Yobu 29 - IBAYIBOLO 2024

¹ Po u Yobu akendelela pakunena ukuti:

² Mwee! Ngali nabanga ngati mumo nkabela kale, mumasiku ghagho u Chala akanyenelezya,

³ bo inyale yache yikwaka pamutu wane, nulukozyo lwache nkadumusannyanga muchisi!

⁴ Mumasiku ghalaghala bo ivintu vikunyendela akiza nkani, ulusayo ulwa Chala lukaba munyumba yane.

⁵ Bo Uwamaka Ghosi achili ali nane sona bo abana bane bazyunguliye,

⁶ nkaba nu lukama ulwinji nkani ulwang'ombe ni mbuzi sona amakwi agha misyunguti ghakakulagha na mwilyalabwe bulo.

⁷ Bo nabuka pamulyango uwa kaya akakulu nkani nukwikala pabuzilo bubo bakabunganaghapo

⁸ abalumendo bakanyennya nukupaghuka muzila, po abasongo bakanyamuka nukwimilila,

⁹ abalongozi bakaleka pakunena, po bakighalila imilomo ni nyobe zyabo,

¹⁰ Abantu abamanyikwe bakasona imilomo, po wesi akaba ngati we chinunu.

¹¹ Bo abantu banyivwa, bakambuzya ukuti ne musayiwa, sona bosi babo bakanyennya bakampalizya,

¹² pakuti nkabapokagha abapina babo bakalondagha ubwavwilizi, na bana abalanda babo batakaba nayumo uwakubavwa.

¹³ Umuntu yuyo akaba papipi pakafwa akansaya, po nkabasangalusya abafwilwe ni nyimbo izya lusekelo.

¹⁴ Ichakuvwala chane chikaba bugholosu, ubwanaloli bukaba nkazo yane, sona bukaba chisote.

¹⁵ Nkaba ne maso gha bafwamaso, sona kubalemazu nkaba ne vinama vyabo.

¹⁶ Nkaba ne wise uwabapotwe, nkamulongela inongwa na yuyo ntakamumanyagha.

¹⁷ Nkakumpula amino agha babomba mbibi nukubapoka ku bantu babo bakabayivyanga.

¹⁸ Nkinong'onagha ukuti nkwiza pakufwila munyumba yane, amasiku ghane minji nkani ngati musesenga.

¹⁹ Amagululuzi ghane ghakwiza pakufika kumizi, ni nganda yikwiza pakuwa patusamba twane busiku bosi.

²⁰ Ubuchindamu bwane bukwiza pakuba bupya bwila na bwila, sona bope ubwele bukwiza pakuba bupya munyobe zyane bwila na bwila.

²¹ Abantu bakanteghelezya, nukwikala bulo myee bo bakulindilila zizyo ningababuzya.

²² Bo nanena batakanenepo sona, po amazyu ghane ghakabinjila.

²³ Bakandindililagha ngati bantu babo bakulindilila ivula, sona bakasama bulo imilomo yabo, ngati bantu babo bakulindilila ivula iya lupepo.

²⁴ Nkabamwemwetela bo bate nu lusubilo, loli icheni chane ichisangalusu chikabakazya.

²⁵ Nkabasalila izila yabo, nkikalagha pachitengo ngati ne mwene pakasi pabasilikali bache, sona nkaba ngati muntu yuyo akubasangalusya babo bakulila.