Yobu 30 - IBAYIBOLO 2024

¹ Loli ilelo bakunyobezya, abantu babo bana banandi kukwane, babo abawise batabaghiye napo panandi pakuzyavwa imbwa pakudima ing'ozi.

² Nkimba amaka ghabo ghakaba ni mbombo yoni kukwane, pakuti amaka ghabo ghakabamalila?

³ Bakaba bantu abapina na bazala, pabusiku bakalyanga amagululuzi amumizu agha munkolongo.

⁴ Bakanyunkulagha utumakwi utwa munkolongo nukulya, sona bakalyanga amagululuzi amababe agha makwi agha vyisilo.

⁵ Bakabachimbizyapo pakasi pa bamwabo, nukubachemela ngati po biba.

⁶ Bakafyengiwa bulo pakwikala mumpako izya lusoko, muvibanka na mumpako kuntende kumabwe.

⁷ Bakulila ngati vinyamana ivya munkolongo sona bakubungana poka ngati vinyamana muntende umwa mpanya iya mivwa.

⁸ Abene bakaba bantu abadedebazu, abamwalwemwalwe babo bakabachimbizyamo muchisu.

⁹ “Po ilelo abana babo bakunyimba mulwimbo pakunyobezya, sona naba ne chili chabo.”

¹⁰ Ane nkubanyalisya, po bakwikala pabutali nane, batakuzyela pakunsamula pakufwinila amati kumaso.

¹¹ Pakuti u Chala ampela pakuba ne mudedebazu, sona umusita mbombo, po abene bakunena mwalwemwalwe bulo.

¹² Kunyobe yane iya ndilo abantu abamwalwemwalwe bakunyamuka nukunchimbizya, bakukumba ichiliba ukuti ingwilemo.

¹³ Bakunyighalila izila, pakuti bakulonda pakubunangannya ubumi bwane ukusita ukuti yumo abakanizye.

¹⁴ Bakwinjila ngati po pali ichidobozwi ichakudumusannyapo papo amabwe ghachili ghali pakuwa.

¹⁵ Ivyakoghofya vyangwila, bope ubuchindamu bwane bukumala ngati po mpepo, ubupoki bwane bukuzyebeluka bulo ngati po libingu.

¹⁶ Po ilelo indi papipi pakufwa indi pantamyo sona ntakutuzya.

¹⁷ Pabusiku nkwivwa ivya kulasa mumafupa ghane; sona ububavu butakumala.

¹⁸ Mumaka ghache amakulu nkani u Chala akaba ngati mwenda kukwane; akunnyenga ngati singo iya nkazo yane.

¹⁹ Akansumbila mumatope, po naba ngati lufumbi ni toyi.

²⁰ Wee Chala, nkukulilila loli utakunyamula, bo nkwiputa ukunyennya bulo.

²¹ Wanjivya nkani, na maka agha nyobe yako wanjivya nkani.

²² Ukankwezya mumwanya mu mpepo nukunyendezya, po ukangalabulannya kuno na kuno mu mpepo iyamaka yila.

²³ Inzimenye ukuti ukwiza pakunfisya kubufwe, kuko kwa muntu wesi.

²⁴ Naloli atalipo nayumoyumo yuyo akubika inyobe yache, bo akulonda ubwavwilizi muntamyo zyache, bo akulila ukuti bamwavwe.

²⁵ Nkimba intakabalilila abantu babo bakaba muntamyo? Nkimba umoyo wane ghutakabapelela ichisa abapina?

²⁶ Loli bo nkusubila bo bwiza, ububibi bukizagha, bo nkulondelezya ulukozyo, po ichisi chikizagha.

²⁷ Umoyo wane ghukubaba nkani sona ghutakutuzyapo, amasiku ghosi nkuba muntamyo.

²⁸ Nkwendakwenda bulo muchisi, bo izuba litakundamila, nkwimilila pakasi pachilundilo nukulaba ubwavwilizi.

²⁹ Ane naba ne mukamu uwa bakambwe, po sona naba ne mumanyani uwa masisimusi.

³⁰ Umubili wafita, sona ghutukiye pachifukwa icha zegema,

³¹ Ichinanda chane chaba chakulizya pachililo, sona ilonji lyane lyaba lizyu ilya babo bakulila.