Yobu 20 - IBAYIBOLO 2024

Amazyu agha Zofali

¹ Po u Zofali uwamu Naama akamula akati:

² “Umoyo wane ghukunyonywa nkani pakukwamula pachifukwa ichakuti navulungana nkani.”

³ Nkwivwa namumo ukunchemelela nukunsamulila, po umuzimu wane ghukumbuzya ukuti namulepo.

⁴ “Naloli uzimenye mumo zibeleye ukwanda kale, ukwanda pakabalilo kako umuntu akapeliwanga pachisu ichapasi,”

⁵ ukuti ukuhoboka ukwa bantu ababibi kwa kabalilo akanandi bulo, sona ukusekela ukwa bantu babo batakumunyila u Chala kutakwendelela.

⁶ Napapo ukwituvya kwache kungafika kumwanya, nu mutu wache ghungapalamasya amabingu,

⁷ akwiza pakuzimila bwila na bwila ngati sakwi yache, bosi babo bamwenizye bakwiza pakulalusya ukuti, “Nkimba ali ko kwiyi?”

⁸ Akuzyebeluka bulo ngati chilota, po atakwaghiwa sona, akwiza pakuzimila bulo ngati chisetuka pabusiku.

⁹ Ilyiso lilyo likamwennya litakwiza pakumwennya sona, inyumba yache yitakwiza pakumwennya sona.

¹⁰ Abana bache bo babo banyosyanje zyosi zizyo bakabibila abapina; po inyobe zyache zikwiza pakunyosezya papo kubenecho ubukabi bwache.

¹¹ Amaka ghache agha kubulumendo bwache, ghagho ghali mumafupa ghache ghakwiza pakughona nawe mulufumbi.

¹² “Napapo imbibi zinonite mumulomo wache, nukuzifisa kusi kululimi lwache,”

¹³ pope bulo atakulonda pakuzileka, akuzisunga mumulomo wache,

¹⁴ loli ivyakulya vikwiza pakuba vyakubaba mulwanda lwache; vikwiza pakuba ngati nsalile zya chipili mulwanda lwache.

¹⁵ Ubukabi bosi bubo akamila akwiza pakubufwina; u Chala akwiza pakulupela ulwanda lwache pakubutapika.

¹⁶ Akwiza pakonka ubwanga ubwa njoka po ubwanga ubwa chipili bukwiza pakumughogha.

¹⁷ Atakwiza pakwilagha utusoko, tuto mukwenda ubuchi nu lukama.

¹⁸ Akwiza pakunyosya vyosi vivyo akiyulagha pakubomba, atakwiza pakwilagha vivyo akabilapo.

¹⁹ Pakuti akabayivya abapina, sona atakabapasikizya, akabafyula inyumba zizyo yuyo atakazizenga.

²⁰ “Naloliloli pachifukwa icha bupafu bwache, po ubukabi bwache butangamupoka.

²¹ Chitalipo nachimo chicho chikasyalapo ichakuti angalya, ubukabi bwache bukamala bosi.

²² Napapo angaba nu bukabi loli akwiza pakuba mupina. Intamyo inkulu nkani zikwiza pakumuwila.

²³ Bo alya nukwikuta, u Chala akwiza pakumufunda nu bukali bwache nukumuwisizya ubukali bwache ngati vula.

²⁴ Napapo angayichimbila impalala iya chela, loli akwiza pakulasiwa ni mpalala iya mukuba.

²⁵ Akuyiwesa impalala yila mumubili wache, akasonga kakulilasa itima, po ubogha bukumulema.

²⁶ Ichisi chene chabikiwa ngati bukabi bwache. Umoto ghugho ghutapembiwe, ghukwiza pakumulungulizya nukunangannya vivyo vikasyala muchisakasa.

²⁷ Kumwanya kukwiza pakuvumbula imbibi zyabo, ichisu ichapasi chikwiza pakumusambukila.

²⁸ Amizi aghakwizula ghakwiza pakuyinangannya inyumba yache, pisiku ilya bukali ubwa Chala.

²⁹ Ubu bo bumalilo ubwa muntu umubibi, bubo u Chala amusungiye, umuvwalo ghugho u Chala akalamula ukuti umuntu yula akwiza pakupokela.”