Yobu 14 - IBAYIBOLO 2024

¹ “Umuntu yuyo akupapiwa nu mukolo amasiku ghache manandi bulo, sona ghizuye nintamyo zyene.”

² Akwanda bulo pakumela ngati bwezya nukufoka, sona akuzyebeluka bulo ngati muzyezye.

³ Nkimba ungamulolotela umuntu ngati yunuyu? Nkimba ungiza nawe pamaso papako pakumulonga?

⁴ Nkimba wewenu yuyo angefyamo ichintu chicho chiswefiwe muchintu ichinyazu? Nayumoyumo!

⁵ Amasiku agha muntu mapimpa nkani; bope ubwinji ubwa mezi ghache ghali ni mpaka yiyo umuntu atangayichila.

⁶ Po umuleke bulo umwakuti atuzye, nukuhoboka mukabalilo kache ngati waganyu.

⁷ “Ikwi lili nu lusubilo: Nanti lyadumuliwa, kokuti likwiza pakulemba sona, utusamba twache tutakwiza pakufoka.”

⁸ Napapo amagululuzi ghache ghangaghosipa mwitope sona ichisinko chache chingafwila mwitope,

⁹ pope bulo nanti chang'wela amizi chikwiza pakulemba sona amani nukuba nu tusamba ngati kakwi akateta.

¹⁰ Loli umuntu akufwa nukusyiliwa mwipumpa; akufuta akabumalilo, po atakubako sona.

¹¹ Ngati mumo amizi ghakukamukila munyanja pamo ngati mumo ulusoko lukupwela,

¹² umwakuyana bulo umuntu akulambalala, nukusita ukunyamuka sona; mupaka kumwanya kwazyebeluka, abantu batakwiza pakulamusya mutulo twabo.

¹³ “Nalondagha nkani nanti wanfisagha bulo mwipumpa mupaka papo ubukali bwako bwatozoka! Nanti wambikilagha akabalilo,” ukuti unkumbuke sona.

¹⁴ Nanti umuntu afwa, nkimba angaba sona mumi? Amasiku ghane ghosi agha mayimba nkwiza pakulindilila mupaka ivintu vinyendelaye akiza sona.

¹⁵ Ukwiza pakunyitizya, po nkwiza pakukwamula; ukwiza pakunsamba ne chipeliwa chako chicho ukachimata ni nyobe zyako.

¹⁶ Po naloli ukwiza pakubelenga amamita ghane, loli utakwiza pakuzilondelezya imbibi zyane.

¹⁷ Ukusambuka kwane kukwiza pakupinyililiwa munyambi, nukuzizimya imbibi zyane.

¹⁸ “Loli ngati mumo lighamba likuwila nukumongonkana sona ngati mumo ibwe likubuzila pabuzilo bwache,

¹⁹ ngati mumo amizi ghakusyela amabwe utusoko tope tukunyamula itope, umwakuyana bulo ukulunanganizizya ulusubilo lwamuntu.

²⁰ Ukumupota umuntu, po atakuboneka sona; ukumwandula akabonekele kache nukumuzimizya.

²¹ Nanti abana bache abalumendo bakuchindikiwa, atakuzimanyagha napo panadi. Nanti bakukoziwa isoni, atakuzyennya nalumolumo.

²² Akwivwa bulo ivyakubaba ivya mumubili wache nukwililila mwene.”