Yobu 21 - IBAYIBOLO 2024

¹ Po u Yobu akamula akati,

² “Tegha ikutu, uku ko kusangalusya kuko nkukulaba.”

³ Leka inene, nanti namala pakunena, po munganyobezya.

⁴ Nkimba nkumulumbuzizya umuntu, sona choni chicho ntangakalala?

⁵ Munyennye nukuswigha, po musone imilomo yinyu.

⁶ Bo nkwinong'ona zinizi, ubogha bukundema, sona nkutetema nkani.

⁷ Nkimba choni chicho abantu ababibi batakufwa lubilolubilo, sona bakughosipagha nukuba na maka?

⁸ Bakubennya abana babo bakwikalana, sona bakubennya abizukulu babo bakukula.

⁹ Inyumba zyabo zili mumutende, sona ulufundo ulwa Chala lutakubawila.

¹⁰ Inkambaku zyabo zitakupotwa pakwendezya, zyope ing'ombe zyabo zikonkesya akiza bulo sona zitakusopola.

¹¹ Abana babo bakwangala palubinjilo, bakunyelanyela ngati twana utwa ng'ozi.

¹² Bakwimba ni vivisekeseke na mapango, bakusekela pakwivwa ukulila ukwa malongi.

¹³ Amasiku ghabo ghakumalila mubukabi nukubuka kumapumpa mumutende.

¹⁴ Loli pope bulo bakumubuzya u Chala bakuti, “Tuleke bulo!” Aswe tutakuzinyonywapo izila zyako.

¹⁵ “Nkimba Uwamaka Ghosi wewenu ukuti tumubombelaye, sona tungakabapo ichoni nanti tukumwiputa?”

¹⁶ Te momumo ukuti ivintu vikubendela akiza chifukwa icha mbombo izya nyobe zyabo, ubulongozi ubwa bantu ababibi buli kubutali nane.

¹⁷ “Nkimba inyale iya bantu ababibi yizimitepo kalinga?” Nkimba intamyo zyabawilapo kalinga? Nkimba u Chala abakalaliyepo nukubafunda?

¹⁸ Nkimba kalinga kako bakuba ngati lisote pantazi pampepo, ngati lyelelo lilyo ukankungu akupupuzya?

¹⁹ Zikuneniwa ukuti, “U Chala akusunga ulufudo ulwamuntu umubibi ukuti abafundilemo abana bache.” Leka u Chala abatanizye ababomba mbibi ukuti bamanyilepo.

²⁰ Leka amaso ghache ghennye ukunanganika. Leka u Chala Uwamaka Ghosi abafunde nu bukali bwache.

²¹ Nkimba angasekela bulibuli naba munyumba yache nanti amezi aghakwikalila muchisu ghamala?

²² Nkimba alipo yumo yuyo angamumanyisya amahala u Chala, pakuti u Chala weyuyo akubalonga abapamwanya?

²³ Yumo akufwa bo achili ali namaka nkani, ali mumutende sona atakunyila nachimochimo,

²⁴ umubili wache wakwina, sona ghutyelemukite.

²⁵ Uyunji akufwa chifukwa icha kubaba ukwa moyo, ukusita kuyezyapo ivintu vyiza.

²⁶ Loli bosi bakufwa nukusyiliwa, po bakuwa isomi.

²⁷ Inzimenye nkani zizyo mukwinong'ona, inzimenye inyinong'ono zyinyu imbibi zizyo mukulonda ukunangila ane.

²⁸ Mukunena ukuti, “Nkimba yili ko kwiyi inyumba inkulu iya muntu, ivisakasa vivyo umuntu umubomba mbibi akwikalaghamo?

²⁹ Nkimba ubalalusizyepo babo bosi bakwenda muzila? Nkimba mutakwitikizya zizyo abene bakunena?

³⁰ Ukuti umuntu umubibi akupona pisiku ilya ntamyo, akupona pisiku ilya bukali ubwa Chala?

³¹ Nkimba wewenu yuyo angamususya umuntu umubibi, pamo ukumunyosezya imbibi zizyo akubomba?

³² Bo bamunyamuye pakubuka nawe kwipumpa, bamo kuntazi bamo kwisinda bakulindilila ipumpa.

³³ Bakamusyila mwitope, nukubikapo abalindilili pipumpa lyache.

³⁴ Nkimba mungansangalusya ane na mazyu amasita mahala? Mutalimo nakamokamo mulyamulo lyako, loli ubumyasi mpela.”