Yobu 23 - IBAYIBOLO 2024

¹ Po u Yobu akamula akati:

² “Nilelo bulo inchili pakwilumbusya kwa Chala; pope bulo achili akunfunda, napapo nkukoloma.”

³ Nanti namanyagha kuko ningamwagha, sona nanti nabukagha kuko akwikala,

⁴ ngali namubuzya inongwa yane, sona ngali namulingannyanga vyosi vivyo indi navyo.

⁵ Ngali namanyagha namumo anganyamulila, nukwinong'ona zizyo akwiza pakunena.

⁶ Nkimba ngali asusannya nane na maka amakulu? Awe, ngali atakampanga ingongwa.

⁷ Kulakula ngali umuntu amubuzizye inongwa yache, po ngali ampoka bwila na bwila munyobe izya mulongi wane.

⁸ “Nanti nabuka kubufumilo bwizuba, kulakula ataliko, Nanti nabuka kubwinjililo bwizuba, kulakula kope intakumwaghako.”

⁹ Bo ali kumitu pakubomba imbombo, kulakula intakumwennyako, Nanti ikila kuntende, kulakula kope amaso ghane ghatakumwennyako.

¹⁰ Loli u Chala akamenye akendele kane kosi; nanti anjela, nkwiza pakuswepagha.

¹¹ Inyayo zyane zikukanya munyayo zyache, sona intakupaghukila kundilo pamo kumongo.

¹² Ntaghasulanizyepo amalamulo ghache, naghasungilila amazyu ghache ukuchila ichakulya chane icha isiku ni siku.

¹³ “Loli u Chala atakwandukamo, po nkimba wenu yuyo angasusannya nawe?” Akubomba chicho chikumuhobosya.

¹⁴ Akwiza pakukwanilisya zizyo ambatikiye, sona ansungiye imbatiko inyinji nkani.

¹⁵ Cho chifukwa nkutetema pamaso papache, po nanti ninong'ona vyosi vinivi, nkumunyila.

¹⁶ U Chala aghumala amaka umoyo wane, Uwamaka Ghosi akunyoghofya.

¹⁷ Pope bulo intapumite pachifukwa icha chisi, ni chisi ichakoghofya cho chikupikiye icheni chane.