Yobu 22 - IBAYIBOLO 2024

Ukunenezannya ukwabutatu 22.1—27.23 Amazyu agha Elifazi

¹ Po u Elifazi uwamu Tema akamula akati:

² “Nkimba umuntu angamukabila ichoni u Chala? Nkimba umuntu uwamahala wepe ali ni mbombo yoni kukwache?”

³ Nkimba choni chicho chingamuhobosya Uwamaka Ghosi, nanti ukaba we mugholosu? Nkimba angakabapo choni, nanti inkalo yako yikaba nyiza?

⁴ “Nkimba chingaba ichakuti ukumunyila, cho chifukwa akukuchemela, nukukusitaka?”

⁵ Awe! Chifukwa ichakuti ububibi bwako bukulu nkani, sona imbibi zyako zitakumala nalumolumo.

⁶ Ukalondagha ichikole ku bawamwinyu pabusita ichifukwa, ukabavula amenda ghabo nukubaleka nkule.

⁷ Ukabima amizi aghakung'wela abantu abalite nukubima ichakulya abantu abazala.

⁸ Ukabombezya amaka ghako pakuchifyula ichisu ichikulu nkani, sona abachindikiwa bo babo bakwikalamo.

⁹ Ukababwezya abakolo abafwilwe nyobe zyene, nukubayivya abana abalanda.

¹⁰ Ichi cho chifukwa ivipingo vikuzyunguliye, po wachenuka pachifukwa icha bogha.

¹¹ Ichi cho chifukwa kuli ichisi umwakuti ukupotwa pakwennya, sona amizi ghakwibizya.

¹² “Nkimba u Chala atakwikala kumwanya nkani, ukuzichila intondwa, kuko akuvyennya ivintu vyosi?

¹³ Pope bulo ukuti, ‘Nkimba u Chala amenye choni? Nkimba angalonga bo afisiwe na mabingu bunubu?

¹⁴ Amabingu amafitu ghamuvwinkite, po atakutwennya bo akwendakwenda kumwanya.’

¹⁵ Nkimba uchili ukakatiye izila izyakale zizyo abantu ababibi bakendaghamo?

¹⁶ Bakazompoliwa bo na kabalilo kabo katafikite, ulwalo lwabo lukabukila na mizi aghakwizula.

¹⁷ Bakamubuzya u Chala bakati, ‘Tuleke bulo! Nkimba Uwamaka Ghosi angabomba choni naswe?’

¹⁸ Pope bulo u Chala akizuzya inyumba zyabo ni vintu ivyiza, po ane ntakwitinkana ni nyinong'ono izya bantu ababibi.

¹⁹ Abagholosu bakuhoboka nanti bakubennya abantu bakufundiwa, sona abasita nongwa bakubobezya bakuti,

²⁰ ‘Naloli abalwani bitu bananganika, sona umoto wabulungulizya ubukabi bwabo.’

²¹ “Wee Yobu, sayana nu Chala, umwakuti ubanje mumutende nawe, po ivintu vikwiza pakukwendela akiza.

²² Pokela ichimanyisyo chicho akukupa, sona sunga amazyu ghache mumoyo wako.

²³ Nanti wanyokela ku Wamaka Ghosi, ukwiza pakupola. Nanti ukubwefyamo ububibi munyumba yako

²⁴ nanti ukumusenda ugolide wako pakuba lufumbi, nukumusumbila mulusoko ugolide wako uwamutengo uwamu Ofili.

²⁵ Po Uwamaka Ghosi akwiza pakuba we golide wako, sona akwiza pakuba we siliva wako uwamutengo nkani.

²⁶ Naloli ukwiza pakuhoboka nu Wamaka Ghosi, po ukwiza pakutalankannya nukwennya kwa Chala.

²⁷ Bo ukwiputa, akwiza pakukwamula, po ukwiza pakukwanilisya ichilapo chako.

²⁸ Chicho wadumula, chikwiza pakubombiwa, sona ulukozyo lukwiza pakukulamila muzila zyako.

²⁹ Pakuti u Chala akubisya abakwituvya loli akubapoka abakwiyisya.

³⁰ Nanti akumupoka umuntu umusita nongwa, po akwiza pakukupoka awe pachifukwa icha bugholosu bwako.”