Yobu 27 - IBAYIBOLO 2024

¹ U Yobu akendelela pakunena ukuti,

² “Naloli nkulapa pamaso pa Chala umumi, yuyo atakumbombela mubwanaloli, Uwamaka Ghosi yuyo aghubika umuzimu wane muvyakubaba,”

³ ukuti bo inchili indi nubumi, sona bo nkufuta umuyi uwa Chala mumpuno zyane,

⁴ umulomo wane ghutakwiza pakunena ububibi, sona ululimi lwane lutakwiza pakutamantagha.

⁵ Ntakwiza pakwitika napo panandi ukuti we muntu wanaloli; nkwiza pakuba ne musubiliwa mupaka ubufwe bwane.

⁶ Nkwiza pakubukakatila ubugholosu bwane sona ntakwiza pakubulekezya nalumolumo. Umabyebye wane atakwiza pakunsusyapo mubumi bwane bosi.

⁷ “Abalwani bane babanje ngati muntu umubibi, sona babo bansambukiye babanje ngati muntu yuyo te mugholosu!

⁸ Pakuti umuntu yuyo atamumenye u Chala ate nu lusubilo nanti afwa, nanti u Chala amufyula ubumi bwache.

⁹ Nkimba u Chala akwivwa ukulila kwache, nanti amayimba ghamuwila?

¹⁰ Nkimba akwiza pakuhoboka nu Wamaka Ghosi? Nkimba akwiza pakumwitizya u Chala akabalilo kosi?

¹¹ “Leka imbamanyisye nizyamaka agha Chala; sona imbalingannye izila izya Wamaka Ghosi.

¹² Mwebosi mwiyenezye na maso ghinyu. Po nkimba choni chicho mukunena ivyamwalwemwalwe?” [U Zofali akati,]

¹³ Ulu lo lufundo lulo u Chala amusungiye umuntu umubibi, ichilingo chicho Uwamaka Ghosi akwiza pakumupokezya umuntu umukali.

¹⁴ Loli ubumalilo ubwa bana bache binji, wepanga abaluko lwache abinji batakwiza pakuba ni chakulya ichakubakwana.

¹⁵ Ichiwaya chikwiza pakubaghogha abakupona bosi, sona abachi babo abafwilwe batakwiza pakubalila.

¹⁶ Napapo akwibunganikila usiliva ngati lufumbi sona amenda ngati litope,

¹⁷ loli abagholosu bo babo bakwiza pakuvwala amenda ghache, sona abasita nongwa bakwiza pakugabana usiliva wache.

¹⁸ Inyumba yiyo azengite yili ngati chivulumbo icha chiyuni, ngati ichisakasa chicho chizengiwe nu mulindilili.

¹⁹ Bo akubuka pakughona akuba muntu umukabi, loli bo akulamusya ubukabi bulabula bukumala.

²⁰ Ivyakoghofya vikumuwila ngati mizi aghakwizula; sona pabusiku ukankungu akumunyamula.

²¹ Impepo iyakubufumilo bwizuba yikumunyamula, po atakuboneka sona. Impepo yilayila yikumupyela, po akuzimila.

²² Impepo yikumukomezya umwakusita ichisa, bo akuyezya pakuyichimbila umwalubilolubilo.

²³ Impepo yila yikukoma inkufi nukumobezya, pachifukwa ichakuti azimila.