Yobu 17 - IBAYIBOLO 2024

¹ Umuzimu wane wavulala, amasiku ghane ghamala kale, sona ipumpa likundindililila.

² Naloliloli abakunyobezya banzyunguliye; sona amaso ghane ghakubennya namumo bakunsamulila.

³ Wee Chala, ubanje we chikole chane. Nkimba wewenu yuyo angazighilila?

⁴ Wighalila inyinong'ono zyabo ukuti baleke pakwivwisya; polelo utakwiza pakubaleka ukuti bapote.

⁵ Nanti umuntu akubasamula abamanyani bache pachifukwa icha muvwalo, abana bache bakuyimba nkani.

⁶ U Chala ampela pakuba ngati ne chakubasesya abantu, umuntu yuyo abantu bosi bakumufwinila amati kumaso.

⁷ Amaso ghane ghali nakafobela pachifukwa icha chitima; po ivigaba vyane vyosi vili ngati muzyezye.

⁸ Abantu abagholosu bakuswigha nazyo zinizi, abasita chifukwa nachimochimo, bakubakalalila babo batakumunyila u Chala.

⁹ Pope bulo, abagholosu bakwenda muzila zyabo, po yuyo musita chifukwa akukula wamaka.

¹⁰ Loli zagha kuno mwebosi, munene sona po ntakwiza pakumwaghamo nayumoyumo uwamahala pakasi papinyu.

¹¹ Amasiku ghane ghamala, vivyo nkabatika pakuvibomba vyapotwa, sona vivyo umoyo wane wanyonywanga vyope vyamala.

¹² Abantu aba bakubupela ubusiku pakuba musanya; bakunena sona bakuti, “Ulukozyo luli papipi.” Loli inzimenye ukuti nkwikala muchisi.

¹³ Nanti inyumba yene yiyo nkuyisubila lipumpa, nukutenga ichitefu chane muchisi,

¹⁴ sona nanti nkunena kumabeko ukuti, “We tata wane.” Nakusomi ukuti, “We mayi wane” pamo ukuti, “We muyemba wane”

¹⁵ Nkimba luli kwiyi ulusubilo lwane? Nkimba wewenu yuyo angalwennya ulusubilo lwane?

¹⁶ “Ulusubilo lutakwiza pakubuka nane mwipumpa, bo nkwikilila kuchisu icha bafwe? Nkimba inti twikilile poka nalo mulufumbi?”