Yobu 28 - IBAYIBOLO 2024

¹ Naloliloli kuli umugodi uwa siliva sona nu buzilo bubo ugolide akusungunuliliwangako.

² Ichela chikukumbiwa mwitope, sona umukuba ghukusungunuliliwa kwibwe.

³ Umuntu akubombezya inyale muchisi, po akughalondelezya amabwe aghamutengo mupaka pasi nkani.

⁴ Abantu bakukumba umugodi kubutali kuko abantu batakwikalako, kubuzilo bubo abantu batakwendako; kuko bakuba bene bo balemite inkusa bakwelela.

⁵ Ivyakulya vikufuma mwitope, loli kuntende kuchisu kukupunta, ngati mabwe aghakocha numoto.

⁶ U safile akufuma mumabwe, Ulufumbi lwache luli nu golide.

⁷ Ghatalipo amazwanga ghagho ghakulya aghamwabo ghagho ghayimenye izila iya kulakula. Ilyiso lyope ilya ibimba litalyenizye.

⁸ Vyope ivinyamana ivya mituvyo vitakanyitemo, ni nkalamu yope yitadumusanizyemo.

⁹ Umuntu akubomba imbombo pibwe ikafu, po bakughaghalabula amaghamba ukwanda po palwalo lwache.

¹⁰ Bakukumba imifolo mwilyalabwe amaso ghache ghakwennya amabwe aghamutengo.

¹¹ Akulondelezya kuko isoko zifumiye sona akuvivumbula ivintu pabuzelu.

¹² Nkimba amahala ghangaghiwa kwiyi? Sona, nkimba ubumanyi bungaghiwa kwiyi?

¹³ Umuntu atakuyimanya izila iyakubukila kumahala ghanagha, sona ghatakwaghiwa mubantu aba muchisu ichapasi.

¹⁴ Ubwibizu bukuti, “Ghatakwaghiwa mumwane,” inyanja yope yikuti, “Ghatemumwane.”

¹⁵ Ghatangaghuliwa nu golide umwiza nkani, sona umutengo wache ghutangapimiwa nu siliva.

¹⁶ Ghatangaghuliwa nu golide uwaku Ofili, na mabwe agha onikisi pamo nu safile.

¹⁷ Ugolide pamo u kilisito vitangayana na mahala, pamo ukughulizannya na mabwe amiza nkani agha golide.

¹⁸ Amahala ghapamwanya nkani ukughachila amabwe agha kola nagha yasipa, pamo agha labu umutengo uwa mahala wapamwanya nkani ukughachila amambo.

¹⁹ Amabwe agha topazi ghatangafwanikiziwa na mahala, sona ghatangaghuliwa nu golide umwenecho.

²⁰ Po nkimba amahala ghakufumila kwiyi? Nkimba ukwivwisya ukwa vintu kukufumila kwiyi?

²¹ Ghafisiwe kuchintu chosi ichabumi, ghafisiwe naku viyuni vyosi.

²² Ukunanganika nu bufwe vikunena ukuti, “Twivwa bulo imbili iya mahala namakutu ghitu.”

²³ U Chala weyuyo ayimenye izila iya kubukilako sona weyuyo mwene aghamenye kuko ghakwikala.

²⁴ Pakuti umwene akwennya ubumalilo ubwa chisu, sona akuvyennya vyosi vivyo vili kusi ukwa mumwanya.

²⁵ Bo aghikazya amaka agha mpempo, nukughapima amizi,

²⁶ Bo abikako ululaghilo lwakuti ivula yitimaye, akayannya sona izila iya kamesya

²⁷ po akaghennya amahala nukughapima; akaghenelezya nukughayela.

²⁸ Po akamubuzya umuntu akati, “Ukumunyila u Mwene gho mahala sona ukuzichimbila imbibi ko kwivwisya.”