Yobu 24 - IBAYIBOLO 2024

¹ “Nkimba choni chicho Uwamaka Ghosi atakusala akabalilo akakulongela?” Nkimba choni chicho abantu babo bamumenye, batakughennya amasiku ghanagha?

² Abantu bakwandula impaka umwakuti babanje ni chisu ichikulu nkani, bakudima ing'ozi zizyo bibite.

³ Bakubafyula abana abalanda impunda zyabo nukusenda ing'ombe izya bakolo abafwilwe pakuba chikole.

⁴ Bakubasunkilizya kulubazu abantu abapotwe, nukubachimbizyamo muchisu abapina bosi umwakuti bakuvwamagha.

⁵ Ngati zyo mpunda munkolongo, abapina bakwendakwendagha bulo pukulonda ichakulya, pakulonda ichakulya icha bana babo.

⁶ Bakubunganikagha isote mumaghunda sona bakusalalagha mumaghunda agha mampesya agha bantu ababibi.

⁷ Bakughona nkule ubusiku bosi, pachifukwa ichakuti bate ni chakuvwinka, sona bate ni chakuvwinka nachimochimo bo kukataye.

⁸ Bakunyekagha ni vula iya mumaghamba nukughafukatila amabwe pachifukwa ichakuti bate na pakuvwama.

⁹ Abana abalanda bakuzompoliwa bo bali pakonka, ababonda aba bantu abapina bakusendiwa pakuba chikole.

¹⁰ Abapina bakwendakwendagha bulo nkule pachifukwa ichakuti bate na menda. Bakunyamulagha inkose izya ngano, loli pope bulo bakuba nizala.

¹¹ Bakwenga amafuta gha syunguti, bakukanyankila amampesya pakuba we vinyo, loli pope bulo bakuba ni nyota.

¹² Mukaya akakulu nkani mukuvwika ukukolomoka ukwa bantu babo bali pakufwa, sona abantu babo bavulaye bakulila pakulonda ubwavwilizi. Loli u Chala atakubombapo nazimozimo.

¹³ “Balipo bamo babo balusambukiye ulukozyo, babo batakulumanya pamo ukubuka kuko lukubalongozezya.

¹⁴ Bo ichisi chawa, umughoghi akunyamuka pakughogha abapina na bapotwe, po pabusiku akwiba ngati mwiba.

¹⁵ Umalaya akulindilila ukuti ichisi chiwe, nukwinong'ona ukuti, ‘Atalipo nayumoyumo umuntu yuyo akwiza pakunyennya,’ Po akuvwinka icheni chache.

¹⁶ Abantu bakumpankula inyumba muchisi, loli pamusanya bakulinda munyumba. Po batakululonda ulukozyo napo panandi.

¹⁷ Bosi ichisi yo ndabi yabo, sona bamanyanite ni vyakoghofya ivya muchisi.” [U Zofali akati,]

¹⁸ “Loli bali ngati litatafulu pamwanya pamizi; ichigaba icha chisu chabo chighuniwe, umwakuti atalipo nayumo yuyo angabuka kumaghunda agha mampesya.”

¹⁹ Ngati mumo ichitukivu nu lulanga lukusunguluzizya ukabefu, umwakuyana bulo lyope ni pumpa likubazompola abantu babo banangite.

²⁰ Wepe nu nyina abaluvizye, sona isomi zili pakubalya. Abantu ababibi batakukumbukiliwa nalumolumo, loli bakupyoliwa ngati makwi.

²¹ Bakubanyazya abaghumba na bakolo babo bate na bana, sona batakubapelela ichisa abakolo abafwilwe.

²² Loli mumaka ghache u Chala akubanangannya abantu abamaka. Napapo bikalanite, loli ubumi bwabo buli mumwanyamwanya bulo.

²³ Angabitikizya abantu ababibi ukuti batuzyanje umwakufwasa, loli amaso ghache ghakwennya akendele kabo.

²⁴ Bakukweziwa pakabalilo akanandi bulo, po bakuzimila. Bakwisiwa pasi nukubunganikiwa ngati bantu abanji bosi, sona bakudumuliwa ngati mitu iya malezi.

²⁵ Nanti zitakaba bunubu, nkimba wewenu yuyo angansusya ukuti nkutamanta, nukughasenda amazyu ghane pakuba ghamwalwemwalwe?