Yobu 26 - IBAYIBOLO 2024

¹ Po u Yobu akamula akati:

² Wanyavwa nkani ane ne muntu umupina, sona wampoka naloli ane ne muntu umudedebazu!

³ Wanyavwa nkani ane ne muntu yuyo ate na mahala, sona wamanyisya ivintu ivyinji nkani!

⁴ Nkimba wewenu yuyo abika amazyu ghanagha mumulomo wako, nkimba umuzimu ghoni ghugho ghukupunguliye amazyu ghanagha?

⁵ “Abantu abafwe bakutetema pasi pachisu, poka na vivyo vili pasi pamizi, sona na vyosi vivyo vikwikala mulamula.

⁶ Ichisu icha bantu abafwe chili nkule pamaso pa Chala, sona ukunanganika kutavwinkiwe.

⁷ Kumwanya kumitu akakuzulilako papo patakabapo ichintu nachimochimo. Akachipayika ichisu ichapasi papo patakabapo akantu nakamokamo.

⁸ Akughanyembetelela amizi na mabingu amafitu, loli amabingu ghatakupunta pachifukwa icha bung'wamu ubwa mizi ghalaghala.

⁹ Akughukupikila umwezi, nukughufisa na mabingu ghache.

¹⁰ U Chala akughabikila amizi impaka yiyo yili ngati bwele, nukulesannya ulukozyo ni chisi.

¹¹ Impanda izya kumwanya zikutetemagha, sona zikuswighagha nanti u Chala akuzichemela.

¹² Na maka ghache akayipumizya inyanja, na mahala ghache akamudumalannya u Lahabu.

¹³ Nu muyi wache kumwanya kukaba bulo swee; inyobe yache yikalasa injoka yiyo yikachimbilagha.

¹⁴ Naloli utu to tunandi bulo utwa mbombo zyache; po tukwivwa panandi bulo izyache! Nkimba wewenu yuyo angakwaghannya ukujilimisya ukwa maka ghache?”