Yobu 19 - IBAYIBOLO 2024

U Yobu akwamula

¹ Po u Yobu akamula akati,

² “Nkimba ukwiza ukuleka liyi pakuntamya nukunvulazya na mazyu ghako?”

³ Aka teni ukuntuka bulo, sona ute ni soni pakundonga.

⁴ Nanti momumo ukuti inangite, undeke nemwene nukunanga kwane.

⁵ Naloli ngali wikwezya wemwene ukunchila, nukukupela ukwiyisya kwane pakuba mazyu ghakulwana nane,

⁶ po umanye ukuti u Chala anangiye, pakuntegha ni chilepa chache.

⁷ Napapo nkulila ukuti, “Mwee nananga!” Pope bulo intakwamuliwa. Napapo nkulaba ubwavilizi, atalipo nayumoyumo uwakumbombela ingolosu.

⁸ Ighalila izila yane umwakuti ntangadumusannya, azighila izila zyane ni chisi.

⁹ Anfyula ubuchindamu bwane nukunvula impumpu yane iyamuchizi.

¹⁰ Akunkoma kumbazu zyosi mupaka imale, ulusubilo lwane akulunyunkula ngati likwi.

¹¹ Ubukali bwache bukwaka papane, akumpima ngati po ne mulwani wache.

¹² Abasilikali bache abinji nkani bakwiza poka, bazenga ivibumba ivyakukwelapo bazengite ivisakasa vyabo ivya bwite umwakuzyungulila ichisakasa chane.

¹³ “Abefyako abawamwitu kulubazu lwane; sona abamanyani bane bafumilako zila kukwane.”

¹⁴ Abakamu bane bandekite ne mwene, sona abamanyani bane banduvizye.

¹⁵ Abayeni bane na bambombo bane abalindu bakumpima ngati po ne muyeni, sona bakunyennya ngati po ne mwendazila.

¹⁶ Nanti nkumwitizya uwambombo wane, atakunyamula, napapo nkumulaba nu mulomo wane.

¹⁷ Nu muchi wane wepe bulo atakuhoboka nane, naba ne chintu ichinyazu ku bawamwitu.

¹⁸ Na bana bulo abanandi abalumendo bakunyobezya, nanti banyenya bulo bakunsamula.

¹⁹ Abamanyani bane abapamoyo bakuntoloka, bosi babo imbaghanite bampiye inkonto.

²⁰ Ane nasyala bulo umubili na mafupa napona ku mulomo uwa nkalamu.

²¹ “Mwee bamanyani bane, mumpelelaye ichisa, nalamba mumpelele ichisa, pakuti u Chala anfunda.”

²² Nkimba choni chicho mukunchimbizya ngati mumo u Chala akunchimbizizya? Nkimba mutanjivya mpela?

²³ “Mwee, nalondagha nkani nanti amazyu ghane ghasimbiwanga mwibuku!” Mwee ngali ghasimbiwanga mwibuku!

²⁴ Nalondagha nkani nanti ghasimbiwanga ni chisimbilo icha chela pamo nanti ghabiziwanga pilyabwe ukuti ghabanjeko bwila na bwila!

²⁵ Imenye ukuti Umutabuli wane mumi, nukuti pabumalilo akwiza pakwima pachisu ichapasi.

²⁶ Napapo umubili wane wananganika, pope bulo nkwiza pakumwennya u Chala.

²⁷ Ane ne mwene nkwiza pakumwennya na maso ghane, te muntu bulo, awe. Umoyo wane ghukulinyonywa nkani pakulyennya isiku lilalila.

²⁸ Nanti mukuti, “Nkimba tungamuyivya bulibuli, pakuti ulwalo lwantamyo zyosi weyuyo?”

²⁹ “Mumunyilaye upanga mwebene, pakuti u Chala akufunda, po mukwiza pakumanya ukuti umulongi aliko naloli.”