi.”

¹² Naloli nkukubuzya ukuti pakubomba bunubu, wananga, pakuti u Chala mukulu ukumuchila umuntu.

¹³ Nkimba choni chicho ukudalinkana nu Chala nukuti, “Atakwiza pakwamulapo nachimochimo pamazyu ghane?”

¹⁴ Pakuti u Chala akunena muzila izyakulekanalekana, napapo umuntu atangazyaghannya.

¹⁵ Muvilota na muvisetuka pabusiku, bo abantu bali mutulo utukulu nkani, sona bo balambalaye muvitala vyabo,

¹⁶ palapala angabateketela nukuboghofya ni soki.

¹⁷ U Chala akubomba zinizi ukuti umuntu aleke imbibi zyache, nukuti aleke ukwituvya kwache kosi,

¹⁸ ukuti amupokaye umuntu kwipumpa, sona nubumi bwache kwa panga uwakunangannya.

¹⁹ Pamo angamufunda umuntu nu bubine bo ali pachitala pamo ukwizuzya umubili wache nu bubavu,

²⁰ umwakuti umoyo wache ghukuselukagha ni vyakulya sona akusalaghasalagha ivyakulya ivyakunona bulo.

²¹ Umubili wache ghukughanda bulo ilelo asyala mafupa ghene.

²² Umoyo wache ghukupalamila kwipumpa, sona ubumi bwache bukubuka kuchisu icha bafwe.

²³ Lumo kungaba uwantumi weka kulubazu lwache uwakumwavwa, weka uwa mubantumi 1,000 aba Chala, pakumubuzya umuntu chicho chiza,

²⁴ pakumupelela ichisa nukuti, “Umupoke ukuti atakabukaye kwipumpa; pakuti nachagha ichakwiyipa ichakupepesezya imbibi zyache,

²⁵ po umubili wache wanyokelamo ngati uwa mwana; wanyokelamo ngati mumo ghukabela ku bulumendo bwache.”

²⁶ Akwiputa kwa Chala po akumupelela ichisa, akwennya icheni icha Chala nukuhoboka. U Chala akumunyosezyamo pakuba mugholosu.

²⁷ Po akwiza pamaso pabantu nukuti, “Ane nkananga pakubunyongannya ubugholosu, loli intakapokela chicho nkachilondagha.

²⁸ Akabupoka ubumi bwane kwipumpa, po nkwiza pakuba nubumi nukwilagha ulukozyo.”

²⁹ U Chala akumubombela umuntu zyosi zinizi, kabilikabili

³⁰ pakubupoka ubumi bwache kwipumpa umwakuti ulukozyo lwabumi lumulamilaye.

³¹ Wee Yobu, tegha amakutu kuno, unteghelezye; banga bulo myee, umwakuti inenepo zimo.

³² Nanti uli nacho chimo ichakunena, unyamule; nenagha pakuti nkulonda ukuti ubanje we mugholosu.

³³ Loli nanti ute ni chakunena, po unteghelezye; banga bulo myee, nkumanyisye amahala.