Yobu 32 - IBAYIBOLO 2024

Amazyu agha Elihu 32.1—37.24

¹ Po abantu batatu banaba bakaleka pakumwamula u Yobu, pachifukwa ichakuti akipimagha pakuba muntu mugholosu.

² Loli u Elihu umwana uwa Balakeli uwamu Buzi, uwaluko uwa Lamu, akamukalalila nkani u Yobu pachifukwa ichakuti akipima mwene mugholosu ukumuchila u Chala.

³ Akabakalalila nkani abamanyani bache batatu bala, pachifukwa ichakuti bakapotwa pakumwamula u Yobu, napapo bakazyaghannya ukuti anangite.

⁴ Polelo u Elihu akaba bulo myee ukulindilila ukuti anene nu Yobu, pakuti abanji bala bakaba basongo ukumuchila.

⁵ Loli akakalala bo ennya ukuti abantu batatu bala batakamwamula u Yobu umwakufikapo.

⁶ Po u Elihu umwana uwa Balakeli uwamu Buzi akamula akati: Ane ne mwana, amwe mwe basongo; cho chifukwa nkanyila, sona ntakajimba pakubabuzya zizyo inzimenye.

⁷ Nkinong'onagha ukuti, “Abasongo bo babo bande pakunena, abavula intazi bo babo bamanyisyanje amahala.”

⁸ Loli u Muzimu uwa Chala Uwamaka Ghosi, gho ghugho ghukwinjila mubantu, nukubapa amahala.

⁹ Te basongo bene babo bali na mahala awe, pamo abaghosi bene babo bakwivwisya ivintu umwakufikapo.

¹⁰ Polelo nkuti: Nteghelezya, nane bulo nkwiza pakubabuzya zizyo inzimenye.

¹¹ Nkaba bulo myee bo mukunena, nkateghelezya ku mazyu ghinyu agha mahala, bo muli pakulingannya.

¹² Nkabateghelezya nkani Loli patakabapo nayumoyumo yuyo akamususya u Yobu, sona nayumoyumo yuyo akighula umulomo.

¹³ Muchebaye mutakanenaye, “Twaghagha amahala; leka u Chala we amupote, umuntu awe.”

¹⁴ Loli u Yobu atanenitepo nane, po ntangamwamula ngati mumo mwamuliye.

¹⁵ Wee Yobu, abantu banaba bavulungana sona bate ni chakunena nachimochimo.

¹⁶ Nkimba indindililaye pachifukwa ichakuti batakunenapo, chifukwa imiliye bulo myee palapala?

¹⁷ Nane bulo indi na mazyu aghakuti inene; nkwiza pakubabuzya zizyo nane bulo inzimenye.

¹⁸ Indi na mazyu aminji nkani, sona umoyo wane ghukunfyenga ukuti inene;

¹⁹ mukasi indi ngati libotolo lilyo lizuye nu vinyo, ngati nyambi impya iya vinyo yiyo yili papipi pakupunta.

²⁰ Inenayepo ukuti intuzye; sona imbaghiye pakwighula umulomo wane nukwamula.

²¹ Ntakwiza pakwennya icheni icha muntu nayumoyumo, pamo ukunena umwakumuhobosya umuntu awe;

²² pakuti nanti nkaba ne muchevu, Umupeli wane ngali anfunda lunulu.