Yobu 31 - IBAYIBOLO 2024

¹ Nkafinga ulufingo na maso ghane, ukuti ntakwiza pakumunyonywapo umulindu.

² Nkimba u Chala uwakumwanya akumupa muvwalo ghoni umuntu wesi? Ichilingo chane chikufuma ku Wamaka Ghosi uwakumwanya.

³ Umukosi ghukumuwila umuntu yuyo mubibi, zyope intamyo zikubawila babo bakubomba ububibi.

⁴ Nkimba atakuzyennya izila zyane nukughabelenga amatamba ghane ghosi?

⁵ Nanti natamanta pamo ichinama chane chachimbilila pakubazimbula abantu,

⁶ Leka u Chala ampime ni chipimilo ichanaloli po akwiza pakuzimanya ukuti inte na kalema nakamokamo,

⁷ nanti napaghukamo muzila, nanti umoyo wane wanyonywanga vivyo amaso ghane ghavyennya, pamo nanti inyobe zyane zyapalamasya ivinyazu.

⁸ Po abanji balyanje vivyo napesa, sona zyope imbeyu zyane zinyunkuliwanje.

⁹ Nanti umoyo wane ghukadebiwapo nu mukolo, pamo nanti imuvwamiliyepo umupalamani wane pamulyango uwa nyumba yache,

¹⁰ po umuchi wane asyanje palwala lwabanavuli abanji, sona abanje chiziba icha mwanavuli wesi.

¹¹ Po chinichi ngali chaba chakukozya isoni, sona ngali yaba nongwa impalapala nkani

¹² ngati moto uwakulungulizya. Po ngali walungulizya inyinulo yane yosi.

¹³ Nanti nabapa inkonto ababombi bane abanavuli na bakolo, bo bakwilumbusya nane,

¹⁴ nkimba vikwiza pakuba bulibuli, bo nkwimilila pamaso pa Chala? Nanti akundalusya, nkimba nkwiza pakwamula bulibuli?

¹⁵ Nkimba u Chala yuyo akampela mulwanda ulwa mayi, te weyuyo wepe akabapela? Nkimba te weyuyo akatupela aswe twebosi?

¹⁶ Nanti nkabima abapina vivyo bakavilondagha pamo ukubaleka bulo abakolo abafwilwe muntamyo,

¹⁷ nanti nkwilyela nemwene ichibama, ukusita ukubagabilako abana abalanda,

¹⁸ loli ukwandila ko kubulumendo bwane nkabasungililagha abana abalanda ngati ne wise. Ukwandila pakabalilo aka kupapiwa kwane, nkabasungililagha abakolo abafwilwe.

¹⁹ Nanti namwennya umuntu yumo akuyimba pachifukwa ichakuti ate na menda, pamo umuntu umupotwe yuyo ate ni chakuvwinka,

²⁰ po atakampalizya pachifukwa ichakuti nkamusaya na menda aghakupangiwa na meya agha ng'ozi zyane,

²¹ nanti nkabazimbula abana abalanda, pachifukwa ichakuti abalongi bakaba kulubazu lwane,

²² po leka ichipunko chane chipyonkonkane, sona inyobe yane yipyokaye mumpingu.

²³ Pakuti nkunyila ulufundo ulwa Chala, sona pachifukwa ichakunyila ubuchindamu bwache, ane ntangabomba nachimochimo ichibibi pantazi papache.

²⁴ Nanti nabikagha umoyo wane pa golide pamo ukunena ku golide umwiza nkani ukuti, “Awe we ukunvighilila,”

²⁵ nanti nahobokagha pachifukwa icha bukabi bwane, bubo nkabwagha ni nyobe zyane,

²⁶ nanti nkanyonywa ukulama ukwa izuba pamo umwezi bo ukwenda mubuchindamu bwache,

²⁷ umwakuti umoyo wane ukavidebukila, sona nanti umulomo wane ukavifyofyonta pakuvichindika,

²⁸ po vinivi vyope ngali vyaba mbibi ukuti abalongi bandonge pachifukwa ichakuti ngali naba ne muntu, yuyo te musubiliwa pamaso pa Chala uwakumwanya.

²⁹ Nanti nkasekela bo umulwani wane ali muntamyo pamo nanti nkahoboka pachifukwa icha chighune chicho chikamuwila.

³⁰ Ntawitikizizye umulomo wane ukuti ghunangaye pakumughuna umulwani wane,

³¹ nanti abantu abamunyumba yane batanenitepo lumo ukuti, “Nkimba wewenu yuyo atikutitepo inyama iya Yobu?”

³² Loli patakabapo nayumo umuyeni yuyo aghonitepo mumusebo, pakuti akabalilo kosi akaya kane kakaba kighuke ku bayeni,

³³ nanti nkazifisa imbibi zyane ngati mumo bakubombela abantu abanji, pakufisa ukunanga kwane mumoyo wane

³⁴ pachifukwa ichakuti nkanyila nkani ichilundilo icha bantu, sona umusamu uwakufuma ku inko izya bantu umwakuti nkaba bulo myee sona ntakafuma kuzi.

³⁵ Mwee, nalondagha nkani nanti pakaba umuntu yumo uwakunteghelezya! Nkulapa ukuti nkunena ubwanaloli, po leka Uwamaka Ghosi anyamule. Nalondagha nkani nanti umulwani wane asimbagha ukalata uwa inongwa yane.

³⁶ Naloli ngali namupayikite chipunko chane, sona ngali namuvwalite ngati yo mpumpu.

³⁷ Ngali namubuzizye ipangwi ilya kendele kane kosi; ngali nizite pamaso papache pakuba ne mulongozi.

³⁸ Nanti nkiba bulo umughunda ghugho nkulima, nanti nkamufyula bulo umwenecho;

³⁹ nanti nalya ivikomwa vyache kusita kulipilapo, po abenecho bakukomiwa pachifukwa chane,

⁴⁰ po leka imivwa yimelaye mubuzilo ubwa ngano, sona isote mubuzilo ubwa mapemba. Amazyu agha Yobu ghamalila panapa.