Yobu 18 - IBAYIBOLO 2024

Amazyu agha Bilidadi

¹ Po u Bilidadi uwamu Shuhi akamula akati:

² Nkimba ukwiza pakuleka liyi pakunena bunubu? Banga na mahala, po tunganenezannya.

³ Nkimba choni chicho ukutupima ngati po twe ng'ombe? Sona ngati twe bapungani pamaso papako

⁴ Ukwizepulannya pachifukwa icha bukali, nkimba kokuti abantu bakwiza pakuchileka ichisu ichapasi pachifukwa icha wewe? Pamo amabwe ghefiwanjemo mubuzilo bwache?

⁵ “Inyale iya muntu umubibi yazima, impesese izya moto wache zyaleka pakwaka.

⁶ Ulukozyo lwamunyumba yache lwaba chisi, po inyale yiyo yili papipi nawe yazima.

⁷ Ukwenda kwache ukwamaka kwatozoka, imbatiko zyache zyamuwisizya pasi.

⁸ Ivinama vyache vyalemiwa muchilepa, po akwendakwenda bulo muchiliba chache.

⁹ Ichipingo chamulema kuchitende, sona chimukakatiye.

¹⁰ Ulupote luteghiwe pasi mwitope, ichipingo chiteghiwe muzila yache.

¹¹ Ivyakoghofya vikumupelela ubogha kosi na kosi, nukumukonka mosi mumo akwenda.

¹² Amaka ghache ghamala chifukwa icha zala, intamyo zikumulindilila akabalilo kosi.

¹³ Mumubili wache ghosi muli ububine ubwakoghofya, ivinama vyache, ni nyobe zyache vyosi vyabola.

¹⁴ Bamwefyamo muchisakasa mumo akikalagha mumutende, nukubuka nawe kwa mwene uwakoghofya.

¹⁵ Munyumba yache vyosi vyefiwamo, banyafilapo sulufule posi apakwikalapo.

¹⁶ Amagululuzi ghache ghumila, sona zyope isamba zyache zikufoka.

¹⁷ Ukumanyikwa kwache kukumala pachisu ichapasi, po itabwa lyache likuzimila.

¹⁸ Bakamuchimbizyamo mulukozyo, nukumwinjizya muchisi, sona bakumuchimbizyamo muchisu ichapasi.

¹⁹ Ate nabana pamo abaluko pakasi pabantu bache, pate nayumo yuyo asyetepo papo akikalagha.

²⁰ Abantu aba kubwinjililo bwizuba bakuswigha nizya bufwe, abakubufumilo bwizuba bakuswigha nukutetema

²¹ Naloli momumo zibeleye, inyumba izya bantu ababibi, momumo bubeleye ubuzilo ubwa yuyo atamumenye u Chala.”