Yobu 16 - IBAYIBOLO 2024

¹ Po u Yobu akamula akati:

² “Nivuye ivintu ivyinji ngati vinivi. Mwebosi mwe basangalusi abapela chitima!”

³ Nkimba mukwiza pakuleka liyi pakunenanena ivyamwalwemwalwe? Nkimba choni chicho chatamya ukuti munenanenaye bulo?

⁴ Nane bulo ngali nanenagha ngati mwemwe nanti mukabanga ngati mumo imbeleye. Ngali nanenagha akiza nkani umwakususannya namwe nukubapukunizizya umutu.

⁵ Loli umulomo wane ngali wabakazya; sona imilomo yane ngali yabwisya ububavu bwinyu.

⁶ “Loli nanti nkunena vimo ivyakubaba vyane vitakumala. Nanti naba bulo myee, ivyakubaba vyane vitakuleka nalumo.”

⁷ Wee Chala, naloliloli wamazya amaka; sona wayinangannya inyumba yane yosi.

⁸ Wandema, po waba we mulwani wane, ukusimkizya ukuti nananga. Ane nasyala mafupa ghene, po bakunena ububibi pabuzelu.

⁹ Mubukalale bwache u Chala anzepulannya mutugaba nukumemenela amino ghache. Umulwani wane akadunulila amaso ghache.

¹⁰ Abantu bakwighula amalomo ghabo pakunyobezya nukunsamula pakunkoma kwisaya, nukubungana poka pakususannya nane.

¹¹ U Chala ambika munyobe izya bantu ababibi nukunsumbila ku bantu ababibi.

¹² Kale nkafwasa bulo, loli ilelo ansya. Andema pasingo nukuntizannya. Ampelite pakuba ne chakumanyililapo ukulasa.

¹³ Ubwele bwache bukundasa kumbazu zyosi. Andasa ifigho zyane umwakusita ichisa nachimochimo nukukupulila pasi akanyongo kane.

¹⁴ Akunvulazya kabilikabili; akunchimbilila ngati musilikali uwamaka.

¹⁵ Nasonela amasaka kumubili wane nukughasyila amaka ghane mulufumbi.

¹⁶ Amaso ghane ghachesamite pachifukwa ichakulila, sona amaso ghane ghizuye.

¹⁷ Loli inte ne walombwa, sona ulwiputo lwane lwanaloli.

¹⁸ Wee chisu ichapasi, utakafisaye ivibibi vivyo bakukubombela. Utakitikizye ukuti ukulila kwane kubwaghe ubutuzyo!

¹⁹ Losi ulu ukaboni wane ali kumwanya; sona umwavwilizi wane wepe ali kumwanya nkani.

²⁰ Abamanyani bane bakunyobezya, bo amaso ghane ghakukupula amasozi pamaso pa Chala.

²¹ Nanti akabangapo yumo uwakundambilizizya kwa Chala, ngali andambilizizya, ngati mumo umuntu akumulambilizizya umumanyani wache.

²² Pakuti amaka ghane ghasyala manandi bulo, losi ulu nkwiza pakwenda muzila yiyo ntakwiza pakunyokako.