Yobu 11 - IBAYIBOLO 2024

Amazyu agha Zofali

¹ Po u Zofali uwamu Naama akamula akati:

² “Nkimba atalipo umuntu nayumoyumo, uwakuti angamula amazyu aghabupunganu ghanagha? Nkimba pamulomu pangamupela umuntu pakuba mugholosu?”

³ Wee Yobu, nkimba abantu bangaba bulo myee, nanti bivwa amazyu ghako? Nkimba atangabapo nayumoyumo umuntu, uwakukuchemela nanti ukubobezya?

⁴ Awe ukunena kwa Chala ukuti, “Ichimanyisyo chane chanaloli, sona ne muzelu pamaso papako.”

⁵ Eee, nalondagha nkani nanti u Chala anenapo zimo, nanti ighulagha umulomo wache pakwamula.

⁶ Nalondagha nkani nanti akuvumbulilagha amahala aghakubusyefu, pakuti amahala aghanaloli ghali ni mbazu zibili. Manya ichi: U Chala aziluvizye zimo imbibi zyako.

⁷ Nkimba ungivwisya ivyakubusyefu ivya Chala? Nkimba ungayimanya impaka iya mahala agha Wamaka ghosi?

⁸ Matali ukuchila kumwanya. Nkimba ungabombapo choni? Mibizu nkani ukuchila ichisu icha bantu abafwe. Nkimba ungamanya choni?

⁹ Ghakuzukite ukuchila ichisu ichapasi, sona mububaba makulu ukuchila inyanja.

¹⁰ “Nanti u Chala iza nukukwighalila mujele, sona nanti iza nawe pamaso pa balongi, nkimba wewenu yuyo angamukanizya?”

¹¹ Naloli u Chala abamenye abantu abamyasi, sona nanti ennya ububibi, nkimba atakuzimanya?

¹² Loli umupunganu angaba na mahala nanti impunda yapapa umuntu.

¹³ “Wee Yobu, nanti ukwiyipa nukugholosezya inyobe zyako kukwache,

¹⁴ nukwefya imbibi zizyo zili munyobe zyako sona nanti utakwitikizya ububibi munyumba yako,

¹⁵ po ukwiza pakutalankannya umwakusita isoni nazimozimo. Ukwiza pakwikalana umwakusita ubogha nabumobumo.

¹⁶ Naloli ukwiza pakughaluvya amayimba ghako, ukwiza pakughakumbukagha ngati mizi ghagho ghenda kale.

¹⁷ Ubumi bukwiza pakulama nkani ukuchila umusanya, ichisi chikwiza pakuba ngati po pandabindabi.

¹⁸ Mukwiza pakwikalagha umwakufwasa, pachifukwa ichakuti ukwiza pakuba nu lusubilo; u Chala akwiza pakuba nawe nukukupa ubutuzyo.

¹⁹ Ukwiza pakulambalala, umwakusita umuntu nayumoyumo uwakukughofya, sona abantu abinji bakwiza pakukulaba ukuti ubavwe.

²⁰ Abantu ababibi bakwiza pakwennya akafobela, sona bakwiza pakupulumpagha bulo. Ulusubilo lwabo lukwiza pakufwa.”