Yobu 2 - IBAYIBOLO 2024

U Satana akumuyela sona u Yobu

¹ Isiku limo abantumi bakiza sona pakwilanjizya pamaso pa Mwene, po u Satana wepe akiza poka nabo.

² Po u Mwene akamulalusya u Satana akati, “Nkimba wafuma kwiyi?” U Satana akamwamula u Mwene akati, “Name pakwendakwenda bulo muchisu chosi ichapasi.”

³ Po u Mwene akamulalusya u Satana akati, “Nkimba wamwennyapo umubombi wane u Yobu? Pachisu ichapasi patalipo nayumoyumo umuntu umusubiliwa, sona umugholosu uwakuyana nawe, yuyo akunchindika sona akuzinyila imbibi. Awe ukandambilizya ukuti nkwitikizye pakumubombela ichintu ichibibi umwakusita ichifukwa nachimochimo, loli u Yobu we muntu umusubiliwa akabalilo kosi.”

⁴ U Satana akamwamula u Mwene akati, “Loli ughuyele umubili wache! Po umuntu angitika pakutagha vyosi vivyo ali navyo ukuti abanje nubumi.

⁵ Loli yezya bulo pakughuyivya umubili wache, naloli akwiza pakukusamula pamaso na pamaso.”

⁶ U Mwene akamubuzya u Satana akati, “Chiza bulo, ungamuyivya ukuyana namumo ukulondela, loli umulekele ubumi bwache.”

⁷ Po Satana akepapo pamaso pa Mwene nukumuyivya u Yobu ni vilonda ivyakubaba nkani mumubili wache ghosi.

⁸ Po u Yobu akasenda ulwinga nukwisuba nalo bo ikaye pachituntululu.

⁹ Umuchi akamulalusya akati, “Nkimba nilelo bulo uchili we muntu umusubiliwa? Musamule u Chala, ufwanje bulo.”

¹⁰ U Yobu akamwamula akati, “Utakanenaye ngati po we mukolo umupunganu. Nanti u Chala akutupa ivintu ivyiza, tukuvipokela. Nkimba choni chicho tukwilumbusya nanti akutuwisizya intamyo?” Napapo zikaba bunubu, u Yobu atakanenapo amazyu amabibi.

Abamanyani batatu aba Yobu

¹¹ Bo abamanyani batatu aba Yobu, u Elifazi wamu Tema nu Bilidadi wamu Shuhi sona nu Zofali wamu Naama, bivwa nizya mayimba ghosi ghagho ghakamuwila u Yobu, bakivwana ukuti babuke bosi poka pakumulema inyobe nukumusangalusya.

¹² Bo bamwennya pabutalipo batakamumanyagha napo panandi. Po bakanda pakulila umwakukolomoka sona bakazepula inkazo zyabo nukwinyafila ulufumbi pamitu yabo pachifukwa icha chitima.

¹³ Bakikala pasi poka nawe amasiku seveni umusanya nu busiku. Atakabapo nayumoyumo yuyo akanenaghapo izyu, pachifukwa ichakuti bakamwennya ukuti akayimbagha nkani.