Yobu 15 - IBAYIBOLO 2024

Ukunenezannya ukwabubili 15.1—21.34

¹ Po Elifazi uwamu Tema akamula akati:

² “Nkimba umuntu uwa mahala angamula mwalwemwalwe bunubu pamo ukwizuzya ulwanda lwache ni mpepo iyakubufumilo bwizuba?”

³ Nkimba angadalika na mazyu aghabupunganu, pamo na mazyu aghamwalwemwalwe?

⁴ Nkimba ukulonda ukuti abantu batakamunyilaye u Chala sona nukuti batakiyipanje kwa Chala?

⁵ Imbibi zyako zikubonekela namumo ukunenela; po ukweghelela ululimi lwabachevu.

⁶ Umulomo wako gho ghugho ghukukususya, te wane, awe, sona imilomo yako yo yiyo yikukupa inongwa.

⁷ “Nkimba awe we muntu uwakwanda pakupapiwa? Nkimba ukabako bo u Chala akughapela amaghamba?”

⁸ Nkimba uli mukabukatila aka bantu abamahala aba Chala? Nkimba ukwipima pakuba we muntu uwamahala?

⁹ Nkimba chintu choni chicho uchimenye, chicho aswe tutachimenye? Nkimba mahala ghoni ghagho uli nagho, ghagho aswe tute nagho?

¹⁰ Abavwi na bantu abavula intazi bali kulubazu lwitu, abantu babo basongo ukumuchila nu ghuso bulo.

¹¹ Nkimba ukusangalusya ukwa Chala kutakukukwana, pamo amazyu amatonte aghakunena kukwako?

¹² Nkimba choni chicho ukalaye, nkimba choni chicho ukudunula amaso ghako?

¹³ Nkimba choni chicho ukulwana nu Chala nukumusamula na mazyu agha mumulomo wako?

¹⁴ “Nkimba umuntu wenu yuyo angaba muzelu, pamo umuntu yuyo apapiwe nu mukolo, angaba mugholosu?”

¹⁵ Nanti u Chala atakubasubila abantumi bache abazelu, napapo bangaba bakumwanya te bazelu pamaso papache,

¹⁶ po zingaba bulibuli nu muntu yuyo munyazu sona mubibi, yuyo akung'wela ububibi ngati po mizi!

¹⁷ “Ivwa kuno nkulingannye leka nkubuzye zizyo inzyenizye,”

¹⁸ Zizyo abantu abamahala bakambuzya batanvinditepo nazimozimo pa zizyo bakapokela ku banyenya babo,

¹⁹ babo bakapeghiwa ichisu, po nayumoyumo umuntu umuyeni akadumusannyamo.

²⁰ Amasiku ghache ghosi, umuntu umubibi akuyimba, umuntu umukali akwiza pakuyimba mubumi bwache bosi.

²¹ Akwivwanga bulo ichongo ichakoghofya mumakutu ghache; pakabalilo kako akutinji vyosi vili akiza bulo, po amavyondongo ghakumwizila.

²² Atakusubila ukuti angapona kuchisi icha bufwe; sona aghoghiwanje.

²³ Akwembelakwembela pakulonda ivyakulya sona azimenye ukuti isiku lyakufwila lili papipi nkani.

²⁴ Intamyo ni chitima vikumoghofya nkani; ngati we mwene yuyo akubuka kubwite,

²⁵ pachifukwa ichakumusambukila u Chala sona akulonda pakulwana nu Wamaka ghosi,

²⁶ Akunyamula ingulu yache, nukuchimbilila pakulwa nu Chala.

²⁷ “Napapo icheni chache chinite nkani sona ghope umusana wache winite nkani

²⁸ pope bulo akwiza pakupyana utwaya utukulu tuto twaba visami sona ni nyumba zizyo nayumoyumo yuyo akwikalamo, zizyo zikamongonkana.

²⁹ Atakwiza pakubangapo mukabi nalumolumo sona ubukabi bwache bukwiza pakumala lubilolubilo. Ukatundu wache atakwiza pakunyampana muchisu.

³⁰ Atakwiza pakupona kuchisi; akwiza pakuba ngati lyo likwi lilyo isamba zyache zipiye numoto, po umuyi uwa Chala ghukwiza pakulaghazya ubwezya bula.

³¹ Atakizimbulaye mwene pakuvisubila ivintu ivyamwalwemwalwe, pakuti atakwiza pakukabamo ichintu nachimochimo.

³² Akwiza pakufoka bo na kabalilo kache kachili katakwanite sona isamba zyache zitakwiza pakulemba sona.

³³ Akwiza pakuba ngati lutabo lwamampesya, lulo bayabitemo ivikomwa vyache bo zitatonite. Akwiza pakuba ngati likwi ilya musyunguti, lilyo ubwezya bwache bwalaghala.

³⁴ Pakuti abantu babo batakumunyila u Chala batakwiza pakuba na bizukulu, sona umoto ghukwiza pakuzyocha inyumba izya babo baghaghanite amabeko.

³⁵ Bakupesa intamyo nukwinula imbibi; amoyo ghabo ghakwinong'ona nizya bumyasi.”