Yobu 13 - IBAYIBOLO 2024

¹ “Amaso ghane ghazyennya zyosi zinizi, amakutu ghane ghope ghazyivwa nukuzyivwisya.”

² Chicho muchimenye, nane bulo inchimenye, amwe te mwe bapamwanya ukunchila.

³ Loli nalondagha nkani nanti nanenagha nu Wamaka Ghosi nukunena nu Chala pamaso na pamaso nizya nongwa yane.

⁴ Loli amwe mukuvinda ukusita kumanya kwinyu namazyu agha bumyasi bwinyu, mwebosi mwe baghanga abamyasi.

⁵ Nanti mwabanga bulo myee, ngali chame chintu icha mahala nkani.

⁶ Polelo ivwa zizyo nkulonda pakunena, teghelezya ukulambilizya kwane.

⁷ Nkimba choni chicho mukutamanta pakumutambula u Chala? Nkimba choni chicho mukunena ubumyasi mwitabwa lyache?

⁸ Nkimba mungamubombela u Chala ichintu umwakwennya icheni? Nkimba u Chala mungamwimila panongwa yache?

⁹ Nkimba mukwinong'ona ukuti vingamala bulibuli nanti u Chala akubenelezya? Nkimba mungamuzimbula u Chala ngati mumo mukubazimbulila abantu?

¹⁰ Po naloli ngali abachemela nanti mukubomba ivintu umwakwennya icheni.

¹¹ Ubuchindamu bwache ngali bwaboghofyanga sona ukuboghofya kwache ngali kwabawilagha.

¹² Ivyili vyinyu vili bulo ngati litoyi sona ukwivighilila kwinyu kuli ngati litope.

¹³ “Banga bulo myee, mundeke inenepo, chicho chikulonda pakungwila chileke chingwilaye.”

¹⁴ Nkimba choni chicho imbikaye ubumi bwane pachulu, ukuti infwanje?

¹⁵ Napapo angoghe, pope bulo nkwiza pakumusubila; naloli nkwiza pakumulingannya inongwa yane.

¹⁶ Lumo chinichi chingabupoka ubumi bwane, pakuti umuntu umubibi atangajimba pakwiza pamaso pa Chala.

¹⁷ Teghelezya nkani amazyu ghane; tegha amakutu ghako ukuti ghivwe zizyo nkunena.

¹⁸ Ilelo nayiyannya inongwa yane, inzimenye ukuti ntakwiza pakwaghiwa ninongwa.

¹⁹ Nkimba alipo yumo yuyo akulonda pakunsitaka? Nanti zili bunubu, nkwiza pakuba bulo myee nukufwa.

²⁰ “Wee Chala, nkukulaba ivintu vibili bulo, po ntakwiza pakukuvwama.”

²¹ Leka pakunfunda, sona utakanyoghofyanje ni vyakoghofya vyako.

²² Nyitizya, po nkwiza pakwamula, pamo unyitikizye ukuti inenepo, po ungamula.

²³ Umbuzye chicho nananga, sona undanjizye ukusambuka kwane, ni mbibi zyane.

²⁴ Nkimba choni chicho ukunfisila icheni chako nukumpima pakuba ne mulwani wako?

²⁵ Nkimba ukulonda pakunyoghofya, ane ne lyani ilyakupupuka ni mpepo? Nkimba ukunchimbizya ane ne lyelelo ilyimizu?

²⁶ Pakuti ukusimba ivintu ivyakubaba ivyakususannya nane nukumpela ukuti impyanaye imbibi izya ku bulumendo bwane.

²⁷ Ukuvipinya ivinama vyane ni minyololo; sona ukwenelezya posi papo nkukanya, pakubika ivimanyilo papo inyayo zyane zyakanya.

²⁸ “Po umuntu akumala ngati chintu ichakubola, ngati mwenda ghugho impezu zyadobolannyadobolannya.”